Novosibirskdə “Heydər Əliyev: Rusiyadan baxış” kitabının təqdimatı keçirilib
Novosibirsk, 18 aprel, AZƏRTAC
Novosibirsk Dövlət İqtisadiyyat və İdarəetmə Universitetində (NDİİU) “Heydər Əliyev: Rusiyadan baxış” (“Гейдар Алиев - взгляд из России”) elmi monoqrafiyasının təqdimatı keçirilib.
AZƏRTAC xəbər verir ki, monoqrafiya Azərbaycanın Yekaterinburqdakı Baş konsulluğunun dəstəyi ilə Novosibirsk Dövlət Texniki Universitetinin professoru Mixail Çernyakovun və Novosibirsk Dövlət İqtisadiyyat və İdarəetmə Universitetinin dosenti Kamal Əkbərovun müəllifliyi, AMEA-nın Tarix İnstitutunun şöbə müdiri tarix elmləri namizədi Cəbi Bəhramovun elmi redaktorluğu ilə işıq üzü görüb.
Kitabın redaksiya heyətinin üzvü, Azərbaycanın Yekaterinburqdakı baş konsulu vəzifəsini icra edən Şöhrət Mustafayev tədbiri açaraq Ümummilli Lider Heydər Əliyevin keçmiş SSRİ-nin və Azərbaycanın tarixində müstəsna rolundan danışıb. Qeyd edib ki, onun ideyaları, azərbaycançılıq fəlsəfəsi, ideologiyası, qurduğu, yaratdığı müasir Azərbaycan yaşayır və onun yolu ilə inkişaf edir. Diplomat kitabın ərsəyə gəlməsində zəhməti olan hər kəsə təşəkkürünü bildirərək qeyd edib ki, nəşrdə Ümummilli Lider Heydər Əliyevin həyatı və siyasi keçmişinin ən mühüm məqamları öz əksini tapıb.
NDİİU-nin prorektoru Vladimir Romaşin Heydər Əliyev irsinin öyrənilməsinin universitet tələbələri üçün faydalı olacağını vurğulayıb. “Məhz Heydər Əliyevin müdrik qərarları Azərbaycana ilk xarici investisiyaların cəlb edilməsinə imkan yaratdı, respublika iqtisadiyyatı yeni səviyyəyə qalxdı. Dünyada tarix yazan liderlər az deyil, ancaq tarixdə qalan liderlərin sayı azdır və Heydər Əliyev belə şəxsiyyətlərdəndir”, - deyə o bildirib.
Novosibirsk vilayəti təhsil nazirinin müavini Svetlana Korolkova qeyd edib ki, Heydər Əliyev fenomeninin əsası onun məhz öz xalqının gücünə arxalanmasıdır. Heydər Əliyev bütün azərbaycanlıların rəhbəri idi. “Harada olursa olsun, Heydər Əliyev Azərbaycan diasporunun nümayəndələri ilə görüşməyə imkan tapırdı. Dünya azərbaycanlılarının vətənin inkişafına verə biləcəkləri töhfəni hər zamanı yüksək dəyərləndirirdi. Heydər Əliyev həyatı və fəaliyyəti gənclər üçün əsl məktəbdir”, - deyə S.Korolkova bildirib.
Novosibirsk vilayəti Qanunvericilik Məclisi sədrinin müavini Mais Məmmədov diqqətə çatdırıb ki, görkəmli siyasi xadim Heydər Əliyev irsinin tədqiqinə həsr olunmuş nəşrin Novosibirsk universitetində təqdimatı böyük əhəmiyyət kəsb edir. “Rusiyanın ən yaxşı 10 universiteti sırasında olan NDİİU-da təhsil alan tələbələrin Heydər Əliyev şəxsiyyətinə marağının şahidi olduq. Bu, əlbəttə ki, mühüm amildir. Heydər Əliyevin 100 illik yubileyi təkcə Azərbaycanda deyil, bütün dünyada, o cümlədən Rusiyada da geniş qeyd olunur. Biz, Rusiyada yaşayan azərbaycanlılar da Heydər Əliyev fəlsəfəsinin öyrənilməsi və təbliğinə öz töhfəmizi veririk”, - deyə M.Məmmədov bildirib.
Müəlliflər Mixail Çernyakov və Kamal Əkbərov “Heydər Əliyev-Rusiyadan baxış” monoqrafiyasının Heydər Əliyev irsinin Rusiyada ilk elmi araşdırması olduğunu diqqətə çatdırıblar. Ulu Öndərlə bağlı sənədləri araşdırarkən onu özləri üçün yenidən kəşf etdiklərini, Heydər Əliyevin həmişə öz xalqının mənafeyini əsas götürərək minlərlə insanı öz ətrafında sıx birləşdirdiyini, xalqının liderinə çevrildiyini vurğulayıblar.
Novosibirsk vilayəti Millətlərin İşləri və Dini Qurumlarla Əlaqə İdarəsinin rəisi Anna Loparyova bildirib ki, Novosibirskdə yaşayan azərbaycanlılar nümunəvi davranışları ilə seçilirlər. Bu, onların düzgün mühitdə tərbiyə almalarının, tarixlərinə, adət-ənənələrinə ehtiramla yanaşmalarının göstəricisidir. Əlbəttə, Heydər Əliyevin azərbaycançılıq təfəkkürünün və ideyasının formalaşmasında xidmətləri danılmazdır.
Tədbirin sonunda kitabın nüsxələri müəlliflərin imzası ilə iştirakçılara paylanılıb, Ümummilli Lider Heydər Əliyevə həsr olunmuş film nümayiş etdirilib.
Bölmənin digər xəbərləri
