Moldovada Ulu Öndər Heydər Əliyevin 100 illik yubileyinə həsr olunan sərgi açılıb
Kişineu, 7 aprel, AZƏRTAC
Moldovanın Tarix Muzeyində Azərbaycan xalqının Ümummilli Lideri Heydər Əliyevin 100 illik yubileyinə həsr olunan “Heydər Əliyev: görkəmli şəxsiyyətin həyat və fəaliyyəti” adlı sərginin açılış mərasimi keçirilib.
AZƏRTAC xəbər verir ki, tədbir Azərbaycanın Moldovadakı səfirliyi, Moldova Tarix Muzeyi, Moldova Dövlət Arxivinin təşkilatçılığı, Moldovanın Xarici İşlər və Avropaya İnteqrasiya Nazirliyi və Azərbaycan Xarici İşlər Nazirliyinin dəstəyi ilə keçirilib. Mərasimdə Moldovada akkreditə olunmuş diplomatik korpusun nümayəndələri, ictimaiyyət nümayəndələri, ölkənin aparıcı universitetlərinin rektorları, tələbələr, gənclər, həmçinin KİV nümayəndələri iştirak ediblər.
Tədbiri açan Azərbaycanın Moldovadakı səfiri Qüdsi Osmanov sərginin keçirilməsində göstərdiyi dəstəyə görə Moldova rəhbərliyinə təşəkkürünü bildirib. Diplomat, həmçinin Azərbaycan ilə Moldova arasında əlaqələrin məhz Heydər Əliyevin dövründə inkişaf etməyə başladığını və bu gün iki ölkə arasında münasibətlərin strateji tərəfdaşlıq və hərtərəfli əməkdaşlıq xarakteri daşıdığını söyləyib.
Sərginin açılışında Moldovada rəsmi səfərdə olan Azərbaycan xarici işlər nazirinin müavini Xələf Xələfov da iştirak edib. Nazir müavini çıxışında sərginin Moldova Tarix Muzeyində keçirilməsini əlamətdar hadisə adlandıraraq, görkəmli dövlət xadimi, Azərbaycan xalqının Ümummilli Liderinin Azərbaycan tarixindəki rolundan danışıb. Xələf Xələfov Heydər Əliyevin ən çətin dövrdə xalqın tələbi ilə hakimiyyətə qayıtdığını, ölkəni vətəndaş müharibəsi və parçalanma təhlükəsindən xilas etdiyini qeyd edib. “Heydər Əliyevin böyük əməyi, uzaqgörənliyi və onun şəxsiyyətinin nəhəng siyasi miqyası nəticəsində xalqımızın Azərbaycan dövlətçiliyinin müdafiəsi ətrafında səfərbər edilməsi, ölkə daxilində və ətrafında vəziyyətin sabitləşdirilməsi mümkün oldu”, - deyə Xələf Xələfov vurğulayıb. O, həmçinin bütün bunların qonşu Ermənistan tərəfindən Azərbaycanın Qarabağ bölgəsinin işğalı və ətraf rayonlara qarşı təcavüzünün davam etdiyi, bir milyondan çox azərbaycanlının qaçqın və məcburi köçkün düşdüyü, ölkə daxilində xaos və siyasi qeyri-sabitliyin hökm sürdüyü şəraitdə baş verdiyini tədbir iştirakçılarının diqqətinə çatdırıb. Bundan əlavə, Xələf Xələfov bildirib ki, Heydər Əliyev ölkədə mühüm enerji və nəqliyyat layihələrinin həyata keçirilməsinə nail olmaqla Azərbaycanın bugünkü inkişafının əsasını qoyub. “Bu gün ölkəmiz Avropanın enerji təhlükəsizliyinin təmin edilməsində etibarlı tərəfdaşdır. Həmçinin Azərbaycan regionda sülhün və sabitliyin bərqərar olmasına böyük töhfə verir”, - deyə nazir müavini qeyd edib. İkinci Qarabağ müharibəsindən sonra Azərbaycan ərazilərinin işğaldan azad edilməsi və ölkənin ərazi bütövlüyünün bərpası məsələsinə toxunan Xələf Xələfov qeyd edib ki, Azərbaycan sülh gündəminə sadiq olaraq, yeni reallıqlar əsasında Ermənistanla münasibətlərin tam normallaşması, sülh sazişinin bağlanması, təhlükəsiz sərhədlərin yaradılması və regionda bütün kommunikasiyaların açılmasının tərəfdarıdır.
O, Azərbaycan ilə Moldova arasında münasibətlərə də toxunaraq, bu münasibətlərin tarixi dostluq və hərtərəfli əməkdaşlıq xarakter daşıdığını bildirib. Azərbaycan xarici işlər nazirinin müavini müstəqillik əldə etdikdən sonra hər iki ölkənin sülhə can atdığını və bu kontekstdə qarşılıqlı fəaliyyət göstərdiyini vurğulayıb, hazırkı münasibətlərin qarşılıqlı yüksək etimad və hörmət səviyyəsində inkişaf etdiyini qeyd edib.
Moldova Xarici İşlər və Avropaya İnteqrasiya Nazirliyinin dövlət katibi Ruslan Bolboçan çıxışında iki ölkə arasında bütün sahələrdə sürətlə inkişaf edən və böyük potensiala malik olan əlaqələrin yüksək səviyyədə olduğunu qeyd edib. O, müasir müstəqil Azərbaycanın yaradılmasında və ölkənin regionun lider dövlətinə çevrilməsində Azərbaycan xalqının Ümummilli Lideri Heydər Əliyevin rolunu və əvəzsiz xidmətlərini xüsusi vurğulayıb.
Tədbirdə, həmçinin Moldova Parlamentinin deputatı, parlamentlərarası dostluq qrupunun Moldova tərəfindən rəhbəri Vitali Jakot çıxış edib. O, Heydər Əliyevin xalqının tarixində dərin iz qoyduğunu qeyd edərək, məhz onun müdrikliyi və biliyi sayəsində Azərbaycanın regionun liderinə, mühüm beynəlxalq layihələrdə iştirak edən etibarlı tərəfdaşa çevrildiyini dilə gətirib.
Sərgidə Moldova Dövlət Arxivinin və Milli Azərbaycan Tarixi Muzeyinin fondlarından görkəmli siyasi və dövlət xadimi Heydər Əliyevin həyat və fəaliyyətini əks etdirən arxiv foto və videogörüntüləri təqdim olunub. Həmçinin Heydər Əliyevin hakimiyyəti dövründə Moldova-Azərbaycan əməkdaşlığı ilə bağlı kadrlar sərgilənib.
Sərgi 15 gün davam edəcək.
Emil Hüseynli
AZƏRTAC-ın xüsusi müxbiri
Kişineu
Bölmənin digər xəbərləri
