MASALLIDA ÖTƏN İLİN YEKUNLARI VƏ QARŞIDA DURAN VƏZİFƏLƏR MÜZAKİRƏ EDİLMİŞDİR
AZƏRTAC xəbər verir ki, martın 3-də Masallı Rayon İcra Hakimiyyətində 2006-cı ilin sosial-iqtisadi inkişafının yekunlarına və 2007-ci ildə qarşıda duran vəzifələrə həsr olunmuş yığıncaq keçirilmişdir. Prezidentin İcra Aparatının regional idarəetmə və yerli özünüidarəetmə orqanları ilə iş şöbəsinin müdiri Zeynal Nağdəliyev və yığıncağın iştirakçıları əvvəlcə Masallı şəhərinin mərkəzindəki Heydər Əliyev parkına gələrək ümummilli liderimizin xatirəsini ehtiramla anmış, abidəsi önünə gül dəstələri düzmüşlər.
Sonra yığıncaq öz işini davam etdirmişdir. Rayon icra hakimiyyətinin başçısı Qəzənfər Ağayev ötən ilin yekunlarına və qarşıda duran vəzifələrə dair hesabat məruzəsi ilə çıxış etmişdir.
Ümummilli liderimiz Heydər Əliyevin siyasi xəttini uğurla davam etdirən Azərbaycan Prezidenti İlham Əliyevin rəhbərliyi ilə ölkəmizin sosial-iqtisadi inkişaf sahəsində əldə etdiyi nailiyyətləri diqqətə çatdıran icra başçısı, keçən il rayonda görülmüş işlərin təhlilini vermiş, buraxılmış nöqsanlardan, onların aradan qaldırılması yollarından danışmış və qarşıda duran vəzifələrin həlli istiqamətində nəzərdə tutulan tədbirləri şərh etmişdir.
Bildirilmişdir ki, Azərbaycan Prezidenti İlham Əliyev bölgələrin sosial-iqtisadi inkişafına xüsusi diqqət və qayğı ilə yanaşır. Dövlətimizin başçısının rayonlara tez-tez səfərlər etməsi, görülmüş işlərlə və problemlərlə yerində tanış olması regionların inkişafına güclü təkan verir. Ölkəmizin rəhbərinin Masallıya səfərlərini xatırladan icra başçısı, regionların sosial-iqtisadi inkişafı Dövlət proqramında nəzərdə tutulan tədbirlərin icrası ilə bağlı görülən işlər barədə ətraflı məlumat vermişdir.Qeyd olunmuşdur ki, Dövlət proqramında Masallı rayonu üzrə nəzərdə tutulan tədbirlərin yerinə yetirilməsi sayəsində hesabat ilində rayonda ümumi məhsulun həcmi 8,4 faiz artaraq 126.243 min manat, adambaşına düşən pul gəliri 641 manat, orta aylıq əmək haqqı 80,8 manat təşkil etmişdir. Son üç ildə rayonda 8742 yeni iş yeri açılmışdır ki, bunun da 3863-ü daimidir. Ötən il rayon üzrə 2989 yeni iş yerinin yaradıldığını vurğulayan məruzəçi, bu istiqamətdə tədbirlərin davam etdirildiyini, rayonda geniş abadlıq və quruculuq işlərinin görüldüyünü xatırlatmışdır.
Diqqətə çatdırılmışdır ki, hesabat ilində Masallı şəhərində 7024 nömrə tutumu olan ATS, Xırmandalı, Köhnə Alvadı, Yeddioymaq, Təzə Alvadı və Güllütəpə kəndlərində yeni poçt binaları, Miyankü kəndində Heydər Əliyev Fondunun “Yeniləşən Azərbaycana yeni məktəb” Proqramı çərçivəsində 400 şagird yeri olan yeni məktəb binası istifadəyə verilmiş, şəhər daxilindən keçən körpü əsaslı təmir olunmuş, Seybətin dairəsi yenidən qurulmuşdur.
Əhalinin elektrik enerjisi və təbii qazla təminatında, sərfiyyat üzrə yığımlarda yol verilən nöqsanlardan danışan icra başçısı, çatışmazlıqların aradan qaldırılması üçün təsirli tədbirlər görülməsi barədə müvafiq xidmətlərin rəhbərlərinə tapşırıqlar vermiş, belə halların təkrar olunacağı təqdirdə ciddi tədbirlər görüləcəyini vurğulamışdır.
Milli Məclisin deputatları Elmira Axundova və Əhəd Abıyev yığıncaqda çıxış edərək, seçicilərin onlara verdiyi tapşırıqlar əsasında rayonda həyata keçirilən tədbirlərdən, deputat sorğularından və cari ildə görüləcək işlərdən danışmışlar.
Hesabat yığıncağında Prezidentin İcra Aparatının regional idarəetmə və yerli özünüidarəetmə orqanları ilə iş şöbəsinin müdiri Zeynal Nağdəliyev çıxış etmiş və demişdir ki, ölkəmiz Prezident İlham Əliyevin rəhbərliyi altında sürətlə inkişaf edir. Son üç il ərzində respublikamızda 520 min yeni iş yerinin açılması inkişafımızın əyani təzahürüdür. Bölgələrin inkişafı dövlətimizin başçısının fəaliyyətinin prioritet istiqamətlərindən biridir. Hər il dövlət büdcəsində aqrar sahənin inkişafına kifayət qədər böyük məbləğdə vəsait yönəldilir. Enerji daşıyıcılarının qiymətlərinin qaldırılması ilə əlaqədar kənd təsərrüfatı işçilərinə bu il 80 milyon manat məbləğində subsidiya veriləcəkdir. Bu vəsait gübrə və yanacaq alınmasına sərf olunacaqdır.
Sürətli iqtisadi yüksəliş ölkəmizi regionun lider dövlətinə çevirmişdir. Dünyanın qabaqcıl ölkələri, nüfuzlu beynəlxalq təşkilatlar da etiraf edirlər ki, Azərbaycanda iqtisadi artım ən yüksək dinamika ilə ölçülür. İqtisadiyyatımız keçən il 34 faiz artmışdır. Əlbəttə, bu inkişaf Masallı rayonunda da müşahidə olunur. Əminik ki, masallılılar bu il daha sanballı nailiyyətlər əldə edəcəklər.
Respublikamızda qeyri-neft sektorunun inkişaf etdirilməsinin əhalinin sosial problemlərinin həllində mühüm amil olduğunu söyləyən Z.Nağdəliyev, regionların sosial-iqtisadi inkişafı Dövlət proqramının icrasına Azərbaycan Prezidentinin şəxsən nəzarət etdiyini, bu məqsədlə rayonlara vaxtaşırı səfərlərə çıxdığını, əhali ilə görüşərək onların problemləri ilə yerində tanış olduğunu bildirmiş, ölkəmizin başçısının fəaliyyətinin hamıya örnək olduğunu vurğulamış, Masallının sosial-iqtisadi inkişafını təmin etmək üçün rayonda biznes forumun keçirilməsinin vacibliyini diqqətə çatdırmışdır.
Yığıncaqda çıxış edənlər ötən il əldə olunmuş nailiyyətlərlə bərabər, yol verilmiş nöqsanlar, mövcud problemlər barədə danışmış, cari ildə qarşıda duran vəzifələrlə əlaqədar təkliflərini bildirmişlər.
Yığıncaqda Azərbaycan Prezidenti İlham Əliyevə müraciət qəbul edilmişdir.
Bölmənin digər xəbərləri
