Azərbaycan Prezidentinin “Sahibkarlığın inkişafı ilə bağlı əlavə tədbirlər haqqında” Fərmanından irəli gələn vəzifələr müzakirə olunmuşdur VİDEO
Qəbələ, 2 aprel (AZƏRTAC). Aprelin 2-də Qəbələ rayonunda İqtisadiyyat və Sənaye Nazirliyinin təşkilatçılığı ilə Azərbaycan Respublikası Prezidentinin “Sahibkarlığın inkişafı ilə bağlı əlavə tədbirlər haqqında” 2014-cü il 3 mart tarixli Fərmanından irəli gələn vəzifələrin müzakirəsi, eləcə də sahibkarların bu barədə məlumatlandırılması məqsədi ilə tədbir keçirilmişdir.
AZƏRTAC xəbər verir ki, tədbirdə İqtisadiyyat və Sənaye, Ədliyyə nazirliklərinin, Dövlət Sosial Müdafiə Fondunun, Sahibkarlar (İşəgötürənlər) Təşkilatları Milli Konfederasiyasının, Şəki-Zaqatala iqtisadi rayonuna daxil olan şəhər və rayonların icra hakimiyyətlərinin nümayəndələri, həmçinin 100-dən çox sahibkar iştirak etmişdir. Tədbirdə çıxış edən iqtisadiyyat və sənaye nazirinin müavini Sahib Məmmədov bildirmişdir ki, ölkəmizdə sahibkarlığın inkişafına xüsusi diqqət göstərilir, bu istiqamətdə kompleks dövlət dəstəyi tədbirləri davam etdirilir. Bütün bunların nəticəsi olaraq, son 10 ildə Azərbaycan iqtisadiyyatı 3 dəfədən çox, sahibkarlıq subyektlərinin sayı 2,5 dəfə artmış, məşğulluqda özəl sektorun payı 73,9 faizə, vergi daxilolmalarında 72,4 faizə yüksəlmiş, ÜDM-də özəl sektorun xüsusi çəkisi 80 faizi ötmüşdür.
Qeyd olunmuşdur ki, Azərbaycan Prezidenti İlham Əliyevin “Sahibkarlığın inkişafı ilə bağlı əlavə tədbirlər haqqında” 2014-cü il 3 mart tarixli Fərmanı sahibkarlığın inkişafına göstərilən diqqət və qayğının, bu sahənin inkişafına verilən böyük önəmin, özəl bölməyə dövlət dəstəyi tədbirlərinin ardıcıllığının göstəricisi, sahibkarlığın inkişafının yeni mərhələsinin hüquqi əsaslarını özündə əks etdirən mühüm konseptual sənəddir. Fərmana uyğun olaraq, ölkəmizdə biznes və investisiya mühitinin daha da yaxşılaşdırılması üçün müvafiq araşdırmalar aparılmış və hər bir istiqamət üzrə nümunəvi modellər təhlil olunmuşdur. Sənəddə sahibkarlıq fəaliyyəti ilə məşğul olan şəxslərin “bir pəncərə” prinsipinə uyğun olaraq elektron qeydiyyatı, eləcə də tikintiyə icazələrin verilməsi, elektrik təchizatı şəbəkəsinə qoşulma, daşınmaz əmlaka hüquqların dövlət qeydiyyatı sahəsində prosedur, müddət və xərclərin azaldılması, kreditlərin verilməsi prosesinə təsir edən təsisatların fəaliyyətinin təkmilləşdirilməsi, idxal-ixrac əməliyyatları zamanı tələb olunan sənədlərin, müddət və xərclərin azaldılması üçün müvafiq təkliflərin hazırlanması və digər tapşırıqlar müəyyənləşdirilmişdir. Artıq İqtisadiyyat və Sənaye Nazirliyi bu tapşırıqların icrası ilə bağlı təkliflər paketini hazırlamış və aidiyyəti dövlət qurumlarına təqdim etmişdir. Fərmana uyğun olaraq aparılacaq islahatlar çərçivəsində 6 qanunun qəbul olunması nəzərdə tutulur. “Özəl kredit büroları haqqında” və “Təminatlı əqdlər haqqında” yeni qanunların qəbulu bank xidmətləri sferasının genişlənməsinə, eləcə də sahibkarların maliyyə xidmətlərinə çıxış imkanlarının daha da artırılmasına şərait yaradacaqdır.
Qəbələ Rayon İcra Hakimiyyətinin başçısı Səbuhi Abdullayev çıxışında son illər rayonda sahibkarlıq fəaliyyətinin genişləndirildiyini, özəl bölmənin dinamik inkişaf etdiyini, dövlət dəstəyi ilə yeni istehsal və xidmət müəssisələrinin yaradıldığını, əhalinin məşğulluq səviyyəsinin yüksəldiyini bildirmişdir. Vurğulanmışdır ki, “Sahibkarlığın inkişafı ilə bağlı əlavə tədbirlər haqqında” Fərman hər bir bölgədə olduğu kimi, Qəbələdə də sahibkarlığın daha sürətli inkişafına zəmin yaratmışdır.
İqtisadiyyat və Sənaye Nazirliyinin sahibkarlığın inkişafı siyasəti şöbəsinin müdiri Zaur Qasımov Prezidentin müvafiq Fərmanını Azərbaycanda biznes mühitinin daha da yaxşılaşdırılması və ən qabaqcıl təcrübə əsasında təkmilləşdirilməsi istiqamətində əsas yol xəritəsi kimi səciyyələndirərək demişdir ki, bu mühüm sənəd qarşıdakı illərdə sahibkarlığın inkişafı üçün geniş imkanlar açır. Fərmana əsasən aidiyyəti dövlət qurumları ilə birlikdə dünyanın qabaqcıl ölkələrinin təcrübəsi nəzərə alınmaqla sahibkarlıq sahəsində 8 istiqamət üzrə geniş islahatların aparılmasının müəyyən edilmiş və artıq bu sahədə işlərə başlanılmışdır.
Tədbirdə daha sonra Sahibkarlar (İşəgötürənlər) Təşkilatları Milli Konfederasiyasının nümayəndəsi Fərhad Osmanov, İqtisadiyyat və Sənaye Nazirliyinin strateji planlaşdırma şöbəsinin müdir müavini Rəşad Dayıyev, Ədliyyə Nazirliyinin əməkdaşı Anar Quliyev, Dövlət Sosial Müdafiə Fondunun şöbə müdirinin müavini Rüfət Oruclu çıxış etmişlər. Çıxışlarda investisiya mühitinin daha da yaxşılaşdırılması, inzibati prosedurların sadələşdirilməsi, sahibkarların hüquq və maraqlarının müdafiəsi istiqamətində həyata keçirilən tədbirlər, sahibkarlardan hesabatlarının elektron qaydada qəbulu və digər məsələlərlə bağlı məlumatlar verilmişdir.
Sonunda sahibkarları maraqlandıran suallar cavablandırılmışdır.
Bölmənin digər xəbərləri
