Ağdaşda keçirilən işgüzar forum çərçivəsində 50 sahibkara 1,3 milyon manat güzəştli kredit ayrılmışdır VİDEO
Ağdaş, 4 aprel (AZƏRTAC). İqtisadiyyat və Sənaye Nazirliyinin Sahibkarlığa Kömək Milli Fondu iqtisadiyyatın müxtəlif sahələrində fəaliyyət göstərən sahibkarlıq subyektlərinin investisiya layihələrinin maliyyələşdirilməsini davam etdirir.
AZƏRTAC xəbər verir ki, aprelin 4-də Fond tərəfindən Ağdaş rayonunun Qaradağlı kəndində sahibkarlığın güzəştli kreditləşdirilməsi məsələlərinə dair işgüzar forum keçirmişdir. 80-dək sahibkarın iştirak etdiyi forum çərçivəsində rayonun iqtisadi potensialının reallaşdırılması məqsədilə prioritet hesab olunan müasir çörək istehsalı müəssisəsinin, 50 başlıq südlük istiqamətli müasir ailə fermer təsərrüfatının, kiçik və orta həcmli istixana və bağçılıq təsərrüfatlarının yaradılması üzrə nümunəvi investisiya layihələrinin təqdimatı keçirilmiş, sahibkarlara nümunəvi layihələr və metodiki materiallar paylanılmışdır. Qeyd olunmuşdur ki, sahibkarların istəyinə uyğun olaraq kiçik həcmli investisiya layihələri bütünlüklə dövlətin güzəştli kreditləri hesabına maliyyələşdiriləcəkdir.
Tədbirdə çıxış edən Sahibkarlığa Kömək Milli Fondunun icraçı direktoru Şirzad Abdullayev bildirmişdir ki, bu ilin ötən dövrü ərzində 1014 sahibkara 44,7 milyon manat güzəştli kredit verilmişdir ki, bu kreditlərin reallaşdırılması 2500-ə yaxın yeni iş yerlərinin açılmasına imkan yaradır. Qeyd edilmişdir ki, ümumilikdə, indiyədək Aran iqtisadi rayonunda fəaliyyət göstərən sahibkarlıq subyektlərinin 7598 investisiya layihəsinin maliyyələşdirilməsinə 326 milyon manat güzəştli kredit verilmiş, digər sahələrlə yanaşı, müasir texnologiyaların tətbiqinə əsaslanan kənd təsərrüfatı üzrə logistik mərkəzlərin, cins iribuynuzlu heyvandarlıq komplekslərinin, quşçuluq fabriklərinin, üzümçülük, bağçılıq, tingçilik və toxumçuluq, istixana təsərrüfatlarının, çörək zavodlarının, meyvə-tərəvəz, süd, ət emalı müəssisələrinin yaradılması layihələri maliyyələşdirilmişdir. Bu layihələrinin reallaşdırılması 29 mindən çox yeni iş yerinin yaradılmasına imkan verir.
İqtisadiyyat və Sənaye Nazirliyinin Aran regional bölməsinin müdiri Elbrus Hüseynov dövlət başçısının diqqət və qayğısı nəticəsində digər bölgələrdə olduğu kimi, Aran iqtisadi rayonunda, o cümlədən Ağdaşda da quruculuq-abadlıq işlərinin geniş vüsət aldığını, yeni istehsal və xidmət müəssisələrinin, sosial infrastruktur obyektlərinin, yeni iş yerlərinin açıldığını bildirmişdir.
İşgüzar forum çərçivəsində Ağdaş və ətraf rayonlardan olan 50 sahibkara 1,3 milyon manat güzəştli kredit ayrılmışdır. Verilmiş kreditlər əsasən, heyvandarlıq, bağçılıq və digər sahələrin inkişafına yönəldiləcəkdir. Bu kreditlərin reallaşdırılması hesabına 100-dən çox yeni iş yerinin açılması mümkün olacaqdır.
Qaradağlı kəndində keçirilmiş işgüzar forumda, həmçinin sahibkarlar və müvəkkil kredit təşkilatlarının nümayəndələri investisiya layihələri barədə birgə müzakirələr aparmış və tərəflər arasında işgüzar münasibətlər yaradılmışdır.
Forum çərçivəsində Ağdaş rayonunun Ərəbocağı kəndində güzəştli kredit ayrılmış müasir heyvandarlıq kompleksinin fəaliyyətinə baxış keçirilmişdir.
Bölmənin digər xəbərləri
