Mayın 11-də Heydər Əliyev adına İdman-Konsert Kompleksində Yeniyetmələrin 4-cü Respublika Oyunlarının final mərhələsinin açılışı olmuşdur. Oyunlar Milli Olimpiya Komitəsi, gənclər, idman və turizm, təhsil nazirlikləri, Respublika Həmkarlar İttifaqları Konfederasiyası tərəfindən təşkil edilmişdir.

Əvvəlcə yarış iştirakçıları Fəxri xiyabana gələrək, ümummilli liderimiz, Prezident Heydər Əliyevin məzarını ziyarət etmiş, əklil qoymuşlar. Sonra onlar Şəhidlər xiyabanına getmiş, “Əbədi məşəl” abidəsinin önünə əklillər qoymuşlar.

Oyunlar 1998-ci ildən keçirilir və elə həmin il də onların iki ildən bir təşkili barədə qərar qəbul olunmuşdur. Birinci Oyunların açılış mərasimində ümummilli lider, Prezident Heydər Əliyev iştirak etmişdir. Ölkəmizin idman həyatında əhəmiyyətli hadisəyə çevrilmiş və 2004-cü ilin yanvarında başlamış indiki yarışlar iştirakçıların və tədbirlərin sayına görə əvvəlkilərdən seçilir. Yarışlar idmanın 16 növü üzrə üç mərhələdə keçirilmişdir. Yanvar-fevral aylarında rayon və şəhər birincilikləri, mart-aprel aylarında isə zona birincilikləri olmuşdur. Bu il oyunlarda 20 mindən çox oğlan və qız iştirak etmişdir. Final mərhələsinə zona yarışlarında qalib gəlmiş 4 minə yaxın idmançı çıxmışdır. Mayın 11-də başlamış final mərhələsi ayın 21-də başa çatacaqdır. Onların keçirilməsi üçün ən yaxşı idman meydançaları və kompleksləri ayrılmışdır.

Ölkənin bütün regionlarını təmsil edən komandaların iştirakçıları idman marşının sədaları altında salona daxil oldular.

Görkəmli siyasi və dövlət xadimi Heydər Əliyevin xatirəsi bir dəqiqəlik sükutla yad edildi.

Gənclər, idman və turizm naziri Əbülfəz Qarayev çıxış edərək bildirdi ki, kütləvi idmanın, bədən tərbiyəsinin inkişaf etdirilməsi və bütövlükdə, ölkənin idman həyatının fəallaşdırılması təşəbbüsü ümummilli lider Heydər Əliyevə məxsusdur. O, bütün siyasi və dövləti fəaliyyəti boyu əhalinin sağlamlığının möhkəmləndirilməsində mühüm əhəmiyyəti olan bu sahəyə böyük diqqət yetirmişdir. Son illərdə MOK rəhbərliyinin uzaqgörən siyasəti nəticəsində ölkədə idmanın maddi-texniki bazası möhkəmlənir, paytaxtda və bölgələrdə müasir komplekslər açılır.

Nazir vurğuladı ki, son illərdə Bakıda beynəlxalq yarışların, o cümlədən 2004-cü ildə idmanın bir çox növləri üzrə lisenziya turnirlərinin keçirilməsi ölkə rəhbərliyinin idmanın inkişafı sahəsində uğurlarının, habelə Azərbaycan idmançılarının nailiyyətlərinin dünya idman ictimaiyyəti tərəfindən tanınmasının sübutudur. İdmançılarımızın 2004-cü il Olimpiya oyunlarına 32 lisenziya qazanması bu nailiyyətlərin əldə olunması üçün xeyli səy göstərmiş Azərbaycan Prezidenti, Milli Olimpiya Komitəsinin prezidenti İlham Əliyevin yorulmaz fəaliyyətinin məntiqi nəticəsidir.

Azərbaycanın dövlət himni səsləndirildikdən sonra Oyunların final mərhələsi açıq elan edildi.

Sonra konsert və gənc idmançıların çıxışları oldu.