Müharibə dövründən tikilən Suqovuşan və Talış kəndlərinə gedən yol strateji əhəmiyyət daşıyır
Bakı, 6 oktyabr, AZƏRTAC
Ötən ilin oktyabrın 3-də Azərbaycan Ordusunun həyata keçirdiyi əks-hücum əməliyyatları nəticəsində Ermənistan silahlı qüvvələrinin işğalından azad edilmiş Tərtər rayonunun Suqovuşan və Talış kəndlərinə gedən avtomobil yollarının Azərbaycan Avtomobil Yolları Dövlət Agentliyi tərəfindən asfaltlanması işlərinə başlanılıb.
Dövlətimizin başçısı bir il sonra - oktyabrın 3-də strateji əhəmiyyət daşıyan Suqovuşan qəsəbəsinə və Talış kəndinə gedən avtomobil yollarının açılışını edib. Nəzərə çatdıraq ki, Suqovuşan və Talış kəndlərinin avtomobil yolları ötən əsrin 70-ci illərində Suqovuşan su anbarının tikintisi ilə əlaqədar ulu öndər Heydər Əliyevin tapşırığı ilə inşa edilib.
AZƏRTAC xəbər verir ki, ümumi uzunluğu 28,5 kilometr, eni 9 metr olan yol 2 hərəkət zolağından ibarətdir. Yolun asfalt-beton örtüyünün eni isə 9 metrdir. Suqovuşan qəsəbəsinə və Talış kəndinə gedən avtomobil yolları uzun müddət erməni qəsbkarlarının işğalı altında olduğundan tamamilə sıradan çıxaraq dağılmışdı.
Tikinti işləri zamanı yolda yararsız qrunt qazılaraq çıxarılıb, yeni yol əsası inşa edilib. Növbəti mərhələdə Çaylı kəndindən Talış kəndinə qədər uzunluğu 8 kilometr olan yolun, həmçinin Talış kəndindən Tap Qaraqoyunlu kəndini keçməklə Qaşaltı Qaraqoyunlu kəndinə doğru 22 kilometr uzunluğa malik yeni yolun inşası da nəzərdə tutulub. Sözügedən avtomobil yollarının birləşdirilməsi nəticəsində Tərtər şəhəri ilə yanaşı, alternativ olaraq Naftalan şəhərindən də bu istiqamətdə hərəkət etmək imkanı olacaq. Kompleks şəkildə görülən bu işlər bütün hərəkət iştirakçılarının rahatlığı və təhlükəsizliyi üçün hesablanıb. Yeni asfalt-beton örtüyünün döşəndiyi sahə ümumilikdə 250 min kvadratmetrdən çoxdur.
Həmin yollarda aparılan tikinti işləri inşaat norma və qaydalarının tələblərinə uyğun olaraq yüksək keyfiyyətlə həyata keçirilib.
Bundan başqa, layihəyə əsasən, yolboyu avtobus dayanacaqları inşa edilib, eləcə də, nəqliyyatın və piyadaların hərəkəti üçün zəruri infrastruktur yaradılıb.
Qeyd edək ki, Suqovuşan-Xan arxının 37 kilometr betonlama işinin layihəsi də artıq hazırlanıb. Suqovuşanın işğaldan azad olunması ilə Bərdə, Goranboy, Naftalan, Yevlax, Ağcabədi rayonları daxil olmaqla təxminən 30 min hektara yaxın əraziyə ilk dəfə su verilib. Bu isə fermerlərə tarlalarda növbəli əkini təmin etməyə imkan yaradıb.
Tərtər rayonunun Suqovuşan və Talış kəndlərinə gedən avtomobil yolunun istifadəyə verilməsi tarixi olmaqla yanaşı, həm də xüsusi əhəmiyyət daşıyır. Dünyanın bəlkə də heç bir ölkəsində müharibə dövründə, qızğın döyüşlər zamanı yol çəkilməyib. Təbii ki, müharibə gedən ərazidə, o cümlədən strateji əhəmiyyətə malik Suqovuşan və Talış kəndlərinə gedən yolda görülən işlər təqdirəlayiqdir.
Ümumilikdə isə hər bir xalqın mədəniyyəti yoldan başlayır və bu sözlərdə böyük həqiqət var. Yol həm də iqtisadiyyat və həyat deməkdir. Ulu Öndərin də vaxtilə böyük uzaqgörənliklə söylədiyi “yol - iqtisadiyyat, mədəniyyət, bir sözlə həyat deməkdir” sözləri hər zaman öz aktuallığını saxlayır.
Bölmənin digər xəbərləri
