Masallı, 4 iyun, Bağır Əliyev, AZƏRTAC

İyunun 4-də Masallı rayonunun Bədəlan kənd tam orta məktəbində ümummilli lider Heydər Əliyevin xatirəsinə həsr olunmuş “Açıq dərs” keçirilib. Tədbirdə Bədəlan və Hişkədərə kənd tam orta məktəblərinin yuxarı sinif şagirdləri iştirak ediblər.

AZƏRTAC-ın bölgə müxbiri xəbər verir ki, Azərbaycan Respublikasının Dövlət himninin səsləndirilməsi ilə başlanan tədbirdə məktəblilər ümummilli lider Heydər Əliyevə həsr olunmuş şeirlər söyləyib, böyük rəhbərin zəngin və mənalı ömür yolunu əks etdirən videokadrlara baxıblar.

“Açıq dərs”i keçən Bədələn kənd tam orta məktəbinin dil-ədəbiyyat müəllimi Məhbubə Şahbazovanın şagirdlərə verdiyi “Biz ulu öndər Heydər Əliyev haqqında nə bilirik?” ilk sualına məktəblilər böyük rəhbərin həyat və fəaliyyəti barədə ətraflı cavab veriblər.

Tədbirdə Heydər Əliyevin anadan olmasının 96-cı ildönümü ilə bağlı rayonda keçirilən müsabiqənin iştirakçısı, Bədələn kənd tam orta məktəbinin X sinif şagirdi Dünya Cəfərzadənin və Hişkədərə kənd tam orta məktəbinin XI sinif şagirdi, builki buraxılış imtahanlarında 610 bal toplamış Fərid Qafarovun mövzuyla bağlı təqdimatları dinlənilib.

“Açıq dərs”də çıxış edən Xalq yazıçısı, Milli Məclisin deputatı, “Şöhrət” ordenli Elmira Axundova ümummilli lider Heydər Əliyevin zəngin və mənalı ömür yoluna həsr olunmuş 7 cildlik “Şəxsiyyət və Zaman” roman-tədqiqat əsəri barədə məlumat verərək böyük rəhbərin Naxçıvanda orta məktəbdə və texnikumda təhsil aldığı illərdəki fəaliyyəti barədə danışıb: “Ulu öndər Heydər Əliyev Azərbaycan dilində təhsil alsa da, rus və türk dillərini mükəmməl bilirdi. O, Azərbaycan ədəbiyyatı ilə yanaşı, klassik rus ədəbiyyatını da sevə-sevə mütaliə edirdi. Rəsm çəkməyi, idmanla məşğul olmağı, teatrı, Cəfər Cabbarlının əsərlərini, xüsusən “Sevil” tamaşasını çox sevirdi. Sonralar qızına Sevil adını verməsi heç də təsadüfi deyildi.

Böyük rəhbərimiz orta məktəb müəllimlərini həmişə sevgi ilə xatırlayırdı. O, Naxçıvanda orta məktəb illəri haqqında deyərdi ki, çoxlu adamlar görüb, böyük şəxsiyyətlərlə qarşılaşıb, kimsə yaddaşında əbədi qalıb, kimsə silinib gedib. Ancaq onun üçün ən yaddaqalan, ən əziz Naxçıvandakı müəllimləri olub və onları adbaad xatırlayır”.

Elmira Axundova şagirdlərə müraciət edərək deyib: “Çox istərdim ki, böyük rəhbərimizin ömür yolu sizə örnək olsun, çünki onun ömür yolu bir məktəbdir. Bu məktəbdən bəhrələnmək lazımdır”.

Kitabı ən yaxın dost, biliyi ən zəngin sərvət kimi dəyərləndirən Milli Məclisin deputatı şagirdlərin suallarını cavablandırıb, Heydər Əliyevlə bağlı xatirələrini danışıb.

Tədbirdə çıxış edənlər Xalq yazıçısına yaradıcılıq uğurları arzulayıblar.

Daha sonra şagirdlərə yazıçı Elmira Axundovanın müəllifi olduğu “Şəxsiyyət və Zaman” çoxcildlik roman-tədqiqat əsəri və son zamanlar nəşr olunmuş digər kitabları avtoqrafla paylanılıb.