TÖKÜLƏN QAN QİSASSIZ QALMAZ
Bakı, 26 fevral (AZƏRTAC). Fevralın 25-də Şövkət Ələkbərova adına mədəniyyət evində Xocalı faciəsinə həsr olunmuş ədəbi-bədii gecə keçirilmişdir.
Xocalı qurbanlarının xatirəsi bir dəqiqəlik sükutla yad edilmişdir.
Bakıdakı 58 saylı orta məktəblə birgə təşkil olunan tədbirdə çıxış edən mədəniyyət evinin direktoru Venera Quliyeva faciədən 18 il keçməsinə baxmayaraq, yaralarımızın hələ də qaysaqlanmadığını, yalnız torpaqlarımız geri qaytarıldıqdan sonra dərdlərimizə məlhəm olunacağını, şəhid ruhlarının dinclik tapacağını vurğulamışdır.
58 saylı məktəbin tarix müəllimi Rəhilə Xankişiyeva, Xocalı Şəhər İcra Hakimiyyətinin nümayəndəsi Nadir Rəşidov, Xocalı sakini, “Qarabağ harayı” təşkilatının üzvü Aygün İbrahimova şəhərin müdafiəsi uğrunda döyüşlərdə qəhrəmanlıqla həlak olmuş əsgərlərimizin gənc nəslə nümunə olmasından danışmış, işğal olunmuş torpaqlarımızın tezliklə azad olunacağına əminliklərini ifadə etmişlər.
Sonra şagirdlər “Tökülən qan qisassız qalmaz” adlı ədəbi-bədii kompozisiya göstərmişlər.
Tədbir çərçivəsində faciəni əks etdirən fotosərgi, “Odların içində yandı Xocalım” adlı stend nümayiş etdirilmişdir.
Bölmənin digər xəbərləri
