İtaliya A Seriyası: Milan derbisində qalib müəyyənləşməyib
Bakı, 8 noyabr, Nicat Məmmədov, AZƏRTAC
Noyabrın 7-də futbol üzrə İtaliya A Seriyasında 12-ci turun mərkəzi qarşılaşması keçirilib.
AZƏRTAC xəbər verir ki, görüşdə iki Milan təmsilçisi - "Milan" və "İnter" komandaları üz-üzə gəliblər.
Gərgin keçən qarşılaşmanın ilk dəqiqələrində daha inamlı oyun sərgiləyən "Milan" olsa da, hesabı 11-ci dəqiqədə qonaqlar açıb.
Oyunun baş hakimi Daniel Daveri "Milan"nın qapısına təyin etdiyi penaltini Hakan Çalxanoğlu dəqiq yerinə yetirib - 0:1.
Qoldan sonra hücuma atılan "Milan" altı dəqiqə sonra hesaba tarazlıq gətirib. Sandro Tonallinin cərimə meydançasına ötürdüyü topu "İnter" komandasının müdafiəçisi Stefan de Vrij öz qapısına vurub - 1:1.
Qarşılaşmanın 27-ci dəqiqəsində hakim yenidən "Milan"nın qapısına 11 metrlik cərimə zərbəsi təyin edib. Budəfəki cərimə zərbəsini meydan sahiblərinin qapıçısı Kiprian Tataruşanu dəf edə bilib. Penaltini Lautaro Martines vura bilməyib.
Birinci hissənin sonlarında "İnter" real qol şansı əldə eləsə də "Milan"nın müdafiəçisi Pyer Kalulu son anda komandasını xilas edib.
Fasilədən sonra hər iki komandanın qol vurmaq şansı olsa da hesab dəyişilməyib.
Bu nəticədən sonra xal ehtiyatını 32-yə çatdıran "Milan" liderliyini davam edir. "İnter" isə 25 xalla üçüncü yerdə qərarlaşıb.
Bölmənin digər xəbərləri
