Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi təyin edilib

Bakı, 22 dekabr, AZƏRTAC

Son illər dünyada gedən proseslərə, o cümlədən iqtisadi tənəzzül, COVID pandemiyası, ölkələrarası toqquşmalar və digər problemlərə baxmayaraq, Azərbaycan sabit ada kimi öz inkişafının yeni mərhələsində inamla addımlayır. Ölkə iqtisadiyyatında davamlı dinamik inkişaf özünü açıq şəkildə göstərir. Ən qürurverici hal ondan ibarətdir ki, özünün dayanıqlı davamlı inkişafını təmin edən Azərbaycanın bu sürətli tərəqqisindən digər ölkələr də faydalanmaqdadır.

Otuz il işğal altında qalan torpaqlarımızın Prezident, Müzəffər Ali Baş Komandan İlham Əliyevin rəhbərliyi ilə azad edilməsi ölkə qarşısına yeni hədəflər qoyub, yeni üfüqlər açıb. Uzun illərdir torpaq həsrəti ilə yaşayan məcburi köçkünlər Vətən müharibəsində qazanılan şanlı Qələbə nəticəsində nəhayət arzularına qovuşdular. İndi Qarabağımızda, Şərqi Zəngəzurumuzda sürətli bərpa-quruculuq işləri görülür, müasir infrastruktur layihələri həyata keçirilir. Düşmənin viran qoyduğu şəhər və kəndlərimiz müasir layihələr əsasında yenidən qurulur. Qarabağ və Şərqi Zəngəzur iqtisadi rayonları üzrə Prezidentin xüsusi nümayəndəliklərinin yaradılması məhz bu çağırışlardan irəli gəlib, regionların idarəetməsinin yeni və effektiv üsulu kimi artıq özünü təsdiqləməkdədir. Ötən gün Naxçıvan Muxtar Respublikası Ali Məclisinin səkkizinci sessiyasının Vasif Talıbovun Ali Məclisin sədri vəzifəsindən azad olunması ilə bağlı qərarı da muxtar respublika həyatında yeni dövrün əsasının başlanğıcı kimi qəbul olunur. Bu gün dövlətimizin başçısının Sərəncamı ilə Naxçıvan Muxtar Respublikası üzrə Azərbaycan Prezidentinin səlahiyyətli nümayəndəliyi institutu yaradılıb və səlahiyyətli nümayəndə təyin olunub.

Muxtar respublikada Azərbaycan Prezidentinin səlahiyyətli nümayəndəliyi institutunun yaradılması və səlahiyyətli nümayəndənin təyin olunması heç də o demək deyil ki, Naxçıvanın muxtar respublika statusu ləğv edilməlidir. Əksinə, Prezidentin səlahiyyətli nümayəndəsinin təyin olunması Naxçıvanda idarəetmə üsulunun səmərəliliyinin artırılmasına, region iqtisadiyyatının daha da inkişafına, islahatların sürətlə və uğurla həyata keçirilməsinə vəsilə olacaq, müasir həyat standartlarına əsaslanan yüksək sosial rifah cəmiyyətinə keçidlə nəticələnəcək. Bu, həmçinin muxtar respublikaya yerli və xarici investorların cəlb edilməsi prosesini aktivləşdirəcək. Bir sözlə, ölkəmizin digər bölgələri kimi, Naxçıvanın da davamlı inkişaf proseslərindən kənarda qalmamasına rəvac verəcək.

