"Mən böyüyəndə əsgər olacağam" - Şəhid Mahir Paşayevin gerçəkləşən arzusu VİDEO
Cəlilabad, 29 oktyabr, İlkin Adıyev, AZƏRTAC
Vətənin bütövlüyü uğrunda canlarını qurban verən, müqəddəs torpaqlarımızı öz qanları ilə qoruyaraq şəhidlik zirvəsinə ucalan qəhrəman igidlərimizdən biri də şəhid Mahir Bəxtiyar oğlu Paşayevdir. O, Vətən torpaqlarının azad edilməsi uğrunda gedən döyüşlərdə böyük igidlik nümayiş etdirib, Vətən uğrunda canını fəda etməklə xalqımızın yaddaşına əbədi qəhrəman kimi həkk olunub.
AZƏRTAC-ın bölgə müxbiri xəbər verir ki, Mahir Paşayev 1997-ci il sentyabrın 1-də Cəlilabad rayonunun Əsədli kəndində dünyaya göz açıb.
2015-ci ildən Azərbaycan Silahlı Qüvvələrinin sıralarında xidmətə başlayıb, Aprel döyüşlərində də iştirak edib.
Azərbaycan Ordusunun kiçik çavuşu Mahir Paşayev, 2020-ci il sentyabrın 27-də başlayan və Ermənistanın işğalı altında olan torpaqlarımızın azad edilməsi, həmçinin Azərbaycanın ərazi bütövlüyünün bərpa olunması məqsədilə aparılan Vətən müharibəsində fəal iştirak edib. O, ən ağır döyüşlərdə böyük cəsarət və rəşadət göstərib.
Mahir Paşayev döyüş meydanında göstərdiyi igidlik nəticəsində silahdaşları arasında da hörmət qazanıb.
Şəhidin atası Bəxtiyar Paşayev oğlunun göstərdiyi qəhrəmanlıqdan qürur hissi keçirdiyini bildirir. Şəhid atası söyləyir ki, Mahir uşaqlıq illərindən hərb sənətinə xüsusi maraq göstərib, hər zaman Vətənə xidmət etməyi arzulayıb. O, tez-tez “böyüyəndə hərbçi olacağam” deyər, bu arzusu ilə yaşayardı. Mahir sonradan həmin arzusunu gerçəkləşdirərək Vətən uğrunda canından keçməklə, bu müqəddəs yolun ən uca zirvəsinə – şəhidlik məqamına yüksəlib: “Mahir uşaqlıqdan çox fərqli idi… Hər zaman hərb sahəsinə böyük maraq göstərirdi. Hələ balaca vaxtlarından əlinə oyuncaq silah alar, “mən böyüyəndə əsgər olacağam, Vətəni qoruyacağam”, - deyərdi. Biz o zaman bunu, sadəcə, uşaq arzusu kimi qəbul edirdik, amma o, bu sözünü ürəkdən deyirmiş... Mahir böyüdükcə Vətən sevgisi də onunla bərabər böyüyürdü. 2015-ci ildə ordu sıralarına qoşuldu, xidmətini böyük məsuliyyət və fəxarətlə yerinə yetirdi. Aprel döyüşlərində də iştirak etdi, vətənpərvərliyi ilə həm döyüş yoldaşlarının, həm də komandirlərinin rəğbətini qazanmışdı. Vətən müharibəsi başlayanda o, bir an belə tərəddüd etmədən ön cəbhəyə getdi. Xüsusi təyinatlı qüvvələrin tərkibində xidmət edib və snayperçi kimi döyüşlərdə böyük şücaət göstərdi. Döyüş yoldaşlarının dediyinə görə, Mahir hər zaman cəsarəti, mərdliyi və Vətənə olan sonsuz sevgisi ilə seçilib. “Bu torpaqlar bizimdir, biz azad etməliyik” deyərək, son damla qanına qədər vuruşub. Təəssüf ki, 2020-ci il oktyabrın 9-da Hadrut istiqamətində gedən şiddətli döyüşlər zamanı qəhrəmancasına şəhid oldu… Bəli, bu, bir ata üçün ən ağır itkidir…”, - deyə şəhid atası bildirir.
Şəhidin anası Mətanət Paşayeva ilə söhbət edirik. Deyir ki, Mahir uşaqlıqdan çox mərd, vicdanlı və qayğıkeş uşaq olub. O, həmişə ailəsinə bağlı, dostlarına sadiq idi: “Mahir hələ kiçik yaşlarından çox məsuliyyətli olub. Evdə hər işdə bizə kömək edərdi, heç vaxt “yoruldum” deməzdi. Uşaqlıqdan hərbi forma geyinməyə, əsgərlərə baxmağa xüsusi maraq göstərirdi. Televizorda hərbi paradlara baxanda deyirdi ki, “ana, bir gün mən də o sırada addımlayacağam”. O, Vətən üçün canından keçəcəyini sanki bilirdi və bundan qorxmurdu. Mahirin qardaşı da müharibədə iştirak edirdi. Hər dəfə zəng edəndə birinci qardaşını soruşurdu. Sonra deyirdi ki, “ana, dua et, qələbə bizimlə olsun...”.
Qeyd edək ki, 2020-ci il oktyabrın 9-da Hadrut istiqamətində gedən şiddətli döyüşlər zamanı Mahir Paşayev rəşadətlə vuruşaraq şəhidlik zirvəsinə ucalıb. Şəhidimizin nəşi doğulduğu Cəlilabad rayonunun Əsədli kəndinə gətirilib və kənd qəbiristanlığında torpağa tapşırılıb.
Şəhid Mahir Bəxtiyar oğlu Paşayev Azərbaycan Respublikası Prezidentinin müvafiq sərəncamlarına əsasən ölümündən sonra 3-cü dərəcəli “Rəşadət" ordeni, “Vətən uğrunda”, “İgidliyə görə” , “Cəbrayılın azad olunmasına görə”, Kəlbəcərin azad olunmasına görə” , “Qubadlının azad olunmasına görə” , “Xocavəndin azad olunmasına görə” medalları ilə təltif olunub.
Bölmənin digər xəbərləri
