Bakı, 2 noyabr, AZƏRTAC

Ədalət naminə xüsusi olaraq qeyd edilməlidir ki, ermənilərdən fərqli olaraq Azərbaycanın dövlətçilik tarixində, xalq adət-ənənələrində, milli-mənəvi xüsusiyyətlərində məqsədə nail olmaq üçün terror yolu ilə günahsız insanları qətlə yetirməklə bağlı heç bir fakt mövcud deyildir. Azərbaycan bir xalq və dövlət olaraq qələbə sevincini də, uğursuzluğunun acısını da mərdi-mərdanə, döyüş meydanında dadmışdır.

Bu fikirlər Müdafiə Nazirliyinin Mətbuat Xidmətinin əməkdaşı, hərbi jurnalist, Azərbaycan Jurnalistlər Birliyinin üzvü İsa İsmayılov və Silahlı Qüvvələrin Hərbi Akademiyasının zabiti, Milli təhlükəsizlik üzrə ekspert Xəyal İskəndərovun “Ermənistanın “Azərbaycan tərəfindən terrorçular döyüşür” təbliğatı cəbhədəki uğursuzluqlarına haqq qazandırmağa hesablanıb” sərlövhəli məqaləsində yer alıb. Məqaləni təqdim edirik.

Son zamanlar Ermənistan mətbuatında ən çox yayılan və dünyanın müxtəlif ölkələrində erməniyönümlü media tərəfindən həvəslə tirajlanan xəbərlərdən biri də Ermənistanla Azərbaycan arasında baş verən müharibəyə terror qruplaşmalarının cəlb olunmasıdır. Belə ki, Ermənistan hakimiyyəti cəbhədəki uğursuzluğuna bəraət qazandırmaq üçün erməni cəmiyyəti üçün yeni bir hekayə uydurub. Guya Yaxın Şərqdən olan terrorçular cəbhədə Azərbaycan tərəfdən döyüşür. Bu iddialarına haqq qazandırmaq üçün Ermənistan hakimiyyəti bütün vasitələrə əl atıb, PKK terrorçularına Azərbaycan Silahlı Qüvvələrinə məxsus geyim formalarını geyindirməkdən tutmuş, ərəbdilli Livan ermənilərinin “əsir” kimi “mühakiməsinə” qədər. Lakin ermənilərin təqdim etdiyi heç bir fakt hələ ki, təsdiqini tapmayıb. Belə ki, onların Azərbaycan tərəfdən döyüşən “terrorçu” kimi təqdim etdiyi şəxslərin birinin Livan, digərinin isə Suriya ermənisi olması ekspertlər tərəfindən sübut olunub.

Azərbaycan bu günə qədər terrorizmə qarşı mübarizənin ön sıralarına gedən ölkələrdəndir. Azərbaycan Ordusunun şəxsi heyəti dünyanın ən qaynar nöqtələrində antiterror əməliyyatlarına qatılıb və hazırda da bu tip əməliyyatlarda fəal iştirak edir. Bundan əlavə, Azərbaycanın hüquq-mühafizə orqanları və təhlükəsizlik xidmətləri terror hücumlarını qarşısını almaq üçün çox uğurlu əməliyyatlar həyata keçirib, şübhəli terrorçuların mühakimə və həbs edilməsində fəal iştirak edib. Azərbaycanın terrora qarşı mübarizədə fəallığı, eyni zamanda, qətiyyəti qlobal güc mərkəzlərinin illik məruzələrində xüsusilə vurğulanır. Dünyada Azərbaycan qədər terrorizmlə mübarizəyə həssaslıqla yanaşan, bütün güc və vasitələrini bu mübarizəyə həsr edən dövlətlərin sayı çox deyil. Çünki son iki yüz ildə ermənilər tərəfindən terrorizmə ən çox məruz qalan Azərbaycan xalqıdır.

