Folklor İnstitutunda TÜRKTAV-ın baş katibi ilə görüş olub
Bakı, 10 aprel, AZƏRTAC
AMEA Folklor İnstitutunun direktoru dosent Hikmət Quliyev Türk Tarix və Mədəniyyət Vəqfinin (TÜRKTAV) baş katibi Assel Lakhayeva ilə görüşüb.
İnstitutdan AZƏRTAC-a bildirilib ki, görüş zamanı Assel Lakhayeva Türkiyə Cümhuriyyətinin Mədəniyyət və Turizm Nazirliyi Müəllif Hüquqları Baş İdarəsinə təqdim etdiyi “100-cü ilində Bakı Türkoloji Qurultayı” layihəsi, eləcədə vəqfin həyata keçirdiyi beynəlxalq layihələr, kitab nəşrləri və təqdimatları barədə danışıb.
Hikmət Quliyev isə institutda Azərbaycan, eləcə də türk xalqları folklorunun öyrənilməsi istiqamətində aparılan tədqiqatlar, əldə olunan nailiyyətlər barədə məlumat verib, toplama və araşdırma işlərinin daha geniş yayılması məqsədilə TÜRKTAV-ın rəqəmsal platformalarına inteqrasiya haqqında fikirlərini bölüşüb.
Eyni zamanda, Folklor İnstitutu, Türkiyənin müvafiq qurumları və TÜRKTAV-ın dəstəyi ilə türkoloq alim Ettori Rossinin aşkar etdiyi “Dədə Qorqud” dastanının Vatikan nüsxəsi ilə bağlı keçiriləcək mədəni və elmi tədbirlərdə alimlərimizin təmsil olunması məsələsi, eləcə də folklorşünaslıq istiqamətində TÜRKTAV-ın institutda icra olunan layihələrə və gələcək tədbirlərə dəstəyi, kitab təqdimatları və sərgilərdə iştirakı ilə bağlı perspektivləri müzakirə olunub.
Görüşdə, həmçinin “Bir millət, iki dövlət” devizi altında həyata keçirilən elmi-ictimai tədbirlərdən danışılıb. Çox böyük coğrafiyada yaşayan türk xalqlarının uzun əsrlər boyu formalaşmış mədəni yaddaşının, zəngin irsinin qoruması məsələləri və bununla bağlı gələcək nəsillərə çatdırılacaq fəaliyyətlər müzakirə olunub, fikir mübadiləsi aparılıb.
Sonda qarşılıqlı kitab hədiyyələri təqdim olunub.
Görüşdə Folklor və yazılı ədəbiyyat şöbəsinin aparıcı elmi işçisi dosent Aynur İbrahimova da iştirak edib.
Bölmənin digər xəbərləri
