CƏMİYYƏT
“Lissabon 5” – “anım”, yoxsa həyasızlıq mərasimi?
![“Lissabon 5” – “anım”, yoxsa həyasızlıq mərasimi?](/files/2023/2/1200x630/16903934251692611575_1200x630.jpeg)
Bakı, 26 iyul, AZƏRTAC
Beynəlxalq miqyasda insanlığa düşmən kəsilən erməni terroru bütövlükdə bəşəriyyət tarixi üçün qara ləkədir. Daha çox türk millətinə qənim kəsilən erməni terror təşkilatlarının həyata keçirdikləri qanlı aksiyaları xatırladıqda, damarda qan donur, insanlıq utanır. Xüsusi qəddarlıqla həyata keçirilən aksiyaların ünvanı və hədəfi bəllidir: Böyük türk əzmini sarsıtmaq, bu xalqın soyunu kəsmək.
Bu fikirləri AZƏRTAC-a açıqlamasında Milli Məclisin deputatı, Yeni Azərbaycan Partiyası İdarə Heyətinin üzvü Rəşad Mahmudov söyləyib.
Deputat qeyd edib ki, 40 il bundan əvvəl - 1983-cü il iyulun 27-də bir qrup erməni terrorçusu Lissabondakı Türkiyə səfirliyinə daxil olaraq, qardaş ölkənin müvəqqəti işlər vəkilinin xanımı Cahidə Mıhıçoğlunu və 17 yaşlı oğlu Atasayı girov götürüblər. Portuqaliya hökumətinin səylərinə baxmayaraq, terrorçular diplomatın xanımını və bir yerli polisi qətlə yetirərək, özləri ilə bərabər binanı partladıblar. O zaman bütün insanlıq və diplomatik normaları ayaq altına atan bu hadisəyə ABŞ Prezidenti Ronald Reyqan da münasibət bildirmişdi. Terrorçuların xanımı qətlə yetirmələrindən xüsusilə təsirlənən ABŞ Prezidenti rəsmi açıqlamasında “Biz digər ölkələrin hökumətləri ilə birgə çalışaraq buna birdəfəlik son qoyacağıq” - deyə qeyd etmişdi. ABŞ Milli Təhlükəsizlik Şurasının üzvü Oliver North terrorçuların neytrallaşdırılmasına yönəlmiş Milli Təhlükəsizlik Qərarları Direktivi (MTQD) hazırlanıb. 138 nömrəli həmin sənəd ABŞ-ın özünü terrorçulardan qorumaq hüququnu ehtiva edir.
R.Mahmudov bildirib ki, bu tarix ərəfəsində erməni cəmiyyətində terrorçuların uydurma qəhrəman kimi təqdim olunması haradasa başa düşüləndir. Onsuz bu toplumun nə öz xalqı, nə də bəşəriyyət üçün nümunə olacaq qəhrəmanlıq tarixi zatən yoxdur: “Məsələ burasındadır ki, bütün dünyanın qəti şəkildə pislədiyi, sərt reaksiya verdiyi həmin hadisəni ermənilərin öz milli mahiyyətinə və xislətlərinə uyğun anım günü kimi qeyd etmələri, terrorçulara matəm saxlamaları və ən dəhşətlisi buna insan haqlarının müdafiəçisi kimi ağzı köpüklənə-köpüklənə danışan dövlətlərin göz yumması həyasızlığın son həddidir. Həmin qanlı terrordan sonra hər il iyulun 27-si tarixi Ermənistan ictimaiyyəti tərəfindən “Lissabon 5” adlı anım mərasimi keçirilir və bu, əlbəttə mənəviyyatsızlıqdan başqa bir şey deyil. Təkcə bu fakt erməni xalqının və dövlətinin hansı ideologiyaya xidmət etdiyini aydın şəkildə göstərir. Bu gün özlərini guya, “əzilmiş”, “zülmə məruz qalmış”, “əzabkeş” kimi təqdim edən ermənilər bununla da hansı əməlin sahibi olduqlarını və hansı ideologiyaya xidmət etdiklərini ortaya qoyur. Digər təəssüf doğuran fakt isə ondan ibarətdir ki, “Lissabon 5” adlı qondarma anım tədbirləri Amerika Birləşmiş Ştatları, Fransa, Livan erməniləri tərəfindən də qeyd olunur və həmin dövlətlərdə buna rəsmi qadağa qoyulmur. Halbuki belə hallarda dövlətlər ölkədə həyata keçirilən aksiyaların mahiyyətini öyrənərək buna uyğun addımlar atır. Amma təəssüf ki, bəzi dövlətləri öz təsiri altına alan erməni lobbisinin bu məsələdə də öz məqsədinə çatdığının şahidi olmuşuq”.
Deputat əlavə edib ki, qondarma anım tədbirində xüsusi diqqət yetirilməli digər məqam isə erməni dövlətini və lobbisini əlində saxlayan, gerçəkdə iblis və şər yuvası olan Qriqoryan kilsəsinin mövqeyidir. Erməni ruhaniləri ədaləti, həqiqəti bir yana qoyub terror qurbanlarına deyil, dinc insanları hədəf götürənlərə rekviyemlər söyləyirlər.
Deputat sonda qeyd edib ki, insanlığı ədalətə və sülhə səsləməli olan bir dini cərəyanın terror aktını bu şəkildə təqdim etməsi erməni adına olan hər şeyin- xalqın, dövlətin, kilsənin tam mahiyyəti ilə bəşəriyyətə təhlükə olduğunu sübut edir. İllərlə Azərbaycanın haqqını görməzdən gələn, Xocalı qətliamına susan, qondarma erməni soyqırımını əlində bayraq edən dünya bu faktı qətiyyən unutmamalıdır: “Şübhəsiz ki, ikili münasibətlərin məntiqi nəticəsi olaraq zaman-zaman erməni terroruna geniş meydan verilib. Məhz erməni terrorunun qlobal miqyas alması bu səbəbdən daha da azğınlaşıb.
Amma artıq erməni vandalizminə qarşı bölgədə qüdrətli güc və Dəmir Yumruq var. Artıq dünya üçün erməni təhlükəsini əbədi məhv edən Azərbaycan dövləti var”.