İDMAN
MƏHƏMMƏD ƏLİ “ƏSRİN QƏHRƏMANI”DIR
AZƏRTAC xəbər verir ki, yaxın keçmişin ən görkəmli peşəkar boksçularından biri, ağır çəkidə dəfələrlə dünya çempionu Məhəmməd Əlinin rinqdən kənardakı fəaliyyəti də yüksək qiymətləndirilir. İndi bütün dünyada onu xeyirxah və humanist insan kimi tanıyırlar.
Bu günlərdə o, inkişaf etməkdə olan ölkələrdə yoxsulluq içində yaşayan insanların güzəranının yaxşılaşması üçün səylərinə və gördüyü işlərə görə daha bir mükafata layiq görülmüşdür. Bu mükafat Məhəmməd Əliyə ərəb-ABŞ maraqlarını təmsil edən milli təşkilat tərəfindən təqdim olunmuşdur.
Təşkilat məşhur idmançının Afrika və Asiyanın yoxsul bölgələrinə maliyyə vəsaiti, dava-dərman və ərzaq göndərilməsindəki səylərini layiqincə dəyərləndirmiş, Zair və Malayziya kimi ölkələrə yardımı xüsusi vurğulamışdır. Təşkilatın direktoru Ceyms Zoqbi Məhəmməd Əlini “Əsrin qəhrəmanı” adlandırmışdır.