Burada ədalət naminə xüsusi olaraq qeyd edilməlidir ki, ermənilərdən fərqli olaraq, Azərbaycanın dövlətçilik tarixində, xalq adət-ənənələrində, milli-mənəvi xüsusiyyətlərində məqsədə nail olmaq üçün terror yolu ilə günahsız insanları qətlə yetirməklə bağlı heç bir fakt mövcud deyildir. Azərbaycan bir xalq və dövlət olaraq qələbə sevincini də, uğursuzluğun acısını da mərdi-mərdanə, döyüş meydanında dadıb. Terrora qarşı mübarizədə bu qədər həssas davranan və öz resurslarından maksimum istifadə edən Azərbaycana qarşı “terrorçulardan istifadə edir” kimi iddianın qaldırılması, sadəcə, erməni xislətinin başqa bir təzahür formasıdır. Ermənistanın “Azərbaycan tərəfindən terrorçular döyüşür” təbliğatı cəbhədəki uğursuzluqlarına haqq qazandırmağa və məğlubiyyətlərini ört-basdır etməyə hesablanıb.

Ermənilər dünyanın müxtəlif yerlərində silsilə qanlı hadisələr törətməklə “adlarını tarixə yazmış” bir millətin nümayəndələridir. 1975-1991-ci illərdə Türkiyənin bir sıra ölkələrdəki səfirliklərində və şirkətlərində çalışan onlarla əməkdaşın həyatına qəsd edilməsi faktı bunu sübut edir. Belə qanlı hadisələrin reallaşmasında Ermənistan dövləti və erməni lobbisi tərəfindən hərtərəfli dəstək alan ermənilərin aşağıdakı terror təşkilatlarının “müstəsna” rolu vardır (https://bit.ly/35Zb606):

- “Armenakan” partiyası;

- “Hnçak” partiyası;

- “Daşnaksütyun” erməni federativ inqilab partiyası;

- “Erməni soyqırımının qisasçıları”;

- “Erməni gizli azadlıq ordusu” (ASOA);

- “Ermənistanın azadlığı uğrunda erməni gizli ordusu” (ASALA);

- “Geqaron”;

- “Erməni azadlıq hərəkatı” (AOD);

- “Erməni azadlıq cəbhəsi”;

- “Orli qrupu”;

- “Erməni soyqırımı ədalət komandoları”;

- “Erməni birliyi”;

- “Demokratik cəbhə”;

- “Apostol”.

Bütün belə terror qruplaşmalarının məqsədi Türkiyə və Azərbaycanın əzəli torpaqlarında “böyük Ermənistan” dövlətinin yaradılması istiqamətində öz həmyerlilərinə “kömək etməkdir”. Bu terror qruplarında təmsil olunan bəzi şəxslərin adlarının ermənilər tərəfindən “qəhrəman” kimi “əbədiləşdirilməsi” Ermənistan dövlətinin terrorizmi dəstəkləməsi faktını əyani surətdə təsdiq edir. Onu da qeyd edək ki, yalnız 1989-1994-cü illərdə erməni separatçıları və terrorçuları Azərbaycan ərazisində 373 terror aktı törədib. Bu terror aktları 1568 nəfərin qətlə yetirilməsi və 1808 nəfərin yaralanması ilə nəticələnib. Təkcə Xocalıda törədilmiş soyqırımı aktı nəticəsində 613 nəfər həlak olub, 478 nəfər əlil olub, 1275 nəfər erməni əsirliyinin bütün dəhşətlərindən keçib, 8 ailə bütünlüklə məhv edilib, 56 nəfər xüsusi qəddarlıqla diri-diri yandırılıb, 150 nəfər isə itkin düşüb. Oxşar hadisələr eyni amansızlıqla Azərbaycanın digər işğal olunmuş rayonlarında da reallaşdırılıb. Eyni zamanda, Azərbaycan Respublikası və xarici ölkələrin məhkəmələri prosedur qaydada sübut edib ki, 373 terror aktından 32-si işğal olunmuş Azərbaycan torpaqlarından 100 kilometrlərlə uzaqlıqda törədilib.

