Naxçıvan Muxtar Respublika Xəstəxanasında endokrinologiyanın aktual problemləri müzakirə edilib
Naxçıvan, 1 mart, AZƏRTAC
Son illər ölkəmizdə şəkərli diabetin müalicə və profilaktikası istiqamətində mühüm tədbirlər görülüb, “Şəkərli diabet xəstəliyinə tutulmuş şəxslərə dövlət qayğısı haqqında” Qanun, 2006-2010-cu, 2011-2015-ci və 2016-2020-ci illəri əhatə edən “Şəkərli diabet üzrə Dövlət Proqramı” qəbul edilib.
AZƏRTAC-ın Naxçıvan bürosu xəbər verir ki, bu barədə Naxçıvan Muxtar Respublika Xəstəxanasında “Endokrinologiyanın aktual problemləri” mövzusunda keçirilən elmi-praktik konfransda ətraflı danışılıb.
Konfransda Naxçıvan Muxtar Respublikası səhiyyə nazirinin müavini Samrat Gəncəyeva səhiyyə sisteminin inkişafına dövlət qayğısından söz açıb, digər sahələr kimi, endokrinologiya sistemində də mühüm irəliləyişlərə nail olunduğunu qeyd edib. Bildirib ki, muxtar respublikada görülmüş tədbirlər nəticəsində şəkərli diabet xəstələrinin dərman və özünənəzarət vasitələri ilə təmin olunması xeyli yaxşılaşıb. 2007-ci ildə verilmiş qlükometr aparatları və test lövhələrindən ibarət özünənəzarət vasitələri yeniləri ilə əvəz olunub. Hazırda muxtar respublikada şəkərli diabet xəstələrinə şəkərölçmə cihazı, test çubuqları və dərmanlar pulsuz verilir.
Vurğulanıb ki, endokrinologiya şöbəsi tərəfindən şəkərli diabetin diaqnostika və müalicəsi üzrə klinik protokolların tətbiqi, xəstəliyin profilaktikasına dair maarifləndirici söhbətlərin aparılması, diabetin fəsadlarının profilaktikası məqsədilə tibb müəssisələrində təlim məktəbləri şəbəkəsinin gücləndirilməsi üzrə tədbirlərin həyata keçirilməsi diqqət mərkəzində saxlanılır. Bu məqsədlə altı ildən çoxdur ki, diabet məktəblərinin təlim, məşğələ və treninqləri təşkil olunur.
Sonra Bakı şəhərində tibbi fəaliyyət göstərən Endokrinoloji Mərkəzin həkim-endokrinoloqu, tibb üzrə fəlsəfə doktoru Nərminə Hüseynovanın qalxanabənzər vəzin xəstəlikləri zamanı yaranan müxtəlif reproduktiv pozulmalar və şəkərli diabet və xroniki venoz çatışmazlığı ilə bağlı məruzəsi dinlənilib.
Mütəxəssis şəkərli diabetin tipləri, risk faktorları, diaqnostikası, dərman vasitələrinin seçilməsi və müalicə işinin təşkilində müasir üsullar barədə məlumat verib.
Konfransın sonunda müzakirələr aparılıb, tədbir iştirakçılarını maraqlandıran suallar cavablandırılıb.
Bölmənin digər xəbərləri