Ulu Öndər Heydər Əliyev tərəfindən müəyyənləşdirilmiş inkişaf konsepsiyasının ardıcıl şəkildə həyata keçirilməsi ölkəmizin digər bölgələrində olduğu kimi, Naxçıvan Muxtar Respublikasında da davamlı və tarazlı inkişafı təmin edib, sosial infrastruktur təminatının keyfiyyətinin yüksəldilməsinə şərait yaradıb. Ümummilli Lider Heydər Əliyevin Naxçıvanla bağlı planları, arzuları var idi: “İstəyirəm ki, mənim arzum, istəklərim, Azərbaycan dövləti haqqında, müstəqil Azərbaycanın gələcəyi haqqında və Azərbaycanın ayrılmaz hissəsi olan Naxçıvan haqqında planlarım, arzularım yerinə yetirilsin”. Əminliklə söyləmək olar ki, bu gün Ulu Öndərin bütün arzuları kimi, Naxçıvanla bağlı istəkləri də yerinə yetib. Naxçıvan Muxtar Respublikasının inkişafı, əhalinin sosial-iqtisadi vəziyyətinin yaxşılaşdırılması, infrastrukturun qurulması məsələləri daim Prezident İlham Əliyevin diqqət mərkəzində olub. Təsadüfi deyil ki, Prezident İlham Əliyev dövlət başçısı olduğu dövrdə muxtar respublikaya 15 dəfə səfər edib. Dövlətimizin başçısı bu səfərlər çərçivəsində 100-ə yaxın təhsil, səhiyyə, idman və mədəniyyət müəssisəsinin, istehsal sahəsinin və hərbi təyinatlı obyektin açılışlarında iştirak edib. Naxçıvanda aparılan abadlıq-quruculuq işləri, müasir infrastrukturun yaradılması, nəqliyyat-kommunikasiya xətlərinin çəkilişi işləri bilavasitə Prezident İlham Əliyevin diqqət və qayğısı ilə həyata keçirilib. Bununla əlaqədar olaraq Azərbaycan Prezidenti tərəfindən Naxçıvan Muxtar Respublikasının sosial-iqtisadi inkişafının sürətləndirilməsi məqsədilə müxtəlif illərdə sərəncamlar imzalanıb. Xatırladaq ki, təkcə 2012-2018-ci illərdə ayrı-ayrı layihələr istisna olmaqla, muxtar respublikanın sosial-iqtisadi inkişafının daha da sürətləndirilməsi üçün Naxçıvan Nazirlər Kabinetinə ümumilikdə 40 milyon manata yaxın vəsait ayrılıb.

Hər bir ölkənin inkişafı onun yollarından başlayır. Prezident İlham Əliyev tərəfindən təsdiqlənən və ölkəmizdə 2004-cü ildən uğurla icrasına başlanılan “Regionların sosial-iqtisadi inkişafına dair Dövlət proqramları”na uyğun olaraq, ölkəmizdə, o cümlədən Naxçıvan Muxtar Respublikasında avtomobil yollarının tikintisi və yenidən qurulması istiqamətində ardıcıl məqsədyönlü tədbirlər həyata keçirilib. 2010-cu ildə uzunluğu 87 kilometr olan Naxçıvan-Sədərək, 2012-ci ildə 34 kilometrlik Naxçıvan-Culfa və 2014-cü ildə isə uzunluğu 88,8 kilometr olan Naxçıvan-Şahbuz-Batabat magistral avtomobil yollarının istifadəyə verilməsi bunun əyani təzahürüdür. Hələ 2018-ci ildə Naxçıvan Muxtar Respublikasında Culfa-Ordubad magistral avtomobil yolunun tikintisi məqsədilə Prezident İlham Əliyev tərəfindən müvafiq Sərəncam imzalanıb və bunun üçün Naxçıvan Muxtar Respublikasının Nazirlər Kabinetinə 30 milyon manat ayrılıb. Bu mühüm avtomobil yolu 2021-ci il mayın 10-da məhz Prezident İlham Əliyevin iştirakı ilə istifadəyə verilib.

Bundan əlavə, muxtar respublika əhalisinin daimi elektrik enerjisi, içməli su və suvarma suyu ilə təmin olunması istiqamətində də tədbirlər davam etdirilib. Görülən işlər nəticəsində muxtar respublikada yeni elektrik stansiyaları inşa edilib. Əgər 2003-cü ilin sonuna Naxçıvanda 1 elektrik stansiyası fəaliyyət göstərirdisə, indi bu rəqəm 10-a yaxındır.

Naxçıvanda həyata keçirilən investisiyatutumlu layihələrdən biri də gücü 36 meqavat olan Ordubad Su Elektrik Stansiyasıdır. Stansiyanın tikintisinə indiyədək dövlət büdcəsindən ümumilikdə 15 milyon manat ayrılıb. Eyni zamanda, muxtar respublikada aqrar sahədə aparılan uğurlu islahatların davam etdirilməsinin vacibliyi nəzərə alınaraq pivot layihə çərçivəsində min hektar əkin sahəsində müasir suvarma - yağışyağdırma sistemlərinin quraşdırılması işlərinin davam etdirilməsi məqsədilə Naxçıvan Muxtar Respublikasının Nazirlər Kabinetinə 5 milyon manat vəsait ayrılıb.

