Xersonda Bakının Qız qalası ucaldılmışdır
Kiyev, 9 sentyabr (AZƏRTAC). Xerson Dövlət Universitetinin Botanika bağında açıq səma altında yerləşən Milli Mədəniyyətlər Muzeyində Xersonda yaşayan Azərbaycan diasporunun rəmzi kimi Qız qalası ucaldılmışdır.
Qız qalası modelini hər iki tərəfdən neft buruqları və yelkənli qayıqları görünən şərti Xəzər dənizi əhatə edir. Qız qalası Milli Mədəniyyətlər Muzeyinin buradakı eksponatlarını tamamlamışdır. Muzeyin ilk eksponatı bolqar xalqının müqəddəs ziyarətgahlarından biri Şipka olmuşdur. Onun ikinci eksponatı - Stenu Plaça abidəsi Xersonun yəhudi icmasının üzvləri tərəfindən şəhərə hədiyyə edilmişdir. Sonra burada Almaniyanın rəmzi olan Brandenburq darvazası və Yunanıstanın rəmzi sayılan Akropol yaradılmışdır.
Şəhərin başçısı Vladimir Saldonun və Xerson şəhər başçısı yanında İctimai şuranın üzvlərinin təşəbbüsü ilə açıq səma altında Milli Mədəniyyətlər Muzeyinin yaradılması işi başlanmışdır. Xersonda nümayəndələri yaşayan ölkələrin ən əlamətdar yerlərinin modelləri Xerson qalasının landşaft modeli ilə yanaşı yerləşir.
Xersonda 110-dan çox millətin və xalqın nümayəndələri yaşayır.
Açıq səma altında Milli Mədəniyyətlər Muzeyi rəsmi şəkildə sentybarın 15-də Xersonda, Şəhər günündə açılacaqdır.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
