“ASCO istiqrazları” üzrə ilk faiz ödənişi həyata keçirilib
Bakı, 7 sentyabr, AZƏRTAC
Milli iqtisadiyyatımızın inkişafında önəmli yerə sahib olan, ölkəmizin ən qədim şirkətlərindən biri - “Azərbaycan Xəzər Dəniz Gəmiçiliyi” QSC-nin (ASCO) dövriyyəyə buraxdığı “ASCO istiqrazları” üzrə ilk kupon ödənişi olub.
ASCO-dan AZƏRTAC-a bildirilib ki, istiqraz sahiblərinə, ümumilikdə 3 milyon ABŞ dolları həcmində faiz ödənişi edilib. Bu vəsait artıq investorların bank hesablarına köçürülüb.
Ümumi dəyəri 100.000,000 ABŞ dolları, hər birinin nominal dəyəri 1000 ABŞ dolları olan “ASCO istiqrazları” 5 illik müddətə tədavülə buraxılıb. İstiqrazlar üzrə faizlər 6 aydan bir ödənilməklə illik 6% gəlirliliklə emissiya edilib.
“ASCO istiqrazları”na abunə yazılışı ötən il dekabrın 29-dan başlayıb və bu il fevralın 28-dək davam edib.
İstiqrazlardan əldə olunan gəlir ASCO-nun Xəzərdənkənar fəaliyyətinin genişləndirilməsinə, eləcə də beynəlxalq hövzələrdə yükdaşımalar üçün yeni tipli daha böyük gəmilərin alınmasına yönəldilib. Eyni zamanda, istiqrazlar ölkə vətəndaşlarının vəsaitlərinin daha səmərəli istifadəsinə və Azərbaycanın qiymətli kağızlar bazarının inkişafına ciddi dəstək olub.
Bölmənin digər xəbərləri
