Cəlil Xəlilov: Ordumuz erməni təxribatına bir neçə misli ilə cavab verdi
Bakı, 29 iyun, AZƏRTAC
Ordumuz erməni təxribatına bir neçə misli ilə cavab verdi və bundan sonra da belə olacaq.
Bunu AZƏRTAC-a açıqlamasında Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov bildirib.
İyunun 26-da Qarabağda erməni təxribatına münasibət bildirən polkovnik qeyd edib ki, Azərbaycan tərəfinin bu təxribata verdiyi cavab erməni separatizmi üçün dərs olmalıdır: “İyunun 26-da erməni separatçılarının ordumuzun Ağdam rayonunun Qalayçılar kəndi istiqamətindəki mövqelərini atəşə tutması nəticəsində bir hərbçimiz yaralandı. Azərbaycan Ordusu düşmən təxribatının qarşısını almaq məqsədilə xüsusi əməliyyat təşkil etdi. Şərti adı “Qisas” olan bu əməliyyat nəticəsində separatçıların mövqelərinə dəqiq zərbələr endirildi, qanunsuz silahlı dəstənin 5 üzvü məhv edildi. Ordumuz bununla sübut etdi ki, Azərbaycan istənilən təxribatı cavabsız qoymayacaq və bu təxribatların qarşısını qətiyyətlə alacaq”.
Cəlil Xəlilov Azərbaycan Silahlı Qüvvələrinin bundan öncə reallaşdırdığı oxşar əməliyyatlara da diqqət çəkib: “Xatırladım ki, bu, ordumuzun erməni təxribatına cavab olaraq atdığı ilk addım deyil. Bundan öncə də ordumuz düşmən təxribatlarını uğurla dəf edib, separatçılara qarşı müvəffəqiyyətli əməliyyatlar həyata keçirib. “Fərrux”, “Sarıbaba” əməliyyatları bunlara nümunədir. Bütün bu əməliyyatlar zamanı ordumuz böyük əzm və dəqiqliklə düşmən mövqelərinə sarsıdıcı zərbələr endirib, separatçı qüvvələrin bir neçə üzvünü zərərsizləşdirib.
Bu gün ermənilərin ordumuzla üzbəüz mövqelərində müəyyən mühəndis işləri aparmağa səy göstərməsi, Xankəndindəki birliklərə qanunsuz silah daşımağa cəhd etməsi onu göstərir ki, separatçılar yeni təxribatlara hazırlaşır. Ancaq ermənilər də, onların havadarları da bilməlidirlər ki, bu təxribatların nəticəsi onların özləri üçün acınacaqlı olacaq.
Hərbi müstəvidə heç bir uğura nail ola bilməyən separatçılar informasiya müstəvisində təxribata əl atır, “Laçın” nəzarət-buraxılış məntəqəsini “blokada” kimi təqdim etməyə çalışırlar. Onların bu yalanı da beynəlxalq media platformasında ifşa edilir. Erməni separatizmi hərbi müstəvidə olduğu kimi, media müstəvisində də heç neyə nail ola bilməyəcək”.
Cəlil Xəlilov törədilən təxribatlarda Rusiya sülhməramlılarının məsuliyyət daşıması məsələsinə də toxunub: “Şübhəsiz, Rusiya sülhməramlılarının nəzarət etdiyi ərazilərdə törədilən bu təxribatlar haqlı olaraq müəyyən sual və şübhələr doğurur. Axı necə ola bilər ki, ərazidə bu qədər sülhməramlı ola-ola separatçılar ordumuzun mövqelərini atəşə tutsun və bundan sülhməramlı missiyanın xəbəri olmasın? Əslində, oxşar olayların sıx-sıx təkrarlanması ermənilərin bu təxribatlara elə sülhməramlılar tərəfindən təşviq edilməsi ilə bağlı ehtimallara yol açır. Rusiya sülhməramlıları ən azından bu ehtimalların meydana çıxmasına, şübhələrin onlara yönəlməsinə imkan verməmək üçün öz missiyalarını vicdanla yerinə yetirməli, separatizmin əl-qol açmasına imkan verməməlidirlər. Çünki bu cür təxribatlar bölgədə sülh və təhlükəsizlik üçün ciddi təhlükə olmaqla yanaşı, Rusiyanın sülhməramlı missiyasının nüfuzu baxımından da arzuedilməzdir və onların gərəksizliyi ilə bağlı fikirlərə yol açır”.
Bölmənin digər xəbərləri
