Leonid Kuçma: Heydər Əliyevin Azərbaycan dövləti və xalqı qarşısında xidmətləri böyükdür
Kiyev, 27 noyabr, AZƏRTAC
Azərbaycanın Ukraynadakı səfiri Eynulla Mədətli bu ölkənin keçmiş Prezidenti Leonid Kuçma ilə görüşüb. Səfir britaniyalı yazıçı Graeme Vilsonun müəllifi olduğu “Heydər Əliyev və Azərbaycanın yüksəlişi, enişi və yenidən dirçəlişi” kitabını sabiq Prezidentə təqdim edib.
Müəllif kitabda Ukraynanın keçmiş prezidentləri Leonid Kravçuk və Leonid Kuçma ilə görüşü və onlardan aldığı müsahibələrdən də istifadə edib. Kitabda Ukraynanın keçmiş prezidentlərinin Heydər Əliyevin uca şəxsiyyəti, çətin illərdə Azərbaycan dövlətçiliyini xilas etməsi, daxili və xarici siyasətin möhkəm təməlini yaratması ilə bağlı fikirlərinə geniş yer verilib.
Eynulla Mədətli Leonid Kuçmaya Azərbaycan və ümummilli lider Heydər Əliyev haqqındakı dəyərli fikirlərinə görə təşəkkür edib.
Görüşdə diplomat Azərbaycanın görkəmli yazıçıları Mir Cəlalın və Mirzə Fətəli Axundzadənin səfirlik tərəfindən Ukrayna dilinə tərcümə və nəşr etdirilmiş kitablarını Leonid Kuçma Fonduna hədiyyə edib.
Söhbət zamanı Leonid Kuçma bir daha Heydər Əliyevin Azərbaycan dövləti və xalqı qarşısında böyük xidmətlərinin olduğunu, onun siyasətinin hazırda Prezident İlham Əliyev tərəfindən uğurla davam etdirildiyini vurğulayıb.
Səfir ölkəmizdə Prezident İlham Əliyevin rəhbərliyi ilə aparılan quruculuq işləri, regionda həyata keçirilən irimiqyaslı layihələr barədə Ukraynanın keçmiş Prezidentinə ətraflı məlumat verib, Azərbaycan-Ukrayna münasibətlərinə dair fikir mübadiləsi aparılıb.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