Ermənistanın terrorçuluğunu sübut etmək üçün çoxsaylı tarixi məqamlar olsa da, son bir neçə gündə Azərbaycan əhalisində qorxu, çaşqınlıq hissi yaratmaq məqsədilə onların dinc əhalini və mülki infrastrukturu atəşə tutması coğrafiyasına nəzər yetirmək kifayət edər ki, erməni terrorizminin mahiyyəti və təhlükəliliyi barədə yetərincə təsəvvür yaransın. Çünki atəşə məruz qalan yaşayış məntəqələrimizin yaxınlığında Ordumuz tərəfindən hər hansı bir döyüş mövqeyinin seçilməməsi, həmin yaşayış məntəqələrimizin 90 faizinin döyüş zonasından yüz kilometrlərlə uzaq olması belə düşməni çirkin əməldən çəkindirmədi. Azərbaycan Respublikası Baş Prokurorluğunun məlumatına əsasən sentyabrın 27-dən bu günədək Ermənistan silahlı qüvvələri tərəfindən Azərbaycanın yaşayış məntəqələrinə ümumilikdə 27 mindən artıq artilleriya, 218 raket zərbəsi endirilib. Nəticədə 91 nəfər həlak olub, 396 nəfər yaralanıb, 2242 yaşayış evi, 92 çoxmənzilli yaşayış məntəqəsi və 423 mülki obyekt və 13 kommunal infrastruktura ziyan dəyib. Bütün bu faktları inkar etməklə yanaşı, Ermənistan tərəfi məqsədyönlü şəkildə öz ordusunun atəş mövqelərini yaşayış məntəqələrində, yaxud da onlara yaxın ərazilərdə yerləşdirməklə öz əhalisi arasında mülki insanların daha çox zərər çəkməsinə nail olmaq və bundan “Azərbaycan Ordusunun fəaliyyəti terrorçuların əməlləri ilə üst-üstə düşür” deyə öz təbliğat işində bəhrələnmək istəyir. Lakin Azərbaycan Ordusunun yüksək dəqiqliyə malik silahlardan nöqtə zərbələri endirməsi mülki erməni vətəndaşları arasında itkiləri minimuma endirdi. Bununla da Ermənistanın məkrli niyyətini boşa çıxdı, erməni təbliğatının bu istiqamətdə fəaliyyətini heçə endirdi. Hətta məlum oldu ki, Ermənistan-Azərbaycan dövlət sərhədinə yaxın ərazilərdə, hələ də işğal altında olan yaşayış məntəqələrimizdə yerləşdirilən erməni bölmələri müəyyən fasilələrlə həm ordumuzun mövqelərini, həm də məqsədli şəkildə Ermənistan ərazisindəki öz yaşayış məntəqələrini intensiv artilleriya atəşinə məruz qoyur, sonra isə tələm-tələsik videosüjetlər hazırlayaraq guya Azərbaycan Ordusunun mülki əhalini atəşə məruz qoyması barədə təxribat xarakterli yalan məlumatlar yayırlar. Burada da məqsəd eynidir. Hər vəchlə dəridən-qabıqdan çıxan, hətta ağlasığmaz təxribatlara əl atan ermənilər, Azərbaycan tərəfini Ermənistan ərazisini atəşə tutmaqda günahlandırmaq və dünya dövlətlərinin diqqətini regiona cəlb etmək.

Fikrimizcə, məqalədə sadalanan bu qədər fakt və arqumentlərdən sonra ermənilərin “Azərbaycan terrorçuları”, “Azərbaycan terroruna stop” deyərək bütün dünyada bar-bar bağırmaları və Azərbaycanı terrorda günahlandırmaları həyasızlıqdan başqa bir şey deyil. İkincisi, bütün dünya artıq nəzərə almalıdır ki, Ermənistanın yaratdığı və himayə etdiyi təşkilatların böyük bir qisminin nizamnaməsində ən əsas maddə terrorçuluqdur. Bu fakt nəzərə alınmasa, təəssüf hissi ilə bildiririk ki, gec-tez bir çox dünya ölkələri də ermənilərin belə məkrli, amansız, qanlı terror aktlarının ağrı-acısını dadacaqlar. Əgər dünya birliyi terrorizmlə mübarizəyə həqiqətən ədalətlə yanaşırsa, mütləq erməni terrorizminin yaratdığı təhdidləri və törədəcəyi fəsadları nəzərdən qaçırmamalıdır.