Biləsuvarda əkin sahələrində yeni suvarma texnologiyaları tətbiq olunur VİDEO
Biləsuvar, 21 noyabr, İsmayıl Cəfərli, AZƏRTAC
Biləsuvarda əkin sahələrində müasir suvarma şəbəkəsi genişlənir. Son iki ildə müxtəlif kənd təsərrüfatı məhsulları yetişdirən iri fermer təsərrüfatlarında ən müasir Pivot suvarma sistemləri genişləndirilərək 7 min hektara qədər əkin sahəsini əhatə edir.
AZƏRTAC xəbər verir ki, Biləsuvarın kənd təsərrüfatında uzun illərdir mövcud olan qədim suvarma ənənələri indi öz yerini yeni texnoloji mərhələyə verir. Pivot suvarma sisteminə keçid texniki yeniliklə yanaşı, əkinçilik mədəniyyətinə və bol məhsuldarlığa yön verən ciddi bir aqroinfrastruktur addımıdır. Nəzərə alsaq ki, rayon ərazisində əkin sahələrinin ərazisi son 10 ildə 50 faizdən çox artaraq 64 min hektara çatdırılıb, bunun da 58 min hektara qədəri suvarılan torpaqlardır. Bu baxımdan ölkənin ən çətin suvarma şəraitinə malik Biləsuvarda müasir suvarma sistemlərinin tətbiqi burada ənənəvi və qeyri-ənənəvi bitkilərin becərilməsində effektiv istifadəyə imkan yaradacaq. İspan modeli olan 17 ədəd pivot qurğusu təsərrüfatın 1000 hektara yaxın torpaq sahəsinin birdəfəyə suvarılmasını əhatə edəcək.
Yeni texnologiyanın özəlliklərindən danışan kənd təsərrüfatı mütəxəssisi Həmzalı Məmmədquliyev deyir ki, əkin sahəsində quraşdırılan müasir pivot suvarma sistemləri ilə təxminən 1000 hektara yaxın sahəni 14 saata suvarmaq mümkün olacaq: “Bununla əlaqədar artıq ərazidə 160 min kubmetrlik su həcmi olan süni gölün yaradılması da başa çatıb və bu da gələcəkdə texnologiyanın dayanıqlı su təminatında böyük rol oynayacaq. Əslində, illik əkilən tarla bitkilərinin hamısını suvara bilirik. Hətta daha hündür pivotlarla biz bağları, ağacları suvara bilirik. Burada taxıl, qarğıdalı, soya, çuğundur, pambıq ola bilər - bunlar nəzərdə tutulur. Biləsuvar rayonunda əkinlərin suvarma suyu yalnız bir mənbədən - yerüstü sulardan ibarətdir. Araz çayından Cənubi Muğan kanalı vasitəsilə və transsərhəd Bolqarçay vasitəsilə. Bu isə xüsusən yay aylarında rayonda ciddi su qıtlığı ilə özünü daha çox büruzə verir. Yəni, təsərrüfatlarda müasir suvarma sistemlərinin yaxın gələcəkdə kütləvi tətbiqi artıq suvarma prosesində təbiətin kaprizlərinə də bağlılığı azaldaraq, məhsul istehsalını arzuolunan səviyyəyə çatdıracaq”.
Biləsuvar DAİM-in direktoru Nurəddin Quliyev isə bildirir: “Ölkəmizdə su ehtiyatlarından səmərəli istifadəyə dair milli strategiya qəbul olunub. Bu milli strategiya bütünlüklə respublika ərazisində aparılan əkin sahələrində su ehtiyatlarından səmərəli istifadə üçün yol göstərir. Biləsuvar rayonunda da bununla bağlı xeyli işlər görülüb. Onu da qeyd etmək yerinə düşərdi ki, 2021-ci ildə bizim əkin sahələrimizin pivotla əhatə olunan sahələrin ərazisi 5 min hektara yaxın təşkil edirdisə, 2024-2025-ci ilin ilk məlumatına görə, bu ərazilərin sahəsi 6500 hektara qədər artıb”.
Qeyd edək ki, müasir suvarma sistemləri istifadə edən təsərrüfatlarda əkinə görə subsidiya adi suvarma aparılan əkinlərə nisbətən daha çox müəyyənləşdirilib. Məsələn, payızlıq taxıl məhsulları əkinlərində bu, hər hektara 230 və 290 manat təşkil edir. Bundan başqa, müasir suvarma sistemi almaq istəyən fermerə ilkin dəyərin 40%-ə qədər güzəşt olunur.
Bölmənin digər xəbərləri
