Litvanın ümumtəhsil məktəblərində Azərbaycan mövzusunda keçirilmiş müsabiqə başa çatmışdır
Bakı, 24 dekabr (AZƏRTAC). Vilnüsün M.K.Çürlyönis adına Milli incəsənət məktəbinin konsert zalında Litva məktəbliləri arasında keçirilmiş “Azərbaycan mənim gözlərimlə” beynəlxalq müsabiqə başa çatmışdır. Bununla əlaqədar keçirilmiş tədbirdə Azərbaycanın Litvadakı səfiri Nairə Şahtaxtinskaya, Türkiyə səfirliyinin 1-ci katibi Şayda Hanbay, Litvanın təhsil və elm naziri Gintaras Stəponaviçyus, Litva Seyminin, Mədəniyyət Nazirliyinin, Azərbaycan Respublikasının Diasporla İş üzrə Dövlət Komitəsinin (DİDK), Estoniya-Azərbaycan Mədəniyyət Mərkəzinin, Latviya azərbaycanlılarının “Ocaq” cəmiyyətinin, milli azlıqların nümayəndələri iştirak etmişlər.
DİDK-in mətbuat xidmətindən AZƏRTAC-a bildirmişlər ki, müsabiqəni Litva Azərbaycanlıları Cəmiyyəti bu ölkənin Təhsil və Elm Nazirliyi, Litva Milli İcmalar Evi və Litva gənclərinin turizm mərkəzi ilə birgə təşkil etmişdir.
DİDK-in maliyyə dəstəyi ilə reallaşdırılan müsabiqənin məqsədi litvalı məktəblilərdə Azərbaycanın keçmişinə, dövlətçilik tarixinə, mədəni irsinə, coğrafiyasına, təbiətinə maraq oyatmaq, informasiya texnologiyalarından istifadə etməklə onlara ölkəmizlə bağlı fikir və düşüncələrini yaradıcı surətdə təqdim etmələrinə imkan yaratmaqdır.
“Litva-Azərbaycan mədəniyyətlərarası dialoqu” layihəsi çərçivəsində keçirilmiş müsabiqədə Litvanın 119 təhsil müəssisəsində 7-12-ci siniflərində, milli azlıqların 16 ümumtəhsil məktəbində oxuyan 526 şagird iştirak etmişdir.
Müsabiqəyə hər biri 15 slayddan ibarət olmaqla 375 iş təqdim olunmuşdur. Bu işlər arasında əsasən Azərbaycanın dövlətçilik tarixi, dövlət rəmzləri, siyasi sistemi, milli ordusu, coğrafiyası, təbiəti, rəvayət, dastan və hekayətləri, dili, yazılı ədəbiyyatı, mədəniyyəti, musiqisi, milli mətbəxi, xalq geyimləri, adət-ənənələri, idmanı, dünya sivilizasiyası xəzinəsinə töhfələr vermiş görkəmli xadimləri, Dağlıq Qarabağ münaqişəsi, 20 Yanvar faciəsi, Xocalı soyqırımı, müasir dünya ölkələri sırasında yeri və rolu, Litva-Azərbaycan ictimai-tarixi və mədəni əlaqələri, dövlətlərarası münasibətləri və s. materiallar vardır.
Münsiflər heyəti müsabiqə işlərini dəyərləndirərkən Azərbaycana məxsus və bənzəri olmayan xüsusiyyətlərin geniş açılmasına, bədiiliyə, orijinallığa, sərbəst yaradıcılıq məharətinə, informasiya texnologiyalarının yaratdığı imkanlardan istifadə etmək bacarığına daha çox diqqət yetirmişdir.
Komissiya 10 nominasiya üzrə müsabiqənin laureatlarını təyin etmişdir. Nəticələrə görə, 30 şagird birinci, ikinci və üçüncü yerlərə layiq görülmüşdür. Müsabiqənin yekun tədbirində iştirak etmiş bütün şagird və müəllimlərə xatirə hədiyyələri, Təhsil və Elm Nazirliyinin fəxri fərmanları, Litva gəncləri turizm mərkəzinin təşəkkür məktubları, DİDK-in xüsusi hədiyyələri verilmişdir.
Kaunasın Vayjgantas adına orta məktəbin şagirdləri Yurgita Milyauskayte və Ayste Makarovaya Xocalı faciəsi mövzusunda yaratdıqları ən uğurlu işə görə Azərbaycanın Litvadakı səfirliyinin xüsusi hədiyyələri təqdim olunmuşdur.
Təhsil və elm naziri Gintaras Stəponaviçyus müsabiqəyə ən çox iş göndərmiş məktəblərə nazirliyin təsis etdiyi hədiyyələri təqdim etmişdir.
Litva pedaqoji ictimaiyyətinin təmsilçiləri müsabiqənin uğurlu təşkil edildiyini və çoxlu şagirdin müsabiqəyə qatılmasının müsbət hal olduğunu xüsusilə vurğulamışlar.
Litva Azərbaycanlıları Cəmiyyətinin sədri Mahir Həmzəyev bildirmişdir ki, cəmiyyət Azərbaycan barədə geniş bilgilərin təbliğinə xidmət edən bu müsabiqəni keçirməkdə məqsəd, tarixi Vətənimiz barədə məlumatların litvalı şagirdlərə əyani şəkildə çatdırmaq, milli mənəvi dəyərlərimiz və Azərbaycan haqqında digər obyektiv məlumatları Litvanın ümumtəhsil ocaqlarında yaymaq, Litvada Azərbaycana dost münasibət bəsləyən gənc nəsil nümayəndələrinin dairəsini genişləndirmək və möhkəmləndirməkdir.
Müsabiqənin nəticələrinə həsr olunmuş tədbirdən sonra Azərbaycan musiqisi və rəqslərindən ibarət geniş konsert proqramı təqdim olunmuşdur. Tallindən gəlmiş milli rəqs qrupunu ifası böyük maraqla qarşılanmışdır.
Müsabiqə haqqında müvafiq məlumat və videoreportajlar Litva kütləvi informasiya vasitələrində geniş işıqlandırılmışdır.
Müsabiqənun yekunları haqqında videoreportajların bəzilərini http://news.penki.lt/Video/Video.aspx?ReportID=8076&ObjectID=226842, http://www.videopasaulis.lt/video/32598/-azerbaidzanas-mano-akimis.html, http://slaptai.lt/nufilmuotas-pokalbis/3826-legenda-apie-azerbaidzana.html linklərində izləmək mümkündür.
######
 |
 |
Bölmənin digər xəbərləri
