Hollandiyada ermənilərin növbəti təxribatlarının qarşısı alınmışdır
Paris, 29 oktyabr ( AZƏRTAC ). Ermənilərin Niderland Krallığında qondarma “Dağlıq Qarabağ Respublikası” ilə bağlı növbəti təxribatı soydaşlarımızın işə qarışması nəticəsində baş tutmamışdır.
Benilüks Azərbaycanlıları Konqresinin (BAK) mətbuat xidmətindən bildirmişlər ki, BAK-ın üzvləri tərəfindən paytaxtın mərkəzi Vaterloo meydanı yaxınlığındakı supermarketlərin birində üzərində “Artsakh Fruit” sözləri yazılmış qida məhsullarıi aşkar edilmişdir. Onlar bu məhsulların mağazadan yığışdırılmasını müdiriyyətdən tələb etmişlər.
BAK-ın apardığı araşdırmalar nəticəsində aydın olmuşdur ki, “Artsakh Fruit” adı ilə satışa buraxılmış qida məhsullarını Niderland Krallığının “Hayfood“ şirkəti idxal edir.
“Artsakh Fruit” şirkətinin 2007-ci ildə Xankəndidə yaradıldığı, əsasən meyvə və tərəvəz məhsulları istehsal etdiyi, “Hayfood”un beynəlxlaq normaları pozaraq bu məhsulları Ermənistandan deyil, bilavasitə Azərbaycanın əzəl torpağı olan Dağlıq Qarabağdan Avropa İttifaqı ölkələrinə qaçaqmal yolu ilə gətirdiyi müəyyənləşdirilmişdir.
BAK Niderland və qonşu Belçika krallıqlarının ərazilərində yerləşən və əsasən keçmiş SSRİ məkanında istehsal olunan məhsulları satan mağaza və marketləri ciddi nəzarətdə saxlamağa başlamış, faktla bağlı yerli şöbələrinə, o cümlədən Azərbaycanın Niderland Krallığındakı səfirliyinə məlumat vermişdir. Səfirlik isə öz növbəsində ermənilərin yolverilməz hərəkətləri haqda ölkənin Xarici İşlər Nazirliyinə öz etirazını bildrimişdir.
BAK Ermənistan- Azərbaycan, Dağlıq Qarabağ münaqişəsi, ölkəmizlə bağlı həqiqətlər, qondarma “Dağlıq Qarabağ Respublikası”nın heç bir dövlət və beynəlxlaq qurum tərəfindən tanınmaması və Hollandiyanın ermənilərin toruna düşmüş “Hayfood” şirkətinin beynəlxlaq hüquq normalarını kobud şəkildə pozması barədə Krallığın nüfuzlu “Shop Keurmerk” qəzetinə, “Kassa Vara” və “Tros Radar” televiziya kanallarına rəsmi məktubla müraciət etmişlər.
Səfirliyin və BAK-ın məsələyə müdaxiləsi nəticəsində “Artsakh Fruit” adlı məhsullar satışdan çıxarılmışdır.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
