RUSİYADAKI AZƏRBAYCAN DİASPORU NOVRUZ BAYRAMINI QEYD ETMİŞDİR
Moskva, 22 mart (AZƏRTAC). Moskvadakı “Bakı” kinokonsert kompleksinin salonunda Ümumrusiya Azərbaycan Konqresinin (ÜAK) və onun Moskva regional bölməsinin təşkilatçılığı ilə Novruz bayramına həsr olunmuş tədbir keçirilmişdir.
Tədbir ÜAK-ın Moskva bölməsi nəzdində yaradılmış Rusiya Azərbaycan Qadınları Birliyinin təşkilatçılığı ilə qadın rəssamlarımızın əsərlərindən ibarət sərginin aşılışı ilə başlanmışdır. ÜAK-ın icraçı direktoru Eldar Quliyev diaspor nümayəndələrini əziz Novruz bayramı münasibətilə təbrik etmiş, əsərləri nümayiş etdirilən rəssam xanımlara minnətdarlığını bildirmişdir.
Rusiya Azərbaycan Qadınları Birliyinin sədri Aytən Pepinova qurumun fəaliyyəti barədə məlumat verərək, sərgidə təmsil olunan rəssamları təqdim etmişdir. O bildirmişdir ki, Birliyin əsas məqsədlərindən biri qadınların mənəvi, intellektual və yaradıcı potensialının Azərbaycan və Rusiyanın mədəniyyət sahəsində ən yaxşı nailiyyətlərinin ahəngdar vəhdətində reallaşdırılmasına şərait yaratmaqdan ibarətdir. Bu sərginin təşkili həmin istiqamətdə atılımış ilk addım olmuşdur ki, bu da heç şübhəsiz, mədəni ictimaiyyətin diqqətini qadınlarımızın yaradıcılığına cəlb etməyə imkan verəcək, iki xalq arasında dostluğun və əməkdaşlığın genişlənməsində və möhkəmlənməsində müsbət rol oynayacaqdır.
Sərginin ekspozisiyasına artıq Rusiyada və xaricdə tanınmış əsərlər daxil olmuşdur. Hazırda Londonda yaşayan Ülvi Pepinova-Ceyms müasir incəsənətin ən dəbdə olan istiqamətlərindən biri sayılan şüşə üzərində naxışı üslubunda maraqlı əsərlər nümayiş etdirir. Tanınmış rəssam, filosof Maya Bədəlbəyli, Rəssamlar İttifaqının və YUNESKO yanında Beynəlxalq Plastik Sənətlər Assosiasiyasının üzvü Leyla Fərəcova, Xatirə Neyson, rəssam-keramist Qərənfil Qurbanova, habelə Ümumrusiya Tələbə Yaradıcılığı festivalının laureatı Aygün Musayeva sərginin qonaqlarına Şərq və Qərb mədəniyyətlərinin qarşılıqlı təsiri nəticəsində ərsəyə gəlmiş orijinal əsərlər təqdim etmişlər.
Sərgidən sonra Moskvadakı milli yaradıcı kollektivlərin, habelə Parisdən gəlmiş pianoçu Renarə Axundovanın iştirakı ilə bayram konserti olmuşdur.
Tədbirdə diasporumuzun, Rusiya ictimaiyyətinin, habelə ÜAK-ın gənclər cinahının nümayəndələri iştirak etmişlər.
Asya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
