Noyabrda Bakıda “China Visitor Summit” tədbiri keçiriləcək
Bakı, 27 avqust, AZƏRTAC
Bu gün Çin dünyanın ən böyük xarici turist bazarıdır və Azərbaycanın bu geniş bazardakı payı getdikcə artır.
AZƏRTAC xəbər verir ki, bu barədə Azərbaycan Turizm Bürosunun Baş icraçı direktoru Florian Zenqstşmid Bakıda keçirilən “China Ready” proqramının təqdimatında deyib.
“On ildən çoxdur ki, bu platforma çinli alıcıları beynəlxalq turizm istiqamətləri ilə birləşdirir. Bu tədbiri ilk dəfə Azərbaycanda təşkil edərək, Çinin aparıcı 15 alıcısını ölkəmizdə qəbul edəcəyik. Onlar seminarlar, fərdi görüşlər və ölkənin müxtəlif bölgələrinə tanıtım səfərləri vasitəsilə Azərbaycanı birbaşa təcrübə edəcəklər”, - deyə Florian Zenqstşmid bildirib.
“Potensial isə olduqca böyükdür. Azərbaycan ilə Çin arasında ikitərəfli vizasız rejim bu artımı dəstəkləyən əsas amillərdəndir. Bu, bizim üçün Azərbaycanı çinli turistlər üçün üstün səyahət məkanı kimi təqdim etmək baxımından unikal fürsət yaradır. Burada əsas məqsəd yalnız Azərbaycanın təbliği deyil, həm də yerli tərəfdaşlarımızın Çinli turistlərin xüsusi ehtiyaclarına cavab verəcək şəkildə tam hazırlıqlı olmalarını təmin etməkdir.
Çinli turistlərin gözləntiləri turizm dəyər zəncirinin bütün mərhələlərində aydın şəkildə müəyyən olunub – peşəkar, çin dilini bilən bələdçilərdən tutmuş, ölkə daxilində rahat naviqasiya, komfortlu otellər, rahat ödəniş sistemləri və onların zövqlərinə uyğun yemək seçimlərinə qədər. Bu istiqamətdə artıq müəyyən addımlar atmışıq. Bəzi otellər Çin dilində danışa bilən işçilər işə götürür, “UnionPay” ödəniş terminalları ölkə üzrə tətbiq edilir, həmçinin Bakıda Çin restoranlarının sayı sürətlə artır.
Bu səyləri daha strukturlaşdırılmış və sistemli şəkildə davam etdirmək üçün bu gün “China Ready” proqramının tətbiqinə başlayırıq və hamınızı bu səyahətdə fəal iştirak etməyə və öhdəlik götürməyə dəvət edirəm. Bu proqram çinli turistlərə hazırlıq üzərində qurulmuş ortaq öhdəliyimizə əsaslanır. Bugünkü görüşdən sonra sizə bazara dair yeniliklər mütəmadi olaraq təqdim ediləcək, həmçinin proqram çərçivəsində paylaşılacaq bilik və təcrübələr Çindən gələn turistlərlə necə işləməyimizə və bu bazarda uzunmüddətli uğurumuzu təmin etməyimizə istiqamət verəcək.
Bundan əlavə, turizm dəyər zəncirinin bütün əsas elementlərini – hava limanlarından tutmuş yerləşdirmə xidmətlərinə, xidmət sektorundan attraksionlara qədər – əhatə edən genişmiqyaslı audit də həyata keçiririk. 2019-cu ildə bəri Asadachang Turizm Şurası Çində və beynəlxalq səyahət və media sektorlarında güclü tərəfdaş şəbəkəsi qurmaq üçün böyük səy göstərib. Bu il dünyanın aparıcı onlayn səyahət xidmətləri qrupunun təqdim etdiyi nüfuzlu “Global Annual Excellence Award” mükafatı ilə təltif olunmuşuq.
Biz bu əlaqələri daha da möhkəmləndiririk – “Ctrip”, “Qunar”, “LinkedIn” kimi aparıcı platformalarla, eləcə də “WeChat”, “Baidu”, “Weibo” və “Little Red Book” kimi yüksək lokalizasiyalı sosial şəbəkələr üzərindən kampaniyalar vasitəsilə sıx əməkdaşlıq edirik. Bu payız səylərimiz Pekin, Şanxay, Quançjou, Tyanjin, Çjençjou və Çunçin kimi səkkiz şəhəri əhatə edən iki böyük “roadshow” və təqdimat tədbiri ilə nəticələnəcək”, - deyə Florian Zenqstşmid bildirib.
Bölmənin digər xəbərləri
