İDMAN
Londonda “Çelsi” və “Arsenal”ın açıq məşqləri başa çatıb
Bakı, 24 may, AZƏRTAC
Avropa Liqasının Bakıda keçiriləcək final oyununda qarşılaşacaq “Çelsi” və “Arsenal” komandalarının açıq məşqləri başa çatıb. Hər iki klub yüksək enerji və motivasiyaya malikdir.
AZƏRTAC xəbər verir ki, “Çelsi”nin məşqçisi Maurisio Sarri komandanın oyundan əvvəl ajiotaj yaşadığını bildirir. İtaliyalı mütəxəssisin fikrincə, mayın 29-da keçiriləcək oyunun çox maraqlı olacağı gözlənilir.
O deyib: “Hər birimiz Bakıdakı finala yüksək səviyyədə hazırlaşmalıyıq. “Arsenal” həm Premyer Liqada, həm də UEFA Avropa Liqasında güclü komandadır. Fikrimcə, biz də onlardan geri qalmırıq. “Çelsi” hazırkı mövsümdə bu titulu udmağa layiqdir. “Çelsi” artıq Çempionlar Liqasına keçib, “Arsenal” isə əsas Avrokuboka düşmək üçün Avropa Liqasını qazanmalıdır. Bu səbəbdən kimsə deyə bilər ki, bizim motivasiyamız azdır, lakin “Arsenal” daha çox təzyiq hiss edəcək. Biz Çempionlar Liqasına Premyer Liqa vasitəsilə düşmək və hansısa qənimət əldə etmək istərdik. Final bizim üçün çox mühümdür. Mənə elə gəlir ki, “Çelsi” bu mövsümdə əsas mükafata layiqdir”.
“Çelsi”də bu ilin onlar üçün uğurlu olmasına şübhə etmirlər. Lakin bir mükafatın iki sahibi olması mümkün deyil.
“Çelsi”nin müdafiəçisi David Luis deyir: “Əsas mükafatı qazanmaq həm bizdə, həm də “Arsenal”da əla motivasiya yaradır. Əgər sən iri klubu təmsil edirsənsə, təzyiqdən heç yerə qaçmaq mümkün deyil. “Çelsi” həqiqətən möhtəşəm komandadır və o, təzyiq hiss edir. “Arsenal” da möhtəşəmdir və o da təzyiq hiss edir. Bizim bu titulu qazanmağa şansımız var”.
David Luis vaxtilə onun komanda yoldaşı olmuş, hazırda Bakı finalında ona qarşı oynayacaq Petr Çex barədə də danışıb: “Petr Çex çox yaxşı insandır, mənim nə vaxtsa oynadığım ən yaxşı futbolçudur. O, fantastik dərəcədə peşəkardır, “Çelsi”də onunla oynamaq adama ləzzət verirdi, çox gözəl vaxtlar idi! O, karyerası ərzində iki Avrokubok qazanıb. Mən ona gələcəkdə müvəffəqiyyətlər, karyerasında və həyatında uğurlar arzulayıram. O, buna layiqdir. Lakin bu arzular qarşıdakı matça aid deyil!”
“Çelsi”nin kapitanı Sesar Aspilikueta:
“Biz mövsümə əla başladıq, Premyer Liqada lider olduq, Liqa Kubokunun finalına çıxaraq səfər oyununda “Liverpul”a qalib gəldik. Bununla da, bu mövsümdə “Anfield” stadionunda onlara qalib gələn yeganə komanda olduq. Biz “Tottenhem”i məğlub etdik, lakin finalda bəxtimiz gətirmədi. Biz Avropa Liqasında bir çox komandaların finala çıxa bilməməsini gördük. İndi mən Bakıda əsas mükafatı qazanmaqla mövsümü inamlı notlarla başa vurmaq istərdim”.
“Çelsi”nin hücumçusu Villian:
“Biz yalnız finalı düşünməliyik. Qələbə bizim klubumuzu məşhur edəcək. Biz əsas mükafatı qazanmağa çalışmalıyıq. Bu mövsüm mənim karyeramda ən yaxşı olmasa da, bütövlükdə hər şey normaldır. Əlbəttə, mən daha yaxşı oynaya bilərəm. Bakıdakı finalda qələbə hər birimiz üçün xoş olardı”.
“Arsenal”ın baş məşqçisi Unay Emeri:
“Titulu qazanmaq çox çətindir. Biz bu turnirdə əla işlədik, ondan həzz aldıq. Düzdür, “Napoli” və “Valensiya”ya qarşı oyunlar həqiqətən də çətin idi. “Çelsi”, həmçinin möhtəşəm konsentrasiya və motivasiya nümayiş etdirdi. Fikrimcə, bu əsas mükafat hər iki komanda üçün əhəmiyyətlidir”.
Biz bu oyuna məhz milli yığma matçlarında fasilələr olduğu zamandakı kimi hazırlaşırıq. Turnirə 30 futbolçu cəlb etmişik. Bizimlə gənclər oynayır. Onlar bizim futbola öyrəşmək və liderlərlə oynamaq üçün əminlik və ritmi hiss etməlidirlər. Bu turnir onlar üçün ciddi sınaq və böyük fürsət olacaq. İndi onlar daha güclü olmaq və təcrübə qazanmaq üçün bizimlə məşğul olurlar”.
“Arsenal”ın kapitanı Loran Kosyelni:
“Bizim Premyer Liqadakı sonuncu oyunumuzla final arasında kifayət qədər böyük vaxt var, buna görə də hazırlıqlı qalmalı və güclü məşq etməliyik. Bizim yoldaşlıq matçımız olub, indi isə biz daha çox fiziki formaya fikir verir, final üçün taktika və plan üzərində işləyirik. İndi biz bütün fikrimizi oyun üzərində cəmləşdirmişik”.