REGİONLAR
Qəbələdə 100 kilometr uzunluqda kanal və arxlar lildən təmizlənib VİDEO
Qəbələ, 26 avqust, AZƏRTAC
Qəbələ Suvarma Sistemləri İdarəsi Qəbələ rayonunda 11 mindən artıq su istifadəçisinə balansda olan 972 kilometr kanal və arxlardan, 12 suvarma mənbəyindən ibarət suvarma şəbəkəsi ilə xidmət edir. İdarə tərəfindən hər il kanal və arxlara baxış keçirilərək, növbəti ilin suvarma mövsümünə hazırlıq məqsədi ilə kanal və arxlarda lildən və kol-kosdan təmizlənəcək məsafə və həcm müəyyənləşdirilir. Hazırlanan tədbirlər planına uyğun olaraq, cari il üçün nəzərdə tutulan lildən təmizləmə işləri həyata keçirilir. İndiyədək 100 kilometr uzunluqda kanal və arxlar lildən təmizlənib. Bundan başqa, kanallarda su itkisinin qarşısının alınması məqsədi ilə bu günə qədər 14 kilometr məsafədə təsərrüfatlararası kanala beton üzlük çəkilib. Balansda olan 116 ədəd subartezian quyusundan 2-si əsaslı, 6-sı isə cari təmirə dayandırılmaqla, 108 ədədi istismara işlək vəziyyətdədir. Hazırda rayonda əkilən kənd təsərrüfatı bitkilərinin suvarılması normalara uyğun olaraq davam edir.
Bunu AZƏRTAC-a açıqlamasında Meliorasiya və Su Təsərrüfatı ASC-nin nümayəndəsi Qurbanəli Daşdəmirov deyib.
O bildirib ki, Qəbələ Suvarma Sistemləri İdarəsinin əsas fəaliyyət sahələrindən biri də rayonun yaşayış məntəqələrini, eyni zamanda, kənd təsərrüfatına yararlı torpaq sahələrini sel sularından mühafizə etməkdir. Mühafizə məqsədi ilə rayondan axan çaylarda tikilmiş 15 kilometr məsafədə sahilqoruyucu daş-beton bənd mövcuddur. Hazırda sel sularından və daşqınlardan mühafizə məqsədi ilə çaylarda məcra təmizləmə işləri aparılır.
Qəbələ Suvarma Sistemləri İdarəsi Qəbələ rayonunda 15900 hektardan artıq suvarılan torpaq sahəsinə xidmət edir.