MƏDƏNİYYƏT
Ulu Öndərin xatirəsinə həsr edilmiş tədbir - Heydər Əliyev uşaqların gözü ilə
![](/files/galleryphoto/2023/1/1200x630/16819193573393228283_1200x630.jpg)
![](/files/galleryphoto/2023/1/1200x630/16819193575802943577_1200x630.jpg)
![](/files/galleryphoto/2023/1/1200x630/16819193574581822074_1200x630.jpg)
![](/files/galleryphoto/2023/1/1200x630/16819193571618065389_1200x630.jpg)
![](/files/galleryphoto/2023/1/1200x630/1681919357413127556_1200x630.jpg)
![](/files/galleryphoto/2023/1/1200x630/16819193571044813234_1200x630.jpg)
![](/files/galleryphoto/2023/1/1200x630/1681919357953559433_1200x630.jpg)
![](/files/galleryphoto/2023/1/1200x630/16819193574051412832_1200x630.jpg)
![](/files/galleryphoto/2023/1/1200x630/168191935747515402_1200x630.jpg)
![](/files/galleryphoto/2023/1/1200x630/16819193573451930981_1200x630.jpg)
![](/files/galleryphoto/2023/1/1200x630/16819193575926140080_1200x630.jpg)
![](/files/galleryphoto/2023/1/1200x630/16819193575563415084_1200x630.jpg)
![](/files/galleryphoto/2023/1/1200x630/16819193572910744694_1200x630.jpg)
![](/files/galleryphoto/2023/1/1200x630/16819193575492631682_1200x630.jpg)
Bakı, 19 aprel, AZƏRTAC
Aprelin 19-da Yeni Azərbaycan Partiyası (YAP) Xətai rayon təşkilatının və 194 nömrəli tam orta məktəbin birgə təşkilatçılığı ilə “Heydər Əliyev İli” çərçivəsində “Heydər Əliyev uşaqların gözü ilə” mövzusunda tədbir keçirilib.
AZƏRTAC xəbər verir ki, 194 nömrəli tam orta məktəbin akt zalında reallaşan tədbirdə Dövlət Himni səsləndirilib, müasir müstəqil Azərbaycan dövlətinin qurucusu, Ulu Öndər Heydər Əliyevin və ərazi bütövlüyümüz uğrunda şəhidlik zirvəsinə ucalan Vətən oğullarının xatirəsi bir dəqiqəlik sükutla yad edilib.
Tədbirdə çıxış edən məktəbin direktoru Elnarə Zeynalova bildirib ki, Ümummilli Liderin dövlətimiz, xalqımız qarşısındakı xidmətlərinin miqyası o qədər genişdir ki, bu barədə günlərlə, aylarla danışmaq olar: “Ulu Öndər Heydər Əliyevin fəaliyyətinin hər bir istiqaməti geniş tədqiqat mövzusudur. Təhsili millətin gələcəyi kimi dəyərləndirən Ümummilli Lider hakimiyyətinin hər iki dövründə gənclərimizin təhsilinə, elmin sirlərinə dərindən yiyələnmələrinə xüsusi diqqət göstərmiş və bu qayğısını davamlı addımları ilə təsdiqləyib. Bu gün Azərbaycan dünyada innovasiyalar ölkəsi kimi tanınır və nüfuz qazanır. Təbii ki, bu uğurun əsasında dahi şəxsiyyət Heydər Əliyevin düşünülmüş və məqsədyönlü siyasəti və son 20 ilə yaxın dövrdə bu xəttin Prezident İlham Əliyev tərəfindən uğurla davam etdirilməsi dayanır”.
YAP Xətai rayon təşkilatının sədri Vüqar Rəhimzadə çıxışında Ulu Öndər Heydər Əliyevin xilaskarlıq missiyasından geniş bəhs edib. Bildirib ki, bu gün hər bir Azərbaycan gənci müstəqillik yolumuzun heç də hamar olmaması barədə aydın təsəvvürə malik olmalıdır. Bugünkü inkişaf üçün kimə borclu olduğumuzu bilməli, onlara əmanət olan Heydər Əliyev irsini qorumalı və geniş təbliğ etməlidirlər.
