Oğuzda məktəblilərin skaut düşərgəsi maraqlı və yaddaqalan olub VİDEO
Oğuz, 8 iyun, AZƏRTAC
Elm və Təhsil Nazirliyi tərəfindən elan olunan Təhsildə İnkişaf və İnnovasiyalar üzrə VIII qrant müsabiqəsində qalib gələn maraqlı layihələrindən biri icra olunub.
AZƏRTAC-ın bölgə müxbirinin məlumatına görə, "Fərdi layihələr" kateqoriyası üzrə qalib gəlmiş “Skaut dəstəsinin fəaliyyətinə resurs dəstəyi" layihəsinin Oğuz rayon Qarabaladır kənd ümumi orta məktəbində düşərgəsi təşkil edilib.
Üç günlük proqram çərçivəsində skautlar üçün müxtəlif praktiki və nəzəri təlimlər təşkil olunub. Düşərgədə 30 nəfər skaut və təlimçi iştirak edib.
Məktəblilər ilk düşərgənin təşkilində, çadır evlərin qurulmasında yaxından iştirak edib, fəallıq göstəriblər. Çünki yaşadıqları kənddə, təhsil aldıqları məktəbdə ilk dəfədir düşərgə salınır və onlar skaut qaydalarına uyğun təlimlərə, məşğələlərə cəlb olunublar.
Düşərgəyə qatılanlardan biri məktəbin VIII sinif şagirdi Nuray Qafarova bildirib ki, ilk dəfə skaut layihəsinin iştirakçısı olmaqdan sevinclidir. Layihə çərçivəsində təlimçilərin tapşırıqları, sinif yoldaşları ilə təşkil edilən müxtəlif oyunlar onlarda yüksək enerji və motivasiya yaradıb.
Məktəbin digər şagirdi Ayxan Məmmədli layihə iştirakıçısı kimi çox şanslı olduğunu vurğulayıb. İlk növbədə, həm yaşıdları, həm də digər siniflərin şagirdləri ilə müxtəlif mövzularda ünsiyyət quraraq, sosial məsələlərdə müzakirələr apardıqlarını bildirib. Ayxan təlimçilərin pozitivliyini xüsusi qeyd edərək əlavə edib ki, belə layihələr onların həyatında xüsusi iz buraxacaq və gələcək həyatlarında müsbət rol oynayacaq.
"Skaut dəstəsinin fəaliyyətinə resurs dəstəyi" layihəsi Oğuz rayon Qarabaldır kənd ümumi orta məktəbin təlim - tərbiyə işləri üzrə direktor müavini Nərmin Seyidova tərəfindən həyata keçirilib.
N. Seyidovanın sözlərinə görə, layihənin əsas məqsədi skautinq yolu ilə nəticəsi zəif olan şagirdləri mənalı fəaliyyətlərə cəlb etmək və dərsdənkənar fəaliyyətlər vasitəsilə qeyri-formal təhsilin təşviq edilməsini təmin etməkdir. O, qeyd edib ki, bu vasitə ilə məktəbli skautların müxtəlif sahələrdə, o cümlədən liderlik, komandanın idarə olunması, məsuliyyət daşıma və sosial münasibətlər kimi bacarıqlarının inkişaf etdirilməsi və gücləndirilməsi hədəflənir.
Layihə rəhbəri iştirakçıların intellektual və yaradıcı oyunlara cəlb edildiyini, müxtəlif mövzularda müzakirə və diskussiyalara qatılaraq rəy və fikirlərini də ifadə etdiklərini bildirib.
Bölmənin digər xəbərləri
