SİYASƏT
İsveç Azərbaycanlıları Konqresi YUNESKO-nun baş katibinə məktub göndərmişdir
Bakı, 13 noyabr (AZƏRTAC). İsveç Azərbaycanlıları Konqresi (İAK) YUNESKO-nun baş katibi İrina Bokovaya etiraz məktubu göndərmişdir. Buna səbəb YUNESKO-nun noyabrın 15-19-da Keniyada keçiriləcək 5-ci sessiyasında “Armenian cross-stones” (“Erməni xaçkarlar”) adlı məqalənin müzakirəsinin nəzərdə tutulmasıdır.
Diasporla İş üzrə Dövlət Komitəsinin mətbuat xidmətindən AZƏRTAC-a bildirmişlər ki, belə bir məqalənin sessiyada müzakirəyə çıxarılacağı barədə qurumun internet saytında məlumat yerləşdirilmişdir.
İsveçdə yaşayan azərbaycanlıları ətrafında birləşdirən İAK sözügedən məqalənin saxta faktlar əsasında hazırlandığını xanım İ.Bokovanın diqqətinə çatdırmışdır.
Məktubda deyilir ki, “Armenian cross-stones” (“Erməni xaçkarlar”) məqaləsinin müəllifləri Qafqaz Albaniyası dövründən qalan qədim Azərbaycan abidələrinin yaranma tarixlərini saxtalaşdırmışlar. Bu isə Ermənistanın Azərbaycanın tarixi abidələrini özününküləşdirməsi, eyni zamanda, xalqımızın mədəni və tarixi irsinin bir hissəsindən məhrum edilməsi deməkdir.
Məktub müəllifləri yazırlar ki, məqalədə “Ermənistan tarixində xaçkarların müxtəlif dövrlər keçməsi - inkişafdan durğunluğa doğru (işğal dövrlərində), unudulması (Sovet ateizmi dövründə) və məhv edilməsi (hərbi münaqişə nəticəsində)” kimi iddialar xüsusən məyusedici və təəssüfləndiricidir. Biz hesab edirik ki, bu cür iddialarla dolu məqalənin müzakirəyə çıxarılması Ermənistan-Azərbaycan, Dağlıq Qarabağ münaqişəsi və onun həlli ilə bağlı YUNESKO-nun bəyan etdiyi mövqeyinə ziddir” deyə İsveçdəki soydaşlarımız bildirirlər.
Məktubda daha sonra deyilir: “Nor-Jugha xaçkarların məhvi…”, “xaçkarlar “erməni soyqırımı” qurbanlarına həsr edilərək…”, “Arsax hərəkatının döyüşçülərinə həsr edilərək…”, “Almaniya, Fransa, Livan, Dağlıq Qarabağ və Ermənistanda parklarda, kilsələrdə və məzarlıqlarda ucaldılmışdır” kimi ağlasığmaz ifadələr və iddialar məqalənin mahiyyətini, saxtakarlıqlara əsaslandığını bildirən digər nümunələrdir. Azərbaycanın ayrılmaz hissəsi olan Dağlıq Qarabağın müstəqil dövlətlər arasında göstərilməsi isə xüsusilə yolverilməzdir və bütün beynəlxalq hüquq normalarının kobudcasına pozulması deməkdir.
İsveçdəki soydaşlarımız yazırlar ki, Azərbaycan torpaqlarının 20 faizini Ermənistanın işğal etməsi və nəticədə Azərbaycanın tarixi abidələrinin vəhşicəsinə dağıdılması məlum faktdır. Ermənilər Qafqaz Albaniyası dövründən qalmış qədim Azərbaycan abidələrinin bir qismini məhv edib, bir qismini isə özününküləşdirmişlər. Ermənilərin Nor-Jugha adlandırdığı Culfa adlı Azərbaycan ərazisində hər hansı erməni tarixi və ya mədəni abidəsi olmamışdır. Həmin ərazidə yerləşən daş abidələr isə Azərbaycan xalqının əcdadları olan albaniyalılara məxsusdur. Bununla yanaşı, “Erməni xaçkarları” məqaləsinin sessiyada müzakirə üçün təsdiq olunması Cənubi Qafqazın bütün xalqlarının tarixi həqiqətlərinin saxtalaşdırılmasına göz yummağa bərabərdir. Bu cür saxta məqalələr regionda yaşayan xalqlar arasında dözümsüzlüyə gətirir və xalqlararası dialoq və əməkdaşlığa təhlükə yaradır.
İsveç Azərbaycanlıları Konqresinin YUNESKO-nun baş katibinə etiraz müraciəti bu fikirlərlə bitir: “Sizdən xahiş edirik ki, 2010-cu il noyabrın 15-dən 19-dək keçiriləcək sessiyada “Armenian cross-stones” (“Erməni xaçkarlar”) məqaləsinin müzakirə olunmaması üçün səylərinizi əsirgəməyəsiniz. Biz ümid edirik ki, bundan sonra sizin rəhbərlik etdiyiniz təşkilatda Azərbaycana qarşı yönəlmiş hər hansı məsələnin qaldırılmasına və müzakirəsinə imkan verməyəcəksiniz”.