Azərbaycan və Birləşmiş Ərəb Əmirlikləri arasında hüquqi sahədə əməkdaşlıq məsələləri müzakirə edilib
Əbu-Dabi, 25 aprel, AZƏRTAC
Azərbaycanın Dubay və Şimal Əmirliklərindəki (BƏƏ) baş konsulu Cavidan Hüseynov Dubay Məhkəmələrinin baş direktoru Tariş Eyd Əl-Mənsuri ilə görüşüb. Görüşdə Azərbaycan və Birləşmiş Ərəb Əmirlikləri arasında hüquqi sahədə əməkdaşlığın perspektivləri müzakirə edilib.
Baş konsul Azərbaycan ilə BƏƏ arasında əlaqələrin yüksək səviyyədə olduğunu diqqətə çatdırıb, ikitərəfli əlaqələrin dinamik şəkildə inkişaf etdiyini bildirib. O, Azərbaycanın BƏƏ ilə münasibətlərə böyük önəm verdiyini, bu əlaqələrin hərtərəfli genişləndirilməsində maraqlı olduğunu vurğulayıb. Dövlət başçıları arasında mövcud olan səmimi dostluq əlaqələrinə toxunan C.Hüseynov hər iki ölkə rəhbərliyinin siyasi iradəsi sayəsində ikitərəfli əlaqələrin müxtəlif sahələrdə ildən-ilə daha da inkişaf etdiyini söyləyib. O, Azərbaycan Prezidenti İlham Əliyevin BƏƏ ilə müxtəlif sahələrdə qarşılıqlı faydalı əməkdaşlığın genişləndirilməsinə xüsusi əhəmiyyət verdiyini diqqətə çatdırıb.
Tariş Eyd Əl-Mənsuri ikitərəfli münasibətlərin səviyyəsinin məmnunluq doğurduğunu qeyd edərək, Azərbaycan və BƏƏ arasında əlaqələrin inkişafında dövlət başçılarının böyük rolunun olduğunu bildirib. O, ölkələrimiz arasında iqtisadiyyat, ticarət və turizm sahələrində sıx əməkdaşlığın olduğunu vurğulayaraq, son illər artmaqda olan qarşılıqlı turist səfərlərinin bunun bariz nümunəsi olduğunu deyib. Baş direktor Azərbaycanın turizm imkanları, füsunkar təbiəti, əlverişli iqlimi və əmin-amanlığının ərəb turistlərini cəlb edən əsas amil olduğunu bildirib.
Görüşdə hər iki ölkənin məhkəmə orqanları arasında əməkdaşlığın perspektivləri barədə fikir mübadiləsi aparılıb. C.Hüseynov Azərbaycan vətəndaşlarının üzləşdiyi məsələlərlə bağlı Dubay Məhkəmələrinin hər zaman ədalətli mövqe sərgilədiyini bildirib və Tariş Eyd Əl-Mənsuriyə
təşəkkür edib.
Öz növbəsində, baş direktor BƏƏ-də məskunlaşmış Azərbaycan vətəndaşlarının cinayət baxımından ən aşağı göstəricilərə sahib olduğunu vurğulayıb və Dubay Məhkəmələrinin hər zaman ədalətin yanında olduğunu qeyd edib. Baş konsul sözügedən faktın sevindirici hal olduğunu ifadə edərək, Azərbaycan Respublikasının Dubaydakı baş konsulluğu tərəfindən Dubay və Şimal Əmirliklərində müvəqqəti və daimi yaşayan, işləyən və təhsil alan Azərbaycan vətəndaşları ilə müntəzəm şəkildə əlaqə saxlanıldığını, görüşlərin təşkil edildiyini və onlar arasında müvafiq maarifləndirmə işinin aparıldığını diqqətə çatdırıb. Baş konsul Dubay Məhkəmələrinin baş direktorunu Azərbaycana səfərə dəvət edib. O, dəvətə görə təşəkkürünü bildirərək fürsət yaranacağı təqdirdə ölkəmizə səfər edəcəyini söyləyib.
Asya Hacızadə
AZƏRTAC-ın xüsusi müxbiri
Əbu-Dabi
Bölmənin digər xəbərləri
