Bakı, 11 mart, AZƏRTAC

2020-2021-ci tədris ili üçün ölkənin bütün ümumi təhsil müəssisələrinin birinci siniflərinə şagird qəbulu davam edir.

Təhsil Nazirliyindən AZƏRTAC-a bildirilib ki, qəbul www.mektebeqebul.edu.az sistemi vasitəsilə elektron qaydada həyata keçirilir. Sistemdə onlayn qeydiyyat aktivləşdirilib. Məktəb seçimi isə martın 13-dən sentyabrın 14-dək həyata keçiriləcək.

2020-2021-ci tədris ili üçün ümumtəhsil məktəbləri, lisey və gimnaziyalarda I sinfə şagird qəbulu Azərbaycan bölməsi üzrə ümumi qaydada, tədrisin digər dillərdə aparıldığı bölmələrə isə uşaqların şifahi nitq bacarıqlarının qiymətləndirilməsi yolu ilə həyata keçirilir (Bakı Avropa Liseyi, Respublika İncəsənət Gimnaziyası və Bülbül adına orta ixtisas musiqi məktəbləri istisna olmaqla).

“Ümumi təhsil haqqında” Azərbaycan Respublikası Qanununa əsasən, tədrisin digər dildə aparıldığı məktəbəhazırlıq qruplarına cəlb olunmuş uşaqların birinci siniflərə qəbulu həmin dildə şifahi nitq bacarığını qiymətləndirən müsahibələrin nəticəsi əsasında həyata keçirilir. Artıq tədrisin digər dildə aparıldığı məktəbəhazırlıq qruplarına cəlb olunmuş uşaqların müsahibələri yekunlaşıb.

Məktəbəhazırlıq qruplarına cəlb olunmamış digər dildə təhsil almaq istəyən uşaqların birinci siniflərə qəbulu həmin dildə şifahi nitq bacarığını qiymətləndirən müsahibələrin nəticəsi əsasında həyata keçiriləcək. Bu müsahibələr aprelin 1-dən başlayaraq təşkil olunacaq. Uşaqları müsahibədən uğurla keçən valideynlər mayın 1-dən etibarən məktəb seçiminə başlaya bilərlər.

Məktəbəhazırlıq qruplarında təhsil alan uşaqların növbəti tədris ili üçün həmin məktəbin I sinfinə qəbulu sistemdə avtomatik elektron sorğu yaradılmaqla həyata keçirilir.