“Böyük Qayıdışa zəmin yaradan Ulu Öndər” mövzusunda yazı müsabiqəsinin qalibləri mükafatlandırılıb
Bakı, 5 may, AZƏRTAC
Ümummilli Lider Heydər Əliyevin 100 illik yubileyi münasibətilə Ailə, Qadın və Uşaq Problemləri üzrə Dövlət Komitəsinin təşkilatçılığı ilə mayın 5-də “Böyük Qayıdışa zəmin yaradan Ulu Öndər” mövzusunda “Ən yaxşı yazı” müsabiqəsinin qaliblərinin mükafatlandırılması mərasimi keçirilib.
AZƏRTAC xəbər verir ki, tədbirdən əvvəl Ümummilli Lider Heydər Əliyevin abidəsi ziyarət edilib, önünə gül dəstələri qoyulub, Ulu Öndərin xatirəsi ehtiramla anılıb.
Tədbirdə Azərbaycanın Dövlət Himni səsləndirilib.
Ailə, Qadın və Uşaq Problemləri üzrə Dövlət Komitəsinin sədri Bahar Muradova Ulu Öndər Heydər Əliyevin xalqımız qarşısındakı xidmətlərindən danışıb, Ulu Öndərin gənclərə aparıcı qüvvə kimi dəyər verdiyini, onlara diqqət və qayğı ilə yanaşdığını söyləyib.
Sonra Ulu Öndər Heydər Əliyevin şərəfli həyat yolu və siyasi irsini əks etdirən videoçarx nümayiş olunub.
Tədbirdə çıxış edən tarix elmləri doktoru, professor Dilarə Seyidzadə Ulu Öndərlə bağlı xatirələrini bölüşüb. Bildirib ki, Heydər Əliyev ölkəmizin müstəqilliyini qorumaqla yanaşı, inkişafı naminə çox mühüm işlər görüb. Ulu Öndərin bizim üçün miras qoyduğu irsin nəsillərdən-nəsillərə ötürüləcəyini və əbədi yaşayacağını deyən professor qeyd edib ki, Ümummilli Liderin siyasətini bu gün Prezident İlham Əliyev müvəffəqiyyətlə davam etdirir.
Təhsilin İnkişafı Fondunun İdarə Heyətinin sədri Elnur Nəsibov və Yeni Azərbaycan Partiyası Veteranlar Şurasının üzvü, yazıçı Tahir Məmmədov tədbirdə çıxış edərək bildiriblər ki, Ulu Öndər Heydər Əliyevin rəhbərliyi dövrü Azərbaycan tarixinin ən yüksək inkişaf mərhələsi olub. Ümummilli Liderin müdrik siyasəti nəticəsində Azərbaycan, sözün əsl mənasında, müstəqil dövlətə çevrilib.
Daha sonra müsabiqə qaliblərinə diplom və hədiyyələr, digər yerləri tutanlara isə həvəsləndirici mükafatlar təqdim edilib.
Tədbir bədii hissə ilə davam edib.
Qeyd edək ki, müsabiqəyə Azərbaycanın müxtəlif şəhər və rayonlarından ümumilikdə 175 yazı daxil olub.
Bölmənin digər xəbərləri
