SİYASƏT
ASTANADA XOCALI FACİƏSİNİN İLDÖNÜMÜ İLƏ ƏLAQƏDAR MƏRASİM KEÇİRİLMİŞDİR
Astana, 26 fevral (AZƏRTAC). Astanadakı Azərbaycan Mədəniyyət Mərkəzləri İttifaqı “Xəzər” Mədəniyyət Mərkəzi ilə birlikdə Xocalı faciəsinin 17-ci ildönümü ilə əlaqədar anma mərasimi keçirmişdir.
Tədbirdə Azərbaycanın Qazaxıstandakı səfiri Lətif Qəndilov, Türkiyə səfirliyinin əməkdaşları, Qazaxıstan-Azərbaycan Dostluq Assosiasiyasının rəhbərləri, paytaxtdakı diasporumuzun üzvləri, qardaş qazax xalqının nümayəndələri, jurnalistlər iştirak etmişlər.
İttifaqın sədri Vidadi Salahov bildirmişdir ki, 17 il əvvəl fevralın 25-dən 26-na keçən gecə Azərbaycanın Xocalı şəhəri erməni hərbi birləşmələrinin və keçmiş SSRİ-nin 366-cı motoatıcı alayının birlikdə hücumi ilə yer üzündən silinmiş, qadınlara, qocalara, uşaqlara, hətta körpələrə aman verilməmiş, onlar analarının gözləri qarşısında süngüdən keçirilmışdır.
Səfir Lətif Qəndilov ermənilərin zaman-zaman azərbaycanlılara və türklərə qarşı törətdikləri vəhşiliklərdən danışmış, bu vəhşiliklərin məhz ermənilərin tarixinə yazıldığını qeyd etmişdir.
Türkiyə diplomatı Ələddin Temur türklərin Xocalı faciəsini heç zaman unutmayacağını bildirmişdir.
Sonda mərasim iştirakçılarına Heydər Əliyev Fondunun Xocalı soyqırımı ilə bağlı rus və ingilis dillərində hazırladığı kitablar, bröşürlər, bukletlər, faciə haqqında sənədli filmin elektron versiyası verilmişdir.
Qulu Kəngərli
AZƏRTAC-ın xüsusi müxbiri
Astana