“Rossiyskaya qazeta”: İlham Əliyev səmimi, mətbuat üçün açıq insandır
Moskva, 24 dekabr, AZƏRTAC
“Rossiyskaya qazeta” nəşrində Stanislav Belyayevin “Azərbaycan Prezidenti İlham Əliyevin 60 yaşı tamam oldu” sərlövhəli məqaləsi dərc edilib.
AZƏRTAC xəbər verir ki, məqalə müəllifi bildirir ki, bu gün, dekabrın 24-də Azərbaycan Prezidenti İlham Əliyevin 60 yaşı tamam olur. dövlət xadimləri, elm və mədəniyyət adamları, Prezidentin həmkarları və dostları bu yubileyi qeyd edirlər. Müəllif Prezident İlham Əliyevin həyatından maraqlı faktlara istinadla yazır ki, Azərbaycan dövlətinin başçısı Rusiya ilə Azərbaycan arasında dostluğun möhkəmlənməsi, iqtisadi və mədəni əməkdaşlığın inkişafı üçün çox iş görüb.
S.Belyayev xatırladıb ki, İlham Əliyev o vaxt Azərbaycan SSR Dövlət Təhlükəsizlik Komitəsinin əks-kəşfiyyat şöbəsinin rəhbəri olan Heydər Əliyevin ailəsində doğulub. Onun anası Zərifə Əliyeva həkim idi. Zərifə xanım sonralar ölkənin aparıcı oftalmoloqu, professor, Azərbaycan Elmlər Akademiyasının həqiqi üzvü olub.
İlham orta məktəbi bitirəndən sonra Moskva Dövlət Beynəlxalq Münasibətlər İnstitutuna (MDBMİ) daxil olub, daha sonra tarix elmləri namizədi alimlik dərəcəsi almaq üçün dissertasiya müdafiə edib. Azərbaycanın neft siyasətinin geosiyasi aspektlərinə dair bir sıra tədqiqat işlərinin müəllifidir. Azərbaycan, rus, ingilis, fransız və türk dillərini bilir.
Məqalədə deyilir: “1983-cü ildə o, Mehriban Paşayeva ilə evlənib. Ziyalı azərbaycanlı ailəsindən olan Mehriban İ.M.Seçenov adına Birinci Moskva Dövlət Tibb İnstitutunu fərqlənmə diplomu ilə bitirib. Onların üç övladı var: qızları Leyla və Arzu, oğlanları Heydər.
İlham Əliyevin dövlətçilik sahəsində karyerası uğurlu olub. 2003-cü ildə Azərbaycan Prezidenti vəzifəsində atasını əvəz edib. Oğul Əliyev prezident seçkilərində dörd dəfə - 2003-cü, 2008-ci, 2013-cü və 2018-ci illərdə qalib gəlib”.
Müəllif vurğulayır ki, İlham Əliyev dinə dərin etiqad bəsləyir. O, üç dəfə Həcc ziyarətində olub. 2009-cu ildə onun adı “Dünyanın ən nüfuzlu 500 müsəlmanı” adlı kitaba daxil edilib.
“Rossiyskaya qazeta”dakı məqalədə deyilir: “İlham Əliyev səmimi, mətbuat üçün açıq insandır. Düz on il bundan əvvəl “Hakimiyyət formulu” verilişində jurnalist Mixail Qusman ona belə bir sual vermişdi: “Təsəvvür edin ki, Siz hansısa zaman maşınının köməyi ilə keçmişə qayıda bilərdiniz. Bu halda keçmişdəki hansı hadisələri bir daha hiss etmək istərdiniz?” İlham Əliyev bu sualın cavabında deyib: “Fikrimcə, mən bunu istəməzdim, ona görə ki, bir dəfə yaşanmış, hətta ən sevindirici hadisə belə ikinci dəfə eyni effekti verməyəcək. Əgər belə bir imkan olsaydı, mən, məsələn, on il irəliyə getmək istərdim. Baxardım, görək düşündüklərim baş tutubmu və nə dərəcədə baş tutub. Bax bunu böyük məmnuniyyətlə edərdim”. O vaxtdan on il keçib və indi İlham Əliyev bir vaxt düşündüklərinin baş tutub-tutmaması sualına cavab verə bilər”.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
