SİYASƏT
ANSA AzərTAc ilə bütün sahələrdə əməkdaşlığı genişləndirməyə hazırdır
Roma, 23 dekabr, AZƏRTAC
Azərbaycan-İtaliya münasibətləri yeni mərhələyə qədəm qoyub. Prezident İlham Əliyevin cari ilin iyulunda bu ölkəyə rəsmi səfəri və “Azərbaycan Respublikası ilə İtaliya Respublikası arasında strateji tərəfdaşlıq haqqında Birgə Bəyannamə”nin qəbul olunması əlaqələrimizi strateji tərəfdaşlıq səviyyəsinə yüksəltdi. Digər tərəfdən, Azərbaycan artıq İtaliyada dünya mədəniyyətinə mühüm töhfələr verən bir ölkə kimi tanınır. Azərbaycan təkcə öz mədəni dəyərlərinin təbliği ilə kifayətlənmir, müxtəlif ölkələrin, o cümlədən İtaliyanın mədəni həyatına yeni nəfəs verir. Bu istiqamətdə Heydər Əliyev Fondunun dəstəyi ilə Romada reallaşdırılan layihələr İtaliyada yüksək qiymətləndirilir.
Bütün bu amillər italiyalı jurnalistlərin Azərbaycana marağını artırır. Bu ölkənin KİV-ləri Azərbaycanda baş verən prosesləri, İtaliya ilə əlaqələri daim diqqət mərkəzində saxlayır. Bu baxımdan İtaliya media nümayəndələrinin Azərbaycana səfərlərini xüsusi vurğulamaq lazımdır. Bu səfərlər ölkəmizlə bağlı həqiqətlərlə daha yaxından tanış olmaq və reallıqları İtaliya ictimaiyyətinə çatdırmaq üçün önəmlidir. Bu ölkənin tədqiqatçıları, jurnalistləri ölkəmizlə bağlı kitablar, silsilə yazılar və reportajlar hazırlayırlar.
Haqqında bəhs etdiyimiz mövzu ilə əlaqədar İtaliyanın ANSA xəbər agentliyinin baş meneceri və baş icraçı direktoru Cüzeppe Serbonenin fikirlərini öyrəndik.
“Sizcə İtaliya mediasını Azərbaycanla belə yaxından maraqlanmağa nə sövq edir?” sualına cavabında C.Serbone dedi ki, Azərbaycanın həm siyasi, həm də iqtisadi baxımdan mühüm əhəmiyyət kəsb edən bir ölkə olması bu məsələdə mühüm rol oynayır. Avropa ilə Asiya arasında önəmli bir nöqtədə yerləşməsi Azərbaycanın strateji əhəmiyyətini daha da artırır. Digər tərəfdən, Azərbaycanın zəngin enerji potensialına malik olması bu ölkəni Avropa dövlətləri ilə ticarət və iqtisadiyyat sahəsində danışıqlarda əsas oyunçuya çevirir. Bütün bunlar İtaliyada da diqqətlə izlənilir.
Baş direktor qeyd etdi ki, son illər Azərbaycanda bütün sahələrdə tərəqqi nəzərə çarpır. Təbii ki, bu sırada media sektoru da mühüm yer tutur. Ölkənizdə yeni media qurumlarının sayının artması müşahidə olunur. Bu, Azərbaycanda müvafiq sektorda mövcud inkişaf tendensiyasının göstəricisidir.
İtaliya və Azərbaycan media qurumlarının əlaqələrindən danışan C.Serbone bu məsələdə dialoq və qarşılıqlı anlaşmanın çox önəmli olduğunu vurğuladı. ANSA ilə AZƏRTAC arasındakı əməkdaşlıqdan da bəhs edən baş direktor dedi: “Agentliklərimizin birgə faydalana biləcəyi layihələri həyata keçirməyə hər zaman maraq göstəririk. Biz AZƏRTAC ilə ənənəvi jurnalistikadan multimedia sahəsinədək bütün sahələrdə əməkdaşlığı genişləndirməyə və bunun üçün birgə müzakirələr aparmağa hazırıq. Gələcəkdə bu istiqamətdə hansı işlər görə biləcəyimizə dair fikir mübadiləsi aparmaq üçün mütəmadi olaraq görüşlərin təşkili yaxşı nəticələr verə bilər”.
Maqsud Dadaşov
AZƏRTAC-ın xüsusi müxbiri
Roma