İDMAN
İstək olarsa, hər şey mümkündür
Bakı, 24 may, AZƏRTAC
Son günlər kütləvi informasiya vasitələrində Avropa Liqasının final görüşünə - “Arsenal” və “Çelsi” futbol komandalarının Bakıda keçiriləcək qarşılaşmasına böyük diqqət ayrılır.
Ukraynanın “FOOTBOOM” portalı da bu gün digərlərindən geri qalmayaraq qarşıdakı futbol “savaşı” barədə material yerləşdirib.
Materialda qeyd edilir ki, İngiltərə KİV-ləri, azarkeşlər və hətta klubların nümayəndələri Avrokubokun finalının Bakı kimi şəhərlərdə keçirilməsi haqqında “oraya uçmaq uzaqdır”, “qalmaq üçün qiymətlər ağlasığmaz dərəcədə yüksəkdir” kimi sərt fikirlərini bildiriblər. Guya zavallı britaniyalıların cüzi əməkhaqları onların Azərbaycana uçaraq orada komandalarını dəstəkləmələrinə imkan vermir. Əlbəttə, Bakı Madrid deyil, Bakıda yaşayış üçün variant daha azdır. Lakin qiymətlər Avropa Liqasının finalının keçiriləcəyi dövrə tam uyğundur.
“Londondan (hər iki komanda məhz bu şəhərdəndir) Bakıya uçmaq həqiqətən də uzaqdır. Lakin nə etməli? Məgər Avrokubokun bütün oyunları ingilislər üçün rahat olan şəhərlərdə keçirilməlidirmi? Nəhayət, hər zaman birləşmək və ya klubdan azarkeşlər üçün çarter reysləri təşkil olunmasını xahiş etmək mümkündür”, - deyə məqalənin müəllifləri tamamilə məntiqlə qeyd edirlər.
Məqalədə Bakıya necə getmək, harada qalmaq və s. barədə ətraflı danışılır. Müəlliflər məqalənin sonunda yazırlar: “Biz sizinlə görürük ki, hər şey britaniyalıların yazdığı dərəcədə pis deyil. Britaniya azarkeşlərini nəzərə alsaq, yeganə problem Londondan Bakıya olan narahat marşrutdur. Lakin bu işlə bağlı UEFA təşkilatçılığa kömək etməyə söz verib. Elə “Arsenal” və “Çelsi”nin digər ölkələrdən olan fanatlarının Bakıya gəlmələri üçün də müxtəlif variantlar tapmaq mümkündür. İstək olarsa, hər şey mümkündür. Maraqlıdır ki, ingilislərin Formula 1 yarışlarına səfərlərində buna bənzər çətinliklər onların qarşısını kəsmir. Bu səbəbdən Avropa Liqası finalının keçiriləcəyi yer üçün qaldırılan səs-küy hansısa həllolunmaz problem deyil, əksinə daha çox mübaliğədir”.