Xalq artisti Aralıq dənizindən Volqa sahilinədək Azərbaycan musiqisini təqdim edib
Bakı, 28 mart, AZƏRTAC
Azərbaycanın Xalq artisti, Qara Qarayev adına Dövlət Kamera Orkestrinin bədii rəhbəri və baş dirijoru Fəxrəddin Kərimov iki həftə davam edən qastrollardan sonra vətənə qayıdıb.
AZƏRTAC xəbər verir ki, martın 14-də Antalya Dövlət Simfonik Orkestrinə rəhbərlik edən dirijor və həyat yoldaşı pianoçu Yuliya Kərimova Türkiyə və Azərbaycan xalqlarının dostluğuna həsr olunmuş tədbirdə çıxış ediblər. Onların ifasında fortepiano konserti və Fikrət Əmirovun “Azərbaycan kapriççiosu”, Qara Qarayevin “Don Kixot” əsərləri təqdim olunub. Çıxış Türkiyə mətbuatı tərəfindən geniş işıqlandırılıb və bu mədəni tədbirlə bağlı müsbət rəylər dərc olunub.
Bir həftə sonra, martın 23-də “Dünya, dövr, adlar...” Beynəlxalq festivalı çərçivəsində Ulyanovsk Simfonik Orkestri tanınmış azərbaycanlı maestronun rəhbərliyi ilə “Mədəniyyətlərin qovşağında” adlı geniş konsert proqramı ilə çıxış edib. Burada rus klassikləri ilə yanaşı, Fikrət Əmirov və Qara Qarayevin əsərləri səsləndirilib. Ulyanovskdakı Azərbaycan diasporunun rəhbəri İslam Hüseynov konsertdən əvvəl tamaşaçılar qarşısında çıxış edib.
Bölmənin digər xəbərləri
