Azərbaycanın Avropada enerji təminatçısı rolunda çıxış etməsi vacib məqam kimi qiymətləndirilir
Bakı, 14 fevral, AZƏRTAC
Azərbaycanla İtaliya arasında son 30 il ərzində qarşılıqlı etimada əsaslanan diplomatik münasibətlər formalaşıb. İtaliya hər zaman Azərbaycanın bölgədə apardığı haqq və ədalət işinə töhfə verən Avropa dövlətlərindən biri olub. Bunun bariz nümunəsini biz İkinci Qarabağ müharibəsi zamanı da açıq şəkildə gördük.
Bu fikirləri AZƏRTAC-a açıqlamasında politoloq Amid Əliyev söyləyib.
O qeyd edib ki, Fransadan fərqli olaraq İtaliya rəsmi olaraq dövlət səviyyəsində Azərbaycanın ərazi bütövlüyünə və Vətən müharibəsi zamanı bizə öz siyasi dəstəyini nümayiş etdirdi. Bu da, öz növbəsində, hər iki ölkə arasında gələcək üçün yeni əməkdaşlıq perspektivlərini müəyyən etdi. Ümumiyyətlə, hər iki ölkə arasında siyasi, iqtisadi, enerji və mədəni əlaqələrin inkişafı yüksələn xətt üzrə inkişaf edir. Müharibə zamanı İtaliyanın sərgilədiyi müsbət mövqe dövlətimiz tərəfindən Qarabağ iqtisadi rayonunda başlanmış irihəcmli yenidənqurma işlərinə bu ölkənin şirkətlərinin də cəlb olunması ilə nəticələndi.
Hazırda İtaliya şirkətləri ilə "yaşıl enerji", "yaşıl ərazi" və "ağıllı şəhər" konsepsiyaları ətrafında məhsuldar əməkdaşlıq davam edir. İtaliya təcrübəsinin bölgəyə transformasiya imkanları qiymətləndirilir.
“Eyni zamanda, İtaliya Azərbaycanın Avropada etibarlı enerji tərəfdaşı qismində də çıxış edir. Cənub Qaz Dəhlizi vasitəsilə Azərbaycan qazı İtaliyaya çatdırılır. Əgər 2021-ci ildə bu marşrut vasitəsilə 8.2 milyard kubmetr qaz ixrac edilmişdisə, bu il onun həcmi 11.6 milyard kubmetr olacaq. İtaliya da bu həcmdə qazın əsas tədarükçülərindən biri hesab olunur. Prezident İlham Əliyevin 2022-ci ilin sentyabrında İtaliyaya işgüzar səfəri zamanı məhz bu məqamlara xüsusi olaraq toxunulub. Dövlətimizin başçısının “İl Sole 24 Ore” nəşrinə verdiyi müsahibəsində Azərbaycan-İtaliya əməkdaşlığının bütün sahələr üzrə perspektivləri açıq şəkildə qeyd edilmişdir”, - deyə A.Əliyev vurğulayıb.
Politoloq bildirib ki, Azərbaycan və İtaliya arasında mədəni əlaqələr də nəzərəçarpacaq dərəcədə inkişaf edib. 2020-ci ilin İtaliyada "Azərbaycan İli" kimi qeyd edilməsi, Bakıda İtaliya-Azərbaycan Universitetinin yaradılması və qarşılıqlı olaraq müxtəlif mədəni tədbirlərin təşkili bunun bariz nümunəsi hesab olunur.
Son iki il ərzində Azərbaycanın Avropa məkanında enerji təminatçısı rolunda çıxış etməsi isə olduqca vacib məqam kimi qiymətləndirilir. Bu işdə də İtaliyanın rolu olduqca vacibdir. Yunanıstan-Bolqarıstan İnterkonnektorunun (IGB) açılması ilə Macarıstan, Rumıniya, Slovakiya, Yunanıstan, Makedoniya və sair Cənub Şərqi Avropa dövlətləri məhz Azərbaycanı alternativsiz tərəfdaş kimi qəbul etdilər.
A.Əliyev əlavə edib ki, müasir dünyada enerji təminatının milli təhlükəsizlik məsələsi kimi qəbul edilməsi bu istiqamətdə Azərbaycanın artan rolunu bir daha da sübut etdi. Artıq Azərbaycan qazın Avropaya çatdırılması yox, şaxələndirilməsi siyasətini uğurla icra edir. Artıq yaşıl və bərpaolunan enerji resurslarının Avropa məkanına çatdırılması üzrə vacib addımlar atılıb. Bu, ümumilikdə region üçün yeni bir layihədir ki, Azərbaycan bunu da uğurla icra edəcək. Avropa İttifaqının bir sıra rəhbər şəxsləri Azərbaycanı bu qisim layihələrə görə vacib strateji tərəfdar adlandırıblar.
Qeyd olunan məqamlarda Azərbaycanın İtaliya ilə əməkdaşlıq etməsi olduqca vacibdir. İtaliya Aİ və NATO-nun üzvüdür. Bu əməkdaşlıq Azərbaycanın Avropa məkanına inteqrasiyasına, eyni zamanda, regionda bir sıra siyasi və iqtisadi təşkilatlarla perspektivli əməkdaşlığına zəmin yaradır.
Bölmənin digər xəbərləri
