20 Yanvardan Qarabağ Zəfərinə uzanan mərdlik, şücaət yolu…
Bakı, 19 yanvar, AZƏRTAC
Tariximizə qanlı hadisə kimi həkk olunmuş 20 Yanvar bir xalqın qəhrəmanlıq salnaməsidir. Keçmiş imperiya rəhbərliyinin apardığı riyakar siyasətə etiraz səsini ucaldan xalqımız qətiyyət nümayiş etdirərək meydanlara axışdı. Azadlığı əlindən alınmış, cümhuriyyəti süquta uğradılmış, sərvətləri istismar, talan edilən bir xalqın haqq səsinə namərdcəsinə açılan atəş keçmiş imperiyanın əsl mahiyyətini ortaya qoydu.
Bu fikirləri AZƏRTAC-a açıqlamasında Elm və Təhsil Nazirliyinin Riyaziyyat və Mexanika İnstitutunun böyük elmi işçisi mexanika üzrə fəlsəfə doktoru Emin Bağırov bildirib. Alim qeyd edib ki, otuz üç il bundan əvvəl, yanvarın 19-dan 20-nə keçən gecə sovet ordusunun qoşun birləşmələri Ermənistanın təcavüzkar siyasətindən və keçmiş SSRİ rəhbərliyinin ermənilərə havadarlığından hiddətlənərək paytaxtımızın küçə və meydanlarına çıxıb buna qəti etirazını bildirən geniş xalq kütlələrinə qarşı hərbi əməliyyatlara başladı. Doğma yurdunun, xalqının azadlığını hər şeydən uca tutan neçə-neçə vətənpərvər igid Azərbaycan övladı həmin dəhşətli saatlarda canından keçərək şəhidlik zirvəsinə ucaldı.
Bakıda və ölkəmizin digər rayonlarında törətdiyi misli görünməmiş dəhşətli qırğını, hərbi cinayətini gizlətmək məqsədi ilə mənfur rejim dövlət televiziyasının enerji blokunu partladaraq respublikamızı informasiya blokadasına aldı.
Bundan sonra Bakıda təlım-tələsik, əhali məlumatlandırılmadan fövqəladə vəziyyət rejimi tətbiq edildi. Fövqəladə vəziyyətin elan olunmadığı rayonlarda Neftçalada, Lənkəranda soydaşlarımız qətlə yetirildi. Qanlı statistikaya nəzər salanda məlum olur ki, ümumilikdə 131 nəfər öldürülüb, 744 nəfər yaralanıb, 841 nəfər qanunsuz həbs olunub, 200 ev və mənzil, 80 avtomaşın, o cümlədən təcili yardım maşınları, yandırıcı güllələrin törətdiyi yanğın nəticəsində dövlət və şəxsi əmlak məhv edilib.
Keçmiş sovet hərbi cəllad maşınının Azərbaycanda törətdiyi amansız qanlı qırğınından uzun bir zaman keçməsinə baxmayaraq, xalqımız o müdhiş gecəni daim xatırlayır, həmin faciənin ağrısı ilə yaşayır, bu vəhşiliyi törədənlərə dərin nifrətini bildirir. Hər il yanvarın 20-də minlərlə insan Şəhidlər xiyabanına ziyarətə gedir, Vətənin azadlığı və suverenliyi uğrunda canlarından keçən Azərbaycan oğul və qızlarının əziz xatirəsini ehtiramla yad edir.
O qətliam gecəsindəki vəhşilik tarixdə misli görünməmiş bir təcavüz idi. Elə bir təcavüz idi ki, keçmiş SSRİ, Azərbaycan SSR konstitusiyaları kobudcasına pozulmuşdu, eyni zamanda, BMT Nizamnaməsi, beynəlxalq hüquq normaları, necə deyərlər, ayaqlar altına atılmışdı.
Respublikamızın ozamankı səriştəsiz, kölə psixologiyalı rəhbərliyi isə bu dəhşətli faciədən sonra yenə də xalqla bir olmadı, bu ağrı-acını bölüşmədi, Moskvanın himayəsinə sığınmaqdan başqa bir yol görmədi. Lakin həmin qanlı-qadalı günlərdə Moskvada yaşayan dahi şəxsiyyət Heydər Əliyev xalqı tək buraxmadı, xalqın dərdinə şərik oldu, bu kədəri doğma insanlarla bir yaşadı, hətta həyatını təhlükədə qoyaraq faciənin ertəsi günü Azərbaycanın daimi nümayəndəliyinə gələrək, orada faciəni törədənləri lənətləyən kəskin bəyanatla çıxış etdi, xalqımızın başına gətirilən bu dəhşətli faciəni dünyaya çatdırdı.
Emin Bağırov sonda qeyd edib ki, otuz üç il bundan əvvəl Ermənistanın təcavüzkar siyasətindən qəzəblənərək etirazını bildirmək üçün küçə və meydanlara axışıb respublika və keçmiş SSRİ rəhbərliyinə etirazını bildirən xalqımız, nəhayət, o birliklə, o mütəşəkkilliklə də 2020-ci ilin sentyabrın 27-də Ermənistanın işğalçılıq siyasətinə əks-həmlə ilə cavab verdi. Qırx dörd gün çəkən Vətən müharibəsi ordumuzun parlaq Qələbəsi ilə başa çatdı, bununla da, Azərbaycanın ərazi bütövlüyü gerçəkləşdi. Azadlıq amalı ilə dünyanı heyrətləndirən xalqımız əliyalın tanklar üzərinə gedərək müstəqilliyinə qovuşdu. İllər sonra “dəmir yumruq” kimi birləşərık ərazi bütövlüyünü təmin etdi. Xalq olaraq sübut etdik ki, biz Vətənimizi sevə və onun uğrunda ölə bilirik. Bizim üçün Vətən canını ölkəmizin azadlığına və ərazi bütövlüyünə qurban verərək şəhid olmuş qəhrəman insanların uyduğu Şəhidlər xiyabanından başlayır.
Bölmənin digər xəbərləri
