Bakı, 28 iyul, AZƏRTAC

Azərbaycan Prezidenti İlham Əliyev Şuşa Qlobal Media Forumunda çıxışında deyib: “İkinci Qarabağ müharibəsi zamanı Türkiyə, onun rəhbərliyi və xalqı ilk gündən, ilk saatlardan bizimlə çiyin-çiyinə dayanmışdı. O zaman Prezident Ərdoğanın Qarabağ müharibəsinin ilk saatlarında verdiyi “Azərbaycan yalnız deyil!” bəyanatı, bizim üçün çox böyük bir dəstək idi. Bütün 44 gün ərzində biz həmin o mənəvi dəstəyi qardaşlarımızdan hiss etdik. Prezident Ərdoğan bir neçə dəfə ictimai şəkildə Türkiyənin mövqeyini bəyan etdi və digər dövlət rəsmiləri də bu məsələ ilə bağlı fikirlərini bildirdilər. Bu, bizim üçün çox böyük mənəvi və siyasi dəstək idi”.

Dövlətimizin başçısının bu fikirlərini AZƏRTAC-a şərh edən “Qardaşlığımız Əbədidir” QHT Koalisiyasının və “Tərxis Olunmuş Hərbçilərin Gəncləri Maarifləndirmə” İctimai Birliyinin sədri, hərbi ekspert Emin Həsənli Türkiyənin Vətən müharibəsi dövründə Azərbaycana dəstəyindən danışaraq bildirib ki, o zaman koronavirus pandemiyası olmasına baxmayaraq qardaş ölkənin bir çox şəhər və qəsəbələrində əhali küçələrə çıxaraq ölkəmizin haqlı mübarizəsində onun yanında olduğunu bəyan etdi. Müharibənin ilk saatlarından etibarən Türkiyə Prezidenti Rəcəb Tayyib Ərdoğan Azərbaycana həm mənəvi, həm də siyasi dəstək verib. Həmin dəstək tarixi Qələbənin təmin olmasında mühüm addım idi.

E.Həsənli söyləyib ki, Rəcəb Tayyib Ərdoğan Vətən müharibəsi zamanı çıxışlarının birində hər hansı üçüncü bir dövlətin müharibəyə daxil olduğu təqdirdə, Türkiyənin Azərbaycan tərəfindən müharibəyə qoşulacağını bildirib. Həmin çıxış qardaşlığın açıq nümunəsi idi. Azərbaycan və Türkiyə arasında Bəyannamənin məhz işğaldan azad edilmiş, Qarabağın incisi olan Şuşada imzalanması bütün dünya üçün açıq mesaj oldu. Şuşa Bəyannaməsi iki qardaş ölkənin hərbi-siyasi, iqtisadi sahələrdə müttəfiqliyinin hüquqi əsasıdır. Strateji əhəmiyyət kəsb edən Bəyannamədə beynəlxalq müstəvidə birgə əməkdaşlıq, siyasi münasibətlər, iqtisadi-ticarət əlaqələri, mədəniyyət, təhsil, idman, gənclər siyasəti kimi bir çox önəmli məsələlər əksini tapıb. Şuşa Bəyannaməsinin imzalanması Türkiyə və Azərbaycan müttəfiqliyini ən yüksək səviyyəyə qaldırdı.

Türkiyə və Azərbaycan qardaşlığı Ümummilli Lider Heydər Əliyevin “Türkiyə və Azərbaycan bir millət, iki dövlətdir” şüarına əsaslanır. Hazırda prezidentlər İlham Əliyev və Rəcəb Tayyib Ərdoğanın uzunmüddətli dostluğu, dövlət başçıları arasındakı qarşılıqlı inam, etibar və qardaşlıq münasibətləri ən yüksək səviyyədə davam edir.

Forumda Prezidentimiz bu məsələyə də toxunaraq deyib: “Bizim Prezident Ərdoğanla şəxsi dostluğumuz təkcə regionda deyil, dünyada məlum bir faktdır. Bu, regional inkişaf və sabitlik baxımından çox mühüm amildir. Eyni zamanda, Türkiyə və Azərbaycan xalqları arasında da münasibətlər, əlbəttə ki, uzunmüddətli dostluq və qardaşlıq əlaqələri üzərində qurulubdur. Bu, çox gözəl təməldir və bizim ölkələrimiz məhz bu təməl üzərində inkişaf edir, bir-birini dəstəkləyir”.

İctimai Birliyinin sədri əlavə edib ki, Türkiyədəki meşə yanğınları, daha sonra Kahramanmaraşda baş vermiş “Əsrin faciəsi” kimi adlanan zəlzələdə Azərbaycan xalqı türkiyəli qardaş və bacılarının yanında olub. “Mustafa Kamal Atatürkün “Azərbaycanın sevinci sevincimiz, kədəri kədərimizdir” ideyaları və Ulu Öndər Heydər Əliyevin daim Türkiyə-Azərbaycan qardaşlığına verdiyi yüksək dəyər hazırkı münasibətlərin təminatıdır. Hər iki dövlətin apardığı siyasət regionda sülhün qorunması və bərqərar olması baxımından vacibdir. Qardaşlıq əlaqələri Türk Dövlətləri Təşkilatında da böyük rola malikdir. Rəcəb Tayyib Ərdoğanın Azərbaycanın Vətən müharibəsindəki Qələbəsindən sonra paytaxtımızın Azadlıq meydanında keçirilən hərbi paradda iştirakı, Füzuli-Zəngilan Hava limanlarının açılışına şəxsən təşrif buyurması bu mənəvi dəstəyin davamı idi.

“Təsadüfü deyil ki, Azərbaycan iqtisadiyyatına ən böyük investisiyanı qardaş ölkə Türkiyə qoyub. Beynəlxalq təşkilatlarda hər iki dövlətin daim biri-birini müdafiə etməsi bu dostluğun və əməkdaşlığın gələcəkdə inkişaf edəcəyini göstərir”, - deyə hərbi ekspert diqqətə çatdırıb.