Astana, 12 avqust, AZƏRTAC

Beynəlxalq Gənclər Günü ərəfəsində, Qazaxıstan Respublikasının paytaxtı Astanada, Qazaxıstan, Özbəkistan, Yaponiya və digər ölkələrdən 300 gənci bir araya gətirən geniş miqyaslı "Bir tolqynda" müasir rəqs çempionatı keçirilib.

AZƏRTAC xəbər verir ki, iştirakçılar 8 əsas nominasiya üzrə çıxış ediblər.

"All styles 5x5 Rep your country" nominasiyasında komandalar öz ölkələrini təmsil ediblər. Bu kateqoriyada Yaponiya, Özbəkistan və Qazaxıstandan olan rəqqaslar yarışıblar.

Yapon rəqqasları mədəni və peşəkar təcrübə mübadiləsi çərçivəsində rəqs performansı nümayiş etdiriblər.

Tədbirin məqsədi gənclərin idman və yaradıcılıq potensialını reallaşdırmaq və sağlam həyat tərzini təbliğ etməkdir.

Elşən Rüstəmov

AZƏRTAC-ın xüsusi müxbiri

Astana