Ermənistan və Qarabağdakı separatçılar Azərbaycanın sülh çağırışlarına təxribat törətməklə cavab verirlər - Şərh
Bakı, 25 iyul, AZƏRTAC
Ermənistan və onun havadarları Qarabağdakı separatçılarla birlikdə Azərbaycanın sülh çağırışlarına təxribat törətməklə cavab verirlər. Bunun üçün başqa vasitələrdən, “ucuz” üsullardan istifadə etməyə çalışırlar. Hətta xarici mətbuatda da qeyd olunur ki, Qarabağdakı terrorçular planladıqları çirkin niyyətlərini həyata keçirməyə çalışırlar. Məlumata görə, onlar Xankəndində bir neçə ermənini öldürərək bunu Azərbaycan tərəfinin törətdiyini iddia etmək istəyirlər. Bu, əlacsız qalan terrorçuların adətən əl atacağı ən sonuncu üsuldur.
Bunu AZƏRTAC-a açıqlamasında ehtiyatda olan polkovnik, Qarabağ müharibəsi və Silahlı Qüvvələrin veteranı, hərbi ekspert Şair Ramaldanov deyib.
O qeyd edib ki, ümumiyyətlə, erməni terrorçular təxribat törətmək istəyəndə mütləq bununla bağlı müvafiq ssenari hazırlayırlar. Azərbaycan həmişə həmin təxribatlara tutarlı və adekvat cavab verib. Əgər ermənilər Xankəndidə və ya Laçında hər hansı formada təxribat törətsələr, yenə də nəticə əldə edə bilməyəcəklər və bu, onlar üçün sonuncu olacaq.
İkinci Qarabağ müharibəsinin də məhz ermənilərin təxribatlarına cavab olaraq başlandığını, Azərbaycan Ordusunun şanlı Zəfər qazandığını diqqətə çatdıran Ş.Ramaldanov fikirlərinə belə davam edib: “Odur ki, Qarabağdakı separatçılar, qanunsuz silahlılar, onların havadarları və yaxud Ermənistanın siyasi-hərbi rəhbərliyi tərəfindən bu istiqamətdə hər hansı addım atılarsa, Azərbaycan bununla bağlı mövqeyini bildirəcək və adekvat cavab verilməsi uzun müddət çəkməyəcək. Bu barədə Prezident İlham Əliyev Şuşada də mesajlarını verdi. Ona görə də belə hal olarsa da, Azərbaycanın atacağı addımlar çox təsirli olacaq. Ölkəmiz dünya tərəfindən etibarlı tərəfdaş kimi qəbul edilir. Belə təxribatlar Azərbaycanın imicinə zərbə vurmayacaq, lakin Silahlı Qüvvələrimizin cavabı çox sərt olacaq”.
Hərbi ekspertin sözlərinə görə, təəssüf ki, dünyada Qarabağda “dırnaqarası” humanitar böhrana inanan insanlar var. Bu, həmişəki kimi ermənilərin aciz, əzilən, təzyiqə məruz qalan donu geyinib dünyaya yalan informasiya yayması ilə əlaqədardır. Belə məqamda əgər hər hansı erməni terrorçu öz vətəndaşını öldürərsə, Azərbaycana qarşı təzyiqlər arta bilər.
“Hazırda Qarabağdakı separatçılar bu cür təxribatlara da əl atır, yalan informasiya yayırlar ki, guya Azərbaycan Ordusu Xocalının kəndlərindən birini atəşə məruz qoyub. Belə yalan, saxta xəbərlər Ermənistan və Azərbaycan arasında növbəti danışıqlar ərəfəsində nəyə hesablanıb? Məncə, bu, hər kəsə bəllidir. Biz tarix boyu, həmçinin son otuz ildə də onların öz uydurmalarını hər vəchlə dünyaya qəbul etdirmək cəhdlərinə şahidlik etdik. Digər yandan separatçılar hiss edirlər ki, onlar Qarabağda mövcudluğun son zamanlarını yaşayırlar və buranı tərk etməzdən əvvəl öz havadarlarının müəyyən sifarişlərini yerinə yetirirlər. Ermənistanın havadarları Azərbaycan Ordusunun hərbi qulluqçularının ermənilərə guya atəş açmasından istifadə edərək özlərinin ərazidə qalma vaxtını uzatmaq istəyirlər. Ermənistanın siyasi-hərbi rəhbərliyi və yaxud separatçılar həmişə deyirlər ki, guya atəşkəsi Azərbaycan tərəfi pozub və biz sadəcə cavab atəşi açırıq. Halbuki belə mənasız və ucuz davranışlar Azərbaycana lazım deyil. Ona görə ki, Azərbaycan savaşda Qələbə əldə edib və zamanla Azərbaycan Qarabağ iqtisadi zonasında öz dövlət qanunlarını tam bərpa edəcək. Odur ki, ermənilərin Azərbaycanı dünya qarşısında günahkar göstərmək üçün bundan sonra da cürbəcür təxribatlara əl atacağı gözləniləndir”, - deyə Qarabağ müharibəsi veteranı bildirib.
Silahlı Qüvvələrimizin öz vəzifəsini uğurla və şərəflə yerinə yetirdiyini deyən ekspert fikirlərini və Ali Baş Komandan İlham Əliyev Şuşa Qlobal Media Forumunun açılış mərasimindəki nitqindən bir parça ilə davam etdirib: “... Bu gün ordumuz üç il əvvəlki ordudan daha güclüdür. Buna, əlbəttə ki, ehtiyac var. O da bizim tariximizdən qaynaqlanır və biz görürük ki, bu gün beynəlxalq hüquq normaları kobud şəkildə pozulur. Biz görürük ki, beynəlxalq hüquq selektiv tətbiq edilir. Biz uzun illər bu yanaşmaya məruz qalmışıq. Biz səsimizi ucaldırdıq və deyirdik BMT Təhlükəsizlik Şurası 4 qətnamə qəbul edib ki, Ermənistan qoşunları dərhal və qeyd-şərtsiz Azərbaycanın ərazisindən çıxarılmalıdır. Ancaq o qətnamələrə riayət edilmirdi və bu gün həmin o tendensiya davam edir. Beynəlxalq hüquq işləməyəndə, imza o qədər də əhəmiyyətə malik olmayanda sülhün təminatı yalnız gücdür. Bunu deyərkən, əlbəttə, biz gələcəkdə yarana biləcək təhlükələri istisna etməməliyik”.
“Azərbaycanın güclü Ordusu olmasaydı, 44 günlük müharibədə Qələbə qazana və BMT-nin məlum dörd qətnaməsini yerinə yetirə bilməzdi” - deyən ehtiyatda olan polkovnik əlavə edib ki, bundan sonra da ehtiyac yaranarsa, güclü Azərbaycan dövlətinin qüdrətli Ordusu qarşıya qoyulan hər hansı tapşırığı uğurla yerinə yetirəcək.
Bölmənin digər xəbərləri
