Beynəlxalq Cüdo Federasiyası Azərbaycan idmançılarının çıxışına qiymət verib
Bakı, 24 avqust, AZƏRTAC
Beynəlxalq Cüdo Federasiyası (BCF) Xorvatiyanın paytaxtı Zaqrebdə keçirilən Dünya çempionatının ilk günü haqqında məqalə dərc edib.
AZƏRTAC xəbər verir ki, yazıda Azərbaycan idmançılarının diqqətəlayiq çıxışları vurğulanıb.
Qeyd olunub ki, yeniyetmələr arasında mundialın ilk günündən sonra hər çəki dərəcəsində yeni dünya çempionu var: “Gənc idmançılar böyük nailiyyətlərə necə çatmağı öyrənirlər və bugünkü çıxışları onların ən yüksək səviyyədə uğur qazanmaq potensialına malik olduğunu göstərir. Onlar təzyiqi yaxşı idarə edə bilirlər və peşəkar idmançının həyat tərzi üçün lazım olan fiziki gücə malikdirlər. İdmançıların getdikləri yol asan olmasa da, irəliləyişləri ümidverici və ruhlandırıcıdır.
50 kiloqram çəki dərəcəsində yarışan Məmişov soyadlı azərbaycanlı idmançılar ilk iki yeri tutdular. Günün əvvəlində Məhəmməd Məmişovun reytinqdə lider mövqeyini nəzərə alaraq, inamlı çıxış edəcəyi gözlənilirdi. Bununla belə, Nihad Məmişov yarış boyu sabit performans göstərərək, reytinqdə ikinci olan macarıstanlı Bens Qalo üzərində qələbə qazanaraq hər kəsi təəccüblədirdi.
Medal görüşündə yeniyetmə Avropa çempionu Məhəmməd Məmişov komanda yoldaşı Nihad Məmişovla qarşılaşdı və bu, Məhəmməd üçün gözlənilməz oldu. Bununla belə, onlar bir-birinin texnikasını və üslubunu yaxşı bildikləri üçün görüş vaxtı təhlükə yaratmaq şansları da çox deyildi.
Həyəcanlı qarşılaşmada “Qızıl xal”a (Golden score) cəmi 8 saniyə qalmış Nihad gözəl əks-fənd etdi və “waza-ari” xalı qazandı və dünya çempionu tituluna yiyələndi.
55 kiloqram çəki dərəcəsində bürünc medal uğrunda mübarizə fransalı cüdoçu Mivovan üçün çətin başladı. Azərbaycanlı cüdoçu Mirxaliq İsgəndərov "waza-ari" xalı qazanaraq üstünlük əldə etdi. Bu, onların heç birinin gözlədiyi start deyildi. Reytinqdə rəqibindən yüksəkdə olan İsgəndərov son vaxtlar əla çıxış edir, müxtəlif yarışlarda qızıl medallar qazanır. Fransa cüdoçusu Mivovan görüşün bitməsinə cəmi bir dəqiqə qalmış hesabı bərabərləşdirə bildi. Gənc cüdoçuların hər ikisi əzmkarlıq və zəhmətkeşlik nümayiş etdirdilər və onlar yüksək yaş qruplarına keçərkən bu keyfiyyətlərə mütləq ehtiyac duyacaqlar. Yekunda onlardan yalnız biri medalı qazana bildi və o da İsgəndərov oldu. Azərbaycan təmsilçisi ikinci "ko-soto-qake" fəndini uyğun vaxtda tətbiq etdi və bununla da qalib gəldi”.
Bölmənin digər xəbərləri
