Qurban Qurbanov: İsveçrəyə hesabı qorumaq üçün yox, qələbə qazanmaq üçün gedəcəyik
Bakı, 19 iyul, AZƏRTAC
Rəqibdən çəkinmədik və onların üzərinə getməyə çalışdıq. Həmişəki kimi bizim azarkeşlər möhtəşəm idi. Futbolçuların yerində olmaq asan deyil. Hər insan özünü düzgün idarə etmək üçün böyük olmalıdır. Şahruddin Məhəmmədəliyevin qol epizodunda səhv etdiyini deməzdim. Bəlkə təcrübəsinə görə belə alındı. Penalti epizoduna da dəqiq baxmaq lazımdır. Cərimə meydançasında hücumçu həmişə üstündür. Bunlar xırda səhvlərdir, aradan qaldırmaq asandır. Hər oyunçumuza inamım böyükdür.
AZƏRTAC xəbər verir ki, bu sözləri UEFA Çempionlar Liqasının ikinci təsnifat mərhələsinin ilk oyunları çərçivəsində İsveçrənin “Sürix” komandasını qəbul edən Ağdamın “Qarabağ” klubunun baş məşqçisi Qurban Qurbanov matçdan sonra təşkil olunan mətbuat konfransında deyib.
Mütəxəssis bildirib ki, maraqlı oyun oldu. Yaxşı mübarizə və açıq oyun gördük. Futbolçularımı təbrik edirəm, çox əziyyət çəkdilər. Meydanda futbola aid hər şey var idi.
“Rəqib standart vəziyyətlərdə yaxşı çıxış etdi. Çox nadir komandalar var ki, ilboyu oyunu bunun üzərində qurur. Biz də bunu yaxşılaşdıra bilə və vacib bir oyunda standart vəziyyətdən qol vura bilərik. Rəqibin orada necə oynayacağını bilmək olmaz. Əvvəlki oyuna 3 hücumçu ilə çıxmışdılarsa, bu dəfə daha çox - 2 futbolçu ilə ön xətdə yer almışdılar. Oyun zamanı hansısa epizodda diqqətsiz olsan, rəqib sizi cəzalandıra bilər. İsveçrəyə hesabı qorumaq üçün yox, oyunumuzu daha da yaxşılaşdırmaq və qələbə qazanmaq üçün gedəcəyik”, - deyə mütəxəssis əlavə edib.
Tofiq Bəhramov adına Respublika Stadionunda oynanılan matç “Qarabağ”ın 3:2 hesablı qələbəsi ilə yekunlaşıb. Cavab oyunu iyulun 27-də İsveçrədə keçiriləcək. “Sürix”i üstələyəcəyi təqdirdə, “Qarabağ” UEFA Çempionlar Liqasının üçüncü təsnifat mərhələsində “Ferentsvaroş” (Macarıstan) - “Slovan” (Bratislava, Slovakiya) cütünün qalibi ilə üz-üzə gələcək. Əks halda, Azərbaycan təmsilçisi Avropa Liqasının eyni raundunda “Linfild” (Şimali İrlandiya) - “Budyo Qlimt” (Norveç) cütünün məğlub komandası ilə görüşəcək.
"Qarabağ" birinci təsnifat mərhələsində Polşa "Lex"ini iki oyunun nəticəsinə əsasən mübarizədən kənarlaşdırıb - 0:1;5:1. “Sürix" isə avrokuboklarda mübarizəyə bu mərhələdən başlayıb.
Bölmənin digər xəbərləri