“1993-cü ildə Ulu Öndər Heydər Əliyev xalqın təkidli tələbi ilə hakimiyyətə qayıtmasaydı bu gün Azərbaycan adlı dövlətdən danışmaq qeyri-mümkün idi. Dahi şəxsiyyətin zəngin dövlətçilik təcrübəsinin, ən əsası torpaq, Vətən sevgisini özündə əks etdirən düşünülmüş siyasətinin nəticəsində Azərbaycan dövlət müstəqilliyini əbədi və sarsılmaz etdi. Bu gün hər bir Azərbaycan gənci belə müasir müstəqil, qalib ölkənin vətəndaşı olduğu üçün qürurludur”, - deyə Vüqar Rəhimzadə söyləyib.
Milli Məclisin deputatı Ziyad Səmədzadə Ulu Öndər Heydər Əliyevin dayanıqlı iqtisadi inkişafa nail olmaq üçün irəli sürdüyü təşəbbüslərdən, reallaşdırdığı addımlardan geniş söhbət açıb: “Ümummilli Liderin milli neft strategiyasının uğurla reallaşdırılması nəticəsində xalqımız öz təbii sərvətlərinin tam sahibinə çevrilib və qısa müddətdə ölkəmizin inkişafına güclü təkan verən resurslar əldə edilib. Bu gün qalib Azərbaycan Ulu Öndər Heydər Əliyevin müəllifi olduğu neft strategiyasının uğurlarını yaşayır”.
Milli Məclisin deputatı Arzu Nağıyev sabitliyin hər bir inkişafın əsasında dayanan amil olduğunu önə çəkərək Ulu Öndər Heydər Əliyevin gələcəyə hesablanmış siyasəti nəticəsində Azərbaycanın qısa müddətdə sabitlik diyarına çevrildiyini xüsusi qeyd edib. Bu gün Azərbaycanın demokratiya təcrübəsi dünyaya nümunədir.
“Ümummilli Lider Heydər Əliyevin xalqa, dövlətə bağlılığı fəaliyyətinin bütün dövrlərində özünün aydın ifadəsini tapır” söyləyən Milli Məclisin deputatı Aydın Mirzəzadə dahi şəxsiyyətin Vətən sevgisindən bəhs edib. Deputat əlavə edib ki, Ulu Öndərin “Mən həmişə fəxr etmişəm, bu gün də fəxr edirəm ki, mən azərbaycanlıyam!” müdrik kəlamı harada yaşamasından asılı olmayaraq hər bir azərbaycanlının həyat amalına çevrilib.
Milli Məclisin deputatı Bəhruz Məhərrəmov hər bir uğurumuzun Heydər Əliyev siyasətinin təntənəsi olduğunu diqqətə çatdırıb. Söyləyib ki, Ümummilli Liderin 2003-cü ildə xalqa tarixi müraciəti Azərbaycanın davamlı uğurlarının əsası oldu: “Ölkəmizin 20 ilə yaxın dövrdə qazandığı nailiyyətlər göz qabağındadır. Artıq iki ildən çoxdur ki, tarixi Zəfərimizlə qürur duyur, onun yaratdığı reallıqları yaşayırıq”.
Çıxışlarda ümumi fikir bu olub ki, torpağını, xalqını, Vətənini canından artıq sevən, daim ölkəmizin ən yüksək zirvələri fəth etməsini, ərazi bütövlüyünün təmin olunmasını arzulayan Ulu Öndər Heydər Əliyevin ruhu şaddır. Azad Qarabağda və azad Şərqi Zəngəzurda Azərbaycanın üçrəngli bayrağı dalğalanır.
Tədbirdə uşaqların dili ilə dahi şəxsiyyət Heydər Əliyevin tezisləri, dünya liderlərinin Ümummilli Lider haqqında söylədiyi fikirlər səslənib. Ulu Öndər, azad Qarabağ və Vətənlə bağlı şeirlər söylənilib. Tədbir “Sən elə bir zirvəsən...” mahnısının sədaları altında yekunlaşıb.