Yeni Azərbaycan Partiyası yarandığı gündən cəmiyyətin aparıcı qüvvəsinə çevrilib
Qaxda Yeni Azərbaycan Partiyasının yaradılmasının 33-cü ildönümü qeyd olunub
Qax, 21 noyabr, Mustafa Dadaşov, AZƏRTAC
Müstəqil Azərbaycanın memarı və qurucusu, Ümummilli Lider Heydər Əliyevin rəhbərliyi ilə 33 il bundan əvvəl yaradılan Yeni Azərbaycan Partiyası (YAP) şərəfli bir yol keçib, milli ideyalara sadiqliyini hər daim sübuta yetirib. YAP yarandığı gündən etibarən xalqın səsinə cavab verən, ölkənin gələcəyi üçün məsuliyyət daşıyan və dövlətçiliyin qorunması üçün qətiyyət nümayiş etdirən siyasi qüvvə kimi formalaşıb. Otuz üç illik fəaliyyəti dövründə sıralarını kəmiyyət və keyfiyyət baxımından daha da möhkəmləndirən YAP xalqın sevgisi və dəstəyi ilə ümumxalq partiyasına çevrilib.
AZƏRTAC-ın bölgə müxbiri xəbər verir ki, bu fikirlər Yeni Azərbaycan Partiyasının yaradılmasının 33-cü ildönümü münasibətilə noyabrın 21-də YAP Qax rayon təşkilatının təşkilatçılığı ilə keçirilən tədbirdə səsləndirilib.
Tədbir iştirakçıları əvvəlcə partiyanın yaradıcısı, Ümummilli Lider Heydər Əliyevin şəhərin mərkəzində ucaldılan abidəsi önünə gül dəstələri düzüb, xatirəsini ehtiramla yad ediblər.
YAP Qax rayon təşkilatında keçirilən tədbir Dövlət Himninin səsləndirilməsi ilə başlayıb, Ulu Öndərin və şəhidlərin xatirəsi bir dəqiqəlik sükutla yad edilib.
YAP rayon təşkilatının sədri Natiq Allahverdiyevin “Yeni Azərbaycan Partiyası – 33 illik şərəfli yol” mövzusunda məruzəsində partiyanın yaranma tarixindən, Ulu Öndər Heydər Əliyevin partiyanın həyatındakı fəaliyyətindən, partiyanın seçkilərdəki qələbəsindən, 33 ildə əldə etdiyi uğurlardan ətraflı bəhs olunub. Bildirilib ki, ölkənin ictimai-siyasi həyatında aparıcı rol oynayan, yarandığı gündən xalqın partiyasına çevrilən Ümummilli Lider Heydər Əliyevin yaratdığı YAP-ın 33-cü ildönümünü tarixi bir anlarda – 44 günlük Vətən müharibəsində Müzəffər Ali Baş Komandan, Prezident, Yeni Azərbaycan Partiyasının sədri İlham Əliyevin diplomatik siyasəti, şanlı Ordumuzun, rəşadətli əsgər və zabitlərimizin qəhrəmanlığı sayəsində əldə edilən Zəfərin beş illiyinin sevincini yaşadığımız günlərdə qeyd edirik.
Vurğulanıb ki, bu gün YAP 700 mindən çox üzvü özündə birləşdirən geniş sosial bazası, intellektual potensialı, dövlətçilik ideyalarına sadiqliyi ilə siyasi sistemdə aparıcı mövqedədir. Partiyanın sıralarında gənclərin fəallığı, cəmiyyətin müxtəlif təbəqələrinin iştirakı ölkənin gələcəyi üçün etibarlı kadr ehtiyatı yaradır. YAP yalnız bir siyasi təşkilat deyil, həm də dövlətçilik məktəbi, idarəetmə strategiyasının formalaşdırıldığı platforma, milli inkişaf konsepsiyasının ideoloji mərkəzidir.
Qeyd olunub ki, YAP-ın 33 illik fəaliyyəti göstərir ki, milli maraqlar üzərində qurulan, xalqın iradəsinə söykənən, dövlətçilik fəlsəfəsini özündə birləşdirən siyasi xətt zamanın bütün sınaqlarından keçə bilir. Bu illər ərzində Azərbaycan güclənib, sabitlik əldə edib, dünya miqyasında etibarlı tərəfdaş kimi tanınıb. Dövlətin strateji inkişaf xətti uğurla həyata keçirilir və bu xəttin ardıcıllığını Prezident İlham Əliyevin qətiyyətli siyasəti təmin edir.
Diqqətə çatdırılıb ki, 49 ərazi ilk partiya təşkilatını özündə birləşdirən rayon təşkilatının hazırda 5229 üzvü var. Partiya üzvləri rayonun ictimai-siyasi həyatında fəal rol oynayırlar.
Tədbirdə Qax şəhər Namiq Allahverdiyev adına 2 nömrəli məktəb-liseyin direktoru Aybəniz Məmmədova, Vətən müharibəsi iştirakçısı Polad Seyidli, rayon Gənclər və İdman Sektorunun müdiri Elvin Həsilov çıxış edərək, Azərbaycan dövlətçiliyinin formalaşmasında, ictimai-siyasi sabitliyin bərqərar olmasında, ölkəmizin beynəlxalq aləmdə nüfuzunun artmasında Yeni Azərbaycan Partiyasının mühüm rolu və xidmətləri olduğunu bildiriblər.
Tədbirdə Qax Rayon İcra Hakimiyyətinin başçısı Elvin Paşayev çıxış edərək, bütün həyatını və fəaliyyətini öz xalqının xoşbəxtliyinə həsr etmiş Ümummilli Lider Heydər Əliyevin Azərbaycanın inkişafı və tərəqqisi naminə misilsiz xidmətlərindən danışıb. Vurğulanıb ki, Heydər Əliyev tarixə Azərbaycan dövlətinin müstəqilliyinin dönməzliyini və əbədiliyini təmin edən, azərbaycançılığı dövlət ideologiyasına çevirən, istənilən vəziyyətdən öz ölkəsinin, xalqının, dövlətinin mənafeyinə yararlanmağı bacaran bir lider kimi düşüb.
Tədbirin sonunda YAP sıralarına yeni daxil olan şəxslərə üzvlük vəsiqələri, partiya həyatında fəallıq göstərən üzvlərə fəxri fərmanlar, həmçinin yubiley yaşını qeyd edən partiya üzvlərinə hədiyyələr təqdim edilib.
Sonda partiya həyatına aid videoçarx nümayiş olunub.
Bölmənin digər xəbərləri
