HOLLANDİYA JURNALİSTLƏR İTTİFAQININ ELEKTRON JURNALINDA AZƏRBAYCANLILARIN SOYQIRIMINA DAİR MƏQALƏ YERLƏŞDİRİLMİŞDİR
Paris, 7 aprel (AZƏRTAC). Hollandiyada fəaliyyət göstərən Benilüks Azərbaycanlıları Konqresinin mətbuat xidmətindən bildirmişlər ki, ölkənin jurnalistlər ittifaqının elektron jurnalında azərbaycanlıların soyqırımı ilə bağlı məqalə verilmişdir. Məqalənin müəllifi Hollandyada yaşayan soydaşımız jurnalist Elnaz Əsədovadır.
Müəllif hər il 31 martın azərbaycanlıların soyqırımı günü kimi qeyd edildiyini, özlərini dünyaya “məzlum və köməksiz” xalq kimi qələmə verməyə adət etmiş ermənilərin Azərbaycan xalqına qarşı bir neçə dəfə soqırımı törətdiyini, xalqımızın qəddar düşməni Stepan Şaumyanın əmri ilə təpədən-dırnağadək silahlanmış 6 min hərbçi və 3 mindən artıq mülki erməninin “inqilabı düşmənlərdən təmizləmək” adı altında günahsız azərbaycanlıları qətlə yetirdiyini diqqətə çatdırmışdır. Bu qanlı faciə zamanı təkcə Bakıda 25 min azərbaycanlının məhv edilməsi faktı məqalədə öz əksini tapmışdır.
Tarixdə bu hadisələrin daha çox “erməni-müsəlman müharibəsi” kimi anıldığını qeyd etmiş müəllif, ermənilərin azərbaycanlılara qarşı törətdikləri cinayətlərin vaxtilə Bakıda yaşamış Leonard Ramsden Hertill və Nobel qardaşlarının xatirələrində yer aldığını bildirmişdir. Onların xatirələrində ermənilərin Bakı ilə yanaşı, Şamaxı, Quba, Zəngəzur, Naxçıvan və Qarabağ bölgələrində azərbaycanlılara qarşı törətdikləri vəhşiliklər, hətta kiçik yaşlı uşaqlara, qadınlara və qocalara belə aman vermədikləri öz əksini tapmışdır.
Müəllif 31 mart - Azərbaycanlıların soyqırımı günü ilə əlaqədar anma mərasiminin Avropanın bir çox ölkəsində, o cümlədən Hollandiyada geniş şəkildə qeyd edildiyindən, belə tədbirlərin ermənilərin əsl simasını açıb avropalılara göstərməkdə mühüm rol oynadığından söhbət açmış, azərbaycanlıların soyqımı ilə bağlı martın 29-da Rotterdam şəhərində soydaşlarımızın keçirdikləri etiraz nümayişi barədə ətraflı məlumat vermişdir.
Məqalədə nümayişdə iştirak etmiş ruandalı tələbənin soyqırımın hansı ölkədə baş verməsindən asılı olmayaraq, etnik fərqliklər səbəbindən törədilən və dinc əhaliyə qaşı tutulan divana görə belə aksiyada iştirak etdiyi və heç kimin bir dəfə həyat verilmiş insana qarşı vəhşilik törətməyə haqqı olmadığı fikri xüsusi diqqətə çatdırılmışdır.
Sonda müəllif keçən əsrin başlanğıcında ermənilərin azərbaycanlılara qarşı törətdikləri soyqırımı barədə Qurban Səidin “Əli və Nino”, Ümbülbanu Əsədullayevanın (Baninin) “Mənim Qafqaz günlərim” əsərlərində bəhs edildiyini xatırlatmışdır.
Elektron jurnalda məqalə ilə yanaşı Rotterdamda keçirilmiş nümayişdən çəkilmiş fotolar da verilmişdir.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
