AŞQABAD ZƏLZƏLƏSİNDƏ ZƏRƏR ÇƏKMİŞ UŞAQLARA AZƏRBAYCAN YARDIM ETMİŞDİR

29.10.2004 [18:15]
Çap et
A⁺ A^-

AZƏRTAC-ın xüsusi müxbiri xəbər verir ki, Aşqabadda rus dilində çap edilən “Neytralnı Türkmənistan” qəzeti “Zəlzələnin uşaqları” adlı arxiv materialı çap etmişdir. Məqalə zəlzələ zamanı valideynlərini itirmiş və faciədən dərhal sonra Bakıya göndərilmiş 390 uşaq barəsindədir. Məqalədə göstərilir ki, bir neçə il bundan əvvəl Türkmənistan Dövlət Arxivinə bir qadın gəlmiş və gətirdiyi dəftəri arxivin əməkdaşlarına çatdırılmasını qapıçıdan xahiş etmişdir. Dəftərdə zəlzələdən sonra Bakıya göndərilmiş uşaqların 90 nəfəri haqqında məlumat toplanmışdır.

Məqalədə deyilir: - Dəftərdən məlum olur ki, yaşca böyük uşaqlar ad və familiyalarını, ata-analarının adlarını bilsələr də, kiçik yaşlılar özləri haqqında dəqiq məlumat verə bilməmişlər. 90 uşaqdan 24-ü haqqında heç bir məlumat toplamaq mümkün olmamışdır. Məsələn, uşaqların şəkillərinin altında yazılmışdır “5 nömrəli oğlan, 1 yaşında. Daxil olduğu tarix 9.10.1948-ci il” (Xatırladırıq ki, Aşqabadda dağıdıcı zəlzələ 1948-ci il oktyabrın 6-da olmuşdur).

Məqalədə deyildiyinə görə, 90 uşağın 24-ü körpələr evinə, 20-si xəstəxanaya, 14-ü isə uşaq evlərinə göndərilmişdir. Dəftərdəki yazıların köməyi ilə yalnız 46 uşağın gələcək taleyi haqqında məlumat almaq olur. Məsələn, 6 oğlanı və 7 qızı qohumları və valideynləri tapmış, 16 uşaq ayrı-ayrı ailələrə verilmişdir.

Materialın sonunda bu faciədən dərhal sonra kömək əlini uzatmış Azərbaycan xalqına minnətdarlıq bildirilir.