Dekabrın sonunadək Azərbaycan Ordusunda 200 mindən artıq ağac əkiləcək
Bakı, 16 dekabr, AZƏRTAC
Azərbaycan Respublikasının Birinci vitse-prezidenti Mehriban xanım Əliyevanın ağacəkmə aksiyası ilə bağlı təşəbbüsünə qoşulan Azərbaycan Ordusunda növbəti ağacəkmə və yaşıllaşdırma aksiyası keçirilib.
Müdafiə Nazirliyinin mətbuat xidmətindən AZƏRTAC-a bildiriblər ki, aksiya çərçivəsində ötən həftənin şənbə və bazar günləri ərzində birlik, birləşmə, hərbi hissələr, xüsusi təyinatlı hərbi təhsil müəssisələri, idarə və təşkilatların ərazilərində müxtəlif növdə 40 min ağac əkilib. Aksiya başlayandan bu günədək bu say ümumilikdə 100 mindən artıqdır.
Qeyd edək ki, ekoloji vəziyyətin daha da yaxşılaşdırılması məqsədilə Azərbaycan Ordusunda mütəmadi olaraq genişmiqyaslı yaşıllaşdırma işləri aparılır.
Ətraf mühitin mühafizəsinə və yaşıllıqların artırılmasına töhfə verən bu cür ağacəkmə aksiyalarının davamlı olaraq keçirilməsi və dekabrın sonunadək 200 mindən artıq ağacın əkilməsi planlaşdırılır.
Bölmənin digər xəbərləri