Dövlətimizin başçısının Naxçıvan Muxtar Respublikasına qayğısını əks etdirən daha bir fakt dövlət büdcəsindən hər il muxtar respublikaya dotasiyanın ayrılmasıdır. Qeyd etmək yerinə düşər ki, gələn il üçün muxtar respublikaya ayrılacaq dotasiya builki ilə müqayisədə bir qədər də artırılaraq 482,4 milyon manat nəzərdə tutulub.

Beləliklə, Dövlət proqramlarının uğurlu icrası Naxçıvanda bütün sahələrin inkişafına təkan verib. Belə ki, 2003-cü ildən ötən dövrdə muxtar respublikada ümumi daxili məhsul istehsalının həcmi 16, sənaye məhsulunun həcmi 56 dəfə, kənd təsərrüfatı məhsullarının həcmi isə 7,5 dəfə artıb. Görülən işlər, həyata keçirilən layihələr və açılan yeni müəssisələr muxtar respublikada əhalinin məşğulluğunun təmin olunmasında da müsbət təsir göstərib. Belə ki, qeyd olunan dövr ərzində muxtar respublikada 78 min 500-dən çox yeni iş yeri açılıb.

Bütün bunlar onu göstərir ki, Naxçıvan Muxtar Respublikasının inkişafı, əhalinin sosial rifahının yaxşılaşdırılması bilavasitə Prezident İlham Əliyevin adı ilə bağlıdır. Dövlətimizin başçısının Naxçıvanda istifadəyə verilən bütün mühüm yeni obyektlərin - yolların, turizm obyektlərinin, təhsil, səhiyyə və digər sosialyönümlü müəssisələrin açılışlarında şəxsən iştirakı bunu deməyə əsas verir.

Lakin bəzi insanların dövlətimizin başçısının diqqət və qayğısı, bəzi hallarda bilavasitə rəhbərliyi ilə muxtar respublikada həyata keçirdiyi işləri öz adına çıxarmağa çalışması, bu işlərdən nüfuzlarını artırmaq naminə istifadə etməsi böyük təəssüf doğurur. Bütün bunlar qəbuledilməz olmaqla yanaşı, həm də dərin ikrah hissi doğurmaqdadır.

Korrupsiya və rüşvətxorluq hallarına qarşı mübarizə tədbirləri diqqət mərkəzində saxlanılır

Ümumiyyətlə, geniş kontekstdən baxanda, ölkəmizdə həyata keçirilən islahatlar uğurlu inkişafa mane olan problemlərin aradan qaldırılmasında mühüm rol oynayır. Bu baxımdan korrupsiya və rüşvətxorluq hallarına qarşı mübarizə tədbirlərinin gücləndirilməsi də Azərbaycan dövləti tərəfindən vacib məsələ kimi diqqət mərkəzində saxlanılır. Bu gün ölkəmizdə korrupsiyaya qarşı mübarizə dövlət siyasətinin prioritet istiqamətini təşkil edir. Dünyada bir çox dövlətlərin daxili probleminə çevrilən bu bəlaya qarşı Azərbaycanda da ciddi tədbirlər görülür, sərt qərarlar qəbul edilir. Prezident İlham Əliyev də çıxışlarında korrupsiyaya və rüşvətxorluğa qarşı mübarizədə daha sərt tədbirlərin görüləcəyini, heç kimə güzəşt olunmayacağını bəyan edir, bundan sonra da bu sahədə ciddi mübarizə aparılacağını bildirir.

Naxçıvan Muxtar Respublikası üzrə Azərbaycan Prezidentinin səlahiyyətli nümayəndəliyi institutunun yaradılması, səlahiyyətli nümayəndə təyin olunması, eyni zamanda, hazırkı dövrədək muxtar respublikada müşahidə olunan korrupsiya, rüşvətxorluq, qeyri-şəffaflıq və digər neqativ halların aradan qaldırılmasında da mühüm rol oynayacaq, Naxçıvanın sürətli və hərtərəfli inkişafını təmin edəcək.

Beləliklə, Naxçıvan Muxtar Respublikası inkişafının yeni mərhələsinin astanasındadır. Prezident İlham Əliyevin rəhbərliyi ilə inkişafının ən yüksək dövrünü yaşayan müstəqil Azərbaycanın digər bölgələri kimi, Naxçıvan Muxtar Respublikasının da daha sürətli tərəqqisi üçün yeni imkanlar yaranmaqdadır. Artıq start götürən əsaslı islahatlar prosesi muxtar respublikanın daha sürətli inkişafını, bu qədim diyarda sosial-iqtisadi həyatın canlanmasını və vətəndaşların rifah halının yüksəlməsini qısa müddətdə təmin edəcək